كوروناۆيرۋس • 13 مامىر، 2022

قازاقستاندا كوروناۆيرۋستىڭ جاڭا شتامى انىقتالدى

80 رەت كورسەتىلدى

دەنساۋلىق ساقتاۋ مينيسترلىگى كوروناۆيرۋس ينفەكتسياسى شتامدارىنىڭ اينالىمىنا مونيتورينگ جۇرگىزۋ بارىسىندا ەلىمىزدىڭ 12 وڭىرىنەن BA.2 «ستەلس-وميكرون» شتامىن انىقتادى، دەپ حابارلايدى Egemen.kz.

قر دەنساۋلىق ساقتاۋ مينيسترلىگىنىڭ حابارلاۋىنشا، 2022 جىلدىڭ ءساۋىر-مامىر ايلارىندا جۇرگىزىلگەن پتر سكرينينگتىڭ قورىتىندىسى بويىنشا ەلىمىزدە كوروناۆيرۋس ينفەكتسياسى شتامدارىنىڭ ءتۇرلى نۇسقالارىنىڭ اينالىمى انىقتالدى.

بارلىق وڭىرلەردە BA.1 «وميكرون» شتامى 98،6 %-دا انىقتالدى، ونىڭ ىشىندە 12 وڭىردە BA.2 «ستەلس-وميكرون» شتامى 36،7%-دا انىقتالدى.

سونداي-اق B. 1.617-like Delta شتامى اينالىمدا ءجۇر جانە زەرتتەلەتىن سىنامالار سانىنىڭ 1،4%-ىن قۇرايدى.

پتر سكرينينگ ناتيجەلەرىن راستاۋ ءۇشىن تولىق گەنومدىق سەكۆەنيرلەۋ جۇرگىزىلەدى، ول اعىمداعى ايدىڭ سوڭىنا قاراي اياقتالادى.

ەپيدەميولوگيالىق جاعداي تۇراقتانعانىنا قاراماستان، مينيسترلىك كوروناۆيرۋس ينفەكتسياسىنا قارسى ۆاكتسيناتسيانى، رەۆاكتسيناتسيانى ۋاقتىلى جۇرگىزۋدى ۇسىنادى.

«التى اي بۇرىن جانە ودان دا كوپ ۋاقىت بۇرىن ۆاكتسيناتسيا كۋرسىن العان ادامدار رەۆاكتسيناتسيالاۋعا جاتاتىنىن ەستەرىڭىزگە سالامىز. قازىرگى ۋاقىتتا قازاقستاندا كۆي-عا قارسى ۆاكتسيناتسيالاۋ جانە رەۆاكتسيناتسيالاۋ ءۇشىن حالىققا ۆاكتسينالاردىڭ ءۇش ءتۇرى (پفايزەر، سينوفارم جانە كازۆاك) قولجەتىمدى، ولاردىڭ ەكەۋىن دۇنيەجۇزىلىك دەنساۋلىق ساقتاۋ ۇيىمى ماقۇلداعان»، دەيدى قر دەنساۋلىق ساقتاۋ مينيسترلىگىنىڭ ءباسپاسوز قىزمەتى.

سوڭعى جاڭالىقتار

ۇقساس جاڭالىقتار