شارانى ءال-فارابي اتىنداعى قازۇۋ-دىڭ جۋرناليستيكا فاكۋلتەتىنىڭ دەكانى سانسىزباي ماديەۆ اشىپ, ەل مۇددەسىنە قىزمەت ەتكەن, حالقىنىڭ مادەنيەتى مەن ءتىلىن دارىپتەپ وتكەن تۇلعانى ماڭگى ەستە قالدىرۋ ماقساتىندا ىسكە اساتىن شارالار بارىسىنا توقتالدى.
العاشقى بولىپ ءسوز العان ۋنيۆەرسيتەتتىڭ ءبىرىنشى پرورەكتورى مىندەتىن اتقارۋشى قاناتبەك مۇقانوۆ ۇلتتىق ءباسپاسوزىمىزدىڭ وركەندەۋىنە ۇلكەن ەڭبەك سىڭىرگەن تۇلعانىڭ شىعارماشىلىعىن وسكەلەڭ ۇرپاققا, بولاشاق جۋرناليستەرگە ۇلگى ەتىپ, ونەگە تۇتۋ ماقساتىندا جۋرناليستيكا فاكۋلتەتىندە ۇيىمداستىرىلىپ وتىرعان «شايمەردەنوۆ وقۋلارى» ءىس-شاراسىنىڭ اياسىن كەڭەيتۋدى, وعان جاستاردى مەيلىنشە كوبىرەك قاتىستىرۋ ماسەلەسىن قوزعادى.
القالى جيىنعا قاتىسقان الماتى قالاسى اكىمىنىڭ ورىنباسارى ارمان قىرىقباەۆ مەملەكەتشىل تۇلعانىڭ جايدارى مىنەزى, جاستارعا اقىلشى رەتىندەگى جاناشىرلىعى تۋرالى ايتا كەلىپ, جوعارعى كەڭەستە ءباسپاسوز حاتشىسى, پرەزيدەنت اكىمشىلىگىندە, پارلامەنتتە, مادەنيەت جانە اقپارات مينيسترلىگىندەگى جاۋاپتى قىزمەتتەردە جۇرگەنىندە جاۋاپكەرشىلىكتى, مادەنيەتتى ءھام بىلىكتى, ءبىلىمدى تۇلعا رەتىندە دارالانىپ تۇراتىندىعىن ەسكە الدى.
القالى جيىنعا قوناق رەتىندە شاقىرىلعان ە.شايمەردەن ۇلىنىڭ جۇبايى كۇلاش شايمەردەنوۆا, فيلولوگيا عىلىمدارىنىڭ دوكتورى, پروفەسسور, جازۋشى كاكەن قامزين, قازاقستاننىڭ ەڭبەك سىڭىرگەن قايراتكەرى قاينار ولجاي, تانىمال تەلەجۋرناليست گۇلماريا بارمانبەكوۆا, قازاقستان رەسپۋبليكاسىنىڭ مادەنيەت قايراتكەرى, قازاق راديوسىنىڭ ارداگەرى تەمىرحان مومبەك ۇلى-تۇركىستان, اقىن, جۋرناليست بەكجان اشىرباەۆ, تاعى باسقا قاتىسۋشىلار بەلگىلى قالامگەر ەربول شايمەردەن ۇلىنىڭ قوعاممەن بايلانىس ورناتۋ ىسىندەگى ەڭبەگىن, مەملەكەتشىل مىنەزىن, قايراتكەرلىك قاسيەتىن تانىتار ءتالىمدى اڭگىمەلەرىن ورتاعا سالدى. وسى ورايدا كۋرستاسى تەمىرحان مومبەك ۇلى-تۇركىستان «كۋرستا 50 ستۋدەنت ەدىك. 41 ۇل, 9 قىز. وسى قىرىق ءبىردىڭ ىشىندە ادالدىق پەن تازالىق جونىنەن الپىسباي شىمىرباي ۇلى مەن ەربولدىڭ الدىنا تۇسەتىن ەشكىم جوق بولاتىن» دەگەن جۇرەكجاردى ەستەلىگىمەن بولىسە كەلىپ, «جانى تازا ەدى. ءپرينتسيپتى ماسەلەلەردە تەك ادىلەتىنە قاراي جۇرەتىن», دەپ وي تولعادى.
«شايمەردەنوۆ وقۋلارى» اياسىندا حالىقارالىق جۋرناليستيكا مەن قوعامدىق بايلانىس سالاسىنىڭ ۇلتتىق جانە جاھاندىق اقپاراتتىق كەڭىستىكتە دامۋى, تسيفرلىق مەديانىڭ بۇگىنى مەن بولاشاعى, سالالىق جۋرناليستيكانىڭ وتكەنى مەن بۇگىنىن سارالاۋعا ارنالعان عىلىمي-زەرتتەۋ جوبالارىنىڭ قورىتىندىسى جاريالانىپ, شىعارماشىلىق بايقاۋدان وزا شاپقان ستۋدەنتتەرگە ە.شايمەردەن ۇلى اتىنداعى شاكىرتاقى تابىس ەتىلدى.
الماتى
