فيلمدەگى وقيعا قاراتاس اۋىلىنداعى مەكتەپتە ءوربيدى. ءبىلىم ورداسىن باسىپ العان بەلگىسىز بىرەۋلەر وقۋشىلاردى تۇتقىنعا الىپ, ولاردى بوساتۋ ءۇشىن ەشقانداي تالاپ قويمايدى. قالادان كومەككە شىققان قۇتقارۋشىلار الاي-دۇلەي سوققان ىزعارلى بوراننان جەتە الماعاندىقتان, مەكتەپ ۇستازى تازشى اتا-انالاردىڭ باسىن قوسىپ, بالالاردى بوساتۋعا بەل بۋادى.
فيلمدەگى باستى رولدەردى ازامات نىعمانوۆ, الەكساندرا رەۆەنكو, بەرىك ايتجانوۆ, دانيار الشىنوۆ, نۇرلان باتىروۆ, تەومان حوس, ەركەن گۋباشەۆ جانە ەردەن تەلەمىسوۆ سومدايدى. «شتۋرم» – رەسەيلىك LOOKFILM جانە FORESTFILM كومپانيالارىنىڭ قولداۋىمەن ShortBrothers پروديۋسەرلىك كومپانياسى تۇسىرگەن قازاقستان مەن رەسەيدىڭ بىرلەسكەن تۋىندىسى.
سونداي-اق جوبانى جاساۋعا «قازاقفيلم», Cinerental كينوستۋدياسى جانە ايگىلى Nomad Stunts كاسكادەرلەر توبى اتسالىستى.
ەستەرىڭىزگە سالا كەتسەك, ءساۋىر ايىندا اتالعان فيلم فرانتسيادا وتكەن Festival international du Film Policier Reims Polar كينوفەستيۆالىندە گران-پري جانە سىنشىلاردىڭ جۇلدەسىمەن ماراپاتتالعان بولاتىن.
ءفيلمنىڭ ستسەناريستى جانە رەجيسسەرى ءادىلحان ەرجانوۆ. پروديۋسەرلەر: سەرىك ابىشەۆ, ولگا حلاششەۆا, الەكساندر پلوتنيكوۆ, بوريس حلەبنيكوۆ, ناتاليا دروزد, اننا تيحونوۆا, ابىلايحان ءاشىموۆ, جايداربەك كۇنعوجينوۆ. قويۋشى وپەراتور ايدار ءشارىپوۆ. قويۋشى سۋرەتشى ەرمەك وتەگەنوۆ. كومپوزيتورى عالىمجان مولدانازار.
