ايماقتار • 13 مامىر، 2022

وسكەمەن تۇرعىنى ەسىرتكى ساۋدالاعانى ءۇشىن 10 جىلعا سوتتالدى

13 رەت كورسەتىلدى

2021 جىلعى جەلتوقساندا وسكەمەن-1 ستانتسياسىندا جەلىلىك پوليتسيا قىزمەتكەرلەرى ەسىرتكىنى زاڭسىز ساقتاۋ جانە وتكىزۋ كۇدىگى بويىنشا وسكەمەن قالاسىنىڭ بۇرىن سوتتالعان 63 جاستاعى تۇرعىنىن ۇستادى، دەپ حابارلايدى Egemen.kz كولىكتەگى پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.

قۇقىق بۇزۋشىنىڭ جۇمىس ورنىن، تۇرعىلىقتى جەرىن جانە تىزگىندەگەن اۆتوكولىگىن ءتىنتۋ كەزىندە جالپى سالماعى 9 كەلىدەن اساتىن وراۋلى كۇيدە اسا ءىرى مولشەردەگى «كەپتىرىلگەن ماريحۋانا» ەسىرتكىسى تاركىلەندى.

اتالعان فاكتى بويىنشا كولىك پوليتسەيلەرى قر قك 297-بابى (ەسىرتكى زاتتارىن اسا ءىرى مولشەردە وتكىزۋ ماقساتىندا زاڭسىز ساقتاۋ جانە تاسىمالداۋ) بويىنشا سوتقا دەيىنگى تەرگەۋ جۇرگىزدى.

بيىلعى جىلدىڭ 12 مامىرىندا شقو قىلمىستىق ىستەر جونىندەگى اۋدانارالىق مامانداندىرىلعان سوتىنىڭ ۇكىمىمەن قۇقىق بۇزۋشى قاساقانا اسا اۋىر قىلمىس جاساعانى ءۇشىن كىنالى دەپ تانىلىپ، 10 جىلعا باس بوستاندىعىنان ايىرىلدى.

ەسكە سالا كەتەيىك، جىل باسىنان بەرى ەلىمىزدىڭ كولىك پوليتسەيلەرى ەسىرتكى قۇرالدارىنىڭ زاڭسىز اينالىمىنا بايلانىستى 155 ەسىرتكى قىلمىسىن انىقتادى، ونىڭ 15-ءى – وتكىزۋ، 8-ءى – اسا ءىرى كولەمدە ساقتاۋ فاكتىلەرى.

زاڭسىز اينالىمنان 28 كەلىدەن استام ءتۇرلى ەسىرتكى قۇرالدارى تاركىلەندى.

ايانا توعانبەك

سوڭعى جاڭالىقتار

ۇقساس جاڭالىقتار