اتىراۋدا حيۋاز دوسپانوۆا اتىنداعى ستيپەنديانىڭ العاشقى يەگەرى انىقتالدى
اتىراۋدا ەكىنشى دۇنيەجۇزىلىك سوعىستا اۋەگە 300 رەت كوتەرىلىپ, جاۋعا قارسى ۇرىستا ەرەن ەرلىكتىڭ ۇلگىسىن كورسەتكەن قازاقتىڭ باتىر قىزى, حالىق قاھارمانى حيۋاز دوسپانوۆانىڭ ەسىمىن ەستە قالدىرۋ ماقساتىندا يگىلىكتى شارا قولعا الىندى. وعان ارداگەر قاتيموللا ريزۋانوۆ توراعالىق ەتەتىن وبلىستىق ارداگەرلەر كەڭەسى ۇيىتقى بولدى.
– ءبىز بۇل ماسەلەنى بىلتىردان بەرى ويلاستىرىپ, دەمەۋشىلەر ىزدەستىرە باستاعانبىز. ماقسات –تۇنگى اسكەري اۋە جورىعىندا جاۋ ۇياسىن بىرنەشە رەت بومبالاپ, قايتالانباس ەرلىگىمەن تانىلعان حيۋاز دوسپانوۆانىڭ قاھارماندىق مىنەزى مەن ەرلىك داستانىن, جالپى, قازاق حالقىنىڭ ەرجۇرەكتىلىگىن جاس ۇرپاق ساناسىنا سىڭىرە بەرۋ. اسىرەسە, ەرلىگى مەن وجەتتىلىگى, قايراتكەرلىگى تۇرعىسىنان ناسيحاتتالۋى كەمشىن ءتۇسىپ جۇرگەن حيۋاز دوسپانوۆانى جاس ۇرپاق ۇمىتپاسا ەكەن دەيمىز. وسى ورايدا, قازاقتىڭ قاھارمان قىزىنىڭ كەۋدە ءمۇسىنى اتىراۋداعى حالىقارالىق اۋەجاي الدىنا اۋىستىرىلعانىن قالار ەدىك. سونىمەن بىرگە, اۋەجايدان قالاعا دەيىنگى جولعا حيۋاز دوسپانوۆانىڭ اتىن بەرۋدى كەشەۋىلدەتپەگەن ورىندى بولار ەدى. بۇرىن قاھارمان قىزدىڭ ەسىمى مۇز ايدىنى سارايىنا بەرىلەدى دەگەنمەن, بۇل ماسەلە دە ءالى كۇنگە وڭ شەشىمىن تاپقان جوق. دەگەنمەن, ءبىز جاقىندا دەمەۋشىلەرمەن كەڭەسىپ, حيۋاز دوسپانوۆا اتىنداعى ارناۋلى ستيپەنديانى تاعايىنداۋدى ۇيعاردىق. ارنايى قۇرىلعان كوميسسيانىڭ تالقىلاۋىنان كەيىن باتىر اتىنداعى ارناۋلى ستيپەنديانىڭ العاشقى يەگەرىن انىقتادىق, – دەدى گازەت تىلشىسىنە وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆ.
حالىق قاھارمانى حيۋاز دوسپانوۆا اتىنداعى ارناۋلى ستيپەنديا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ستۋدەنتى گۇلناز جولبولدىقىزىنا بەرىلدى. ءبىر ەرەكشەلىگى, اسكەري ۇشقىش اتىنداعى ستيپەندياعا يە بولعان ستۋدەنت اتالعان ۋنيۆەرسيتەتتە «العاشقى اسكەري دايىندىق» ماماندىعىندا وقيدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
––––––––––––
سۋرەتتە: گ.جولبولدىقىزى مەن ق.ريزۋانوۆ.
