«توبىل» فۋتبول كلۋبىنىڭ ءباسپاسوز قىزمەتى ءمالىم ەتكەنىندەي, تاراپتار ەكىجاقتى كەلىسىم بويىنشا كەلىسىم-شارتتى ءۇزدى. اتالعان فۋتبول كلۋبى ا. موسكالەنكوعا العىسىن ايتىپ, الداعى مانسابىندا ساتتىلىك تىلەدى.
«وسى ۋاقىتقا دەيىن «توبىل» ساپىندا بىرنەشە بەلەستى باعىندىردىق. قيىن دا قۋانىشتى كەزەڭدەر باستان ءوتتى. ايتۋلى جەڭىستەر دە, اۋىر جەڭىلىستەر دە بولدى. وسىنىڭ ءبارىن ءبىر كوماندا بولىپ باستان كەشىردىك. «توبىل» – الدىنا بيىك ماقسات قويعان ۇجىم. بىراق وسى جىلى ءبىز ويلاعانداي بولمادى. ونىڭ وزىندىك سەبەپتەرى دە بار. الايدا مۇنىمىز تەك اقتالۋ سياقتى ەستىلۋى مۇمكىن. سول سەبەپتى ارتىق سويلەمەيىن. كومانداعا الداعى ۋاقىتتا ساتتىلىك, ماقساتتارىنىڭ ورىندالۋىن تىلەيمىن. ءار فۋتبولشىعا, اكىمشىلىك جانە مەديتسينالىق شتابقا العىسىمدى بىلدىرەمىن», دەدى الەكساندر موسكالەنكو.
ايتا كەتەيىك, ا. موسكالەنكو «توبىلدى» وتكەن جىلدىڭ ماۋسىم ايىنان بەرى جاتتىقتىرىپ كەلدى. وتكەن جىلى قوستانايلىقتار 45 جاستاعى ماماننىڭ باسشىلىعىمەن ەل چەمپيونى اتاندى. سونداي-اق بيىل سۋپەركۋبوكتى دا جەڭىپ الدى. الايدا قازاقستان بىرىنشىلىگىندە سوڭعى جەتى ماتچتىڭ بىرەۋىندە عانا كوماندا جەڭىسكە جەتتى.
وتكەن تۋردا «اقتوبەدەن» 1:2 ەسەبىمەن ۇتىلىپ قالدى. قازىر تۋرنير كەستەسىندە قوستانايلىقتار 15 ۇپايمەن جەتىنشى ورىندا.
