«ادامنىڭ كۇنى اداممەن» دەگەندەي, تىرشىلىكتە كومەككە مۇقتاج جاندار كوپ. ساۋاپتى ىسكە ورتاقتاسقىسى كەلگەن الماتىداعى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ «جان جىلۋى» ەرىكتىلەر كلۋبى «جان جىلۋى – ءومىر شۋاعى» اتتى كەزەكتى قايىرىمدىلىق كونتسەرتىن وتكىزىپ, بەكبولات ەسىمدى بۇلدىرشىنگە قول ۇشتارىن بەردى.
اتالمىش كلۋبتىڭ 3 جىل تولۋىنا ورايلاستىرىلعان قايىرىمدىلىق شارا وكپەسى جەتىلمەي قالعان بەكبولات ەسىمدى 1 جاستاعى بۇلدىرشىنگە ارنالدى. كلۋب مۇشەلەرى «قازىرگى تاڭدا مەملەكەت بالانىڭ ەم-دومىنا كۆوتا بولگەن, بىراق, جول شىعىنى, شەت ەلدە پاتەر جالداپ تۇرۋ ماسەلەسى وتباسىنا قيىندىق تۋعىزىپ وتىر», – دەگەن اقپاراتتى «قازاقستان» ۇلتتىق تەلەارناسىنىڭ «جان جىلۋى» باعدارلاماسىنان ەستىگەن. سودان كەيىن ىلە-شالا بۇل وتباسىعا قولداۋ ءبىلدىرۋ ماقساتىندا اتالمىش قايىرىمدىلىق اكتسياسىن ۇيىمداستىرۋدى شەشىپ, ءبىر وتباسىنىڭ باسىنا تۇسكەن قايعى-قاسىرەتتى قولدان كەلگەنشە جەڭىلدەتۋگە تىرىستى. شاراعا بەكبولات پەن ونىڭ اناسى ارنايى شاقىرىلدى.
جاستاردى جومارتتىققا باۋلۋ, تاعدىر تالكەگىنە ۇشىراعان جاندارعا قولداۋ كورسەتۋ ماقساتىندا وتكەن شاراعا «تەك قانا, قىزدار» كۆن كومانداسى, «الماتى جايدارمانى», «ونەر قىراندارى», «مەلومەن», «قىران» توبى, «توميريس» بي ءانسامبلى, مەرۋەرت تۇسىپباەۆا, گۇلنار الىمبەكوۆا, تاڭات مامىرحان, قانات ۇمبەتوۆ, جانار داۋكەەۆا, بورىبەك راسۋلوۆ, رايىم ۋايىس, بەيبىت قۇشقاليەۆ سىندى ەسترادا جۇلدىزدارى قاتىسىپ, اكتسيانى قولدادى.
كەش بارىسىندا وقۋ ورنىنىڭ الەۋمەتتىك جانە تاربيە ىستەرى جونىندەگى پرورەكتورى زاۋرەش سابىروۆا قاشان دا قايىرىمدىلىقتان كەندە بولماعان ۇلتتىق بولمىسىمىز جايلى ستۋدەنتتەرمەن سىر ءبولىسىپ:
– قايىرىمدى ادامداردىڭ ءومىر جولى تەك ىزگىلىكتەن, مەيىرىمدىلىكتەن تۇرادى. اتامىز قازاق «قولى اشىقتىڭ – جولى اشىق» دەپ بەكەر ايتپاعان. يگى شارا جاستاردىڭ بويىندا قايىرىمدىلىق سەزىمىن ۇيالاتىپ قانا قويماي, وسكەلەڭ ۇرپاقتى رۋحاني جاعىنان تاربيەلەۋگە دە زور سەپتىگىن تيگىزەدى, – دەپ شارادان ءتۇسكەن 400 مىڭعا جۋىق قاراجاتتى بەكبولاتتىڭ اناسىنا تابىستادى.
ۋنيۆەرسيتەت باسشىلارى شاراعا اتسالىسقان انشىلەرگە العىسىن ءبىلدىرىپ, ءسابيدىڭ ساۋىعىپ كەتۋىن, ستۋدەنتتەردىڭ تامشىداي عانا ۇلەسىنىڭ شاراپاتى تيە بەرۋىن تىلەدى. ال ستۋدەنتتەر ىزگى تىلەكتەرىن اسەمحاتتارعا جازىپ بەردى. ەسترادا جۇلدىزدارى دا جۇرەكجاردى تىلەكتەرىن ءبىلدىردى.
اكتسيا اياسىندا «جان جىلۋى» ەرىكتىلەر كلۋبىنىڭ ءمۇشەلەرى ارنايى جارمەڭكە دە ۇيىمداستىرىپ, بۇدان تۇسكەن قاراجات تا بەكبولاتتىڭ ەسەپ-شوتىنا اۋدارىلدى.
ايناش ەسالي,
«ەگەمەن قازاقستان».
الماتى.
