بيزنەس • 13 مامىر، 2022

بيزنەس ءۇشىن ءبىلىم كەرەك پە؟

2022 جىلى ەلىمىزدە جوعارى ءبىلىمى بار كاسىپكەرلەر ۇلەسى 61،3 پايىزدى قۇراپتى. بۇل – 2021 جىلمەن سالىستىرعاندا 12،7 پايىزعا تومەن. Solva كومپانياسى جۇرگىزگەن ارنايى زەرتتەۋگە قاتىسقان كاسىپكەرلەردىڭ كوبى بيزنەس جۇرگىزۋ ءۇشىن ءبىلىم اسا قاجەت ەمەس دەپ ويلايتىندارىن ايتقان.

اباي قازبەك ۇلى

زەرتتەۋگە 12 مىڭ رەسپوندەنت قاتىسقان. ونىڭ ىشىندە شاعىن جانە ورتا بيزنەس وكىلدەرى دە، جەكە كاسىپكەرلەر دە، ءىرى كومپانيا وكىلدەرى دە بار. قاتىسۋشىلاردىڭ 55 پايىزى 35-40 جاس ارالىعىنداعى ازاماتتار بولسا، 23 پايىزىن 20-25 جاستاعى كاسىپكەرلەر قۇرايدى. 45-50 جاس ارالىعىنداعى اعا بۋىننىڭ ۇلەسى 12 پايىزعا جەتەعابىل. ال جاسى 55-تەن اسىپ كەتكەن كاسىپكەرلەردىڭ ۇلەسى 10 پايىز ەكەن.

ولاردىڭ 61،3 پايىزىندا جوعارى ءبىلىم بولسا، 14 پايىزى ارناۋلى ورتا بىلىممەن شەكتەلگەن، 3 پايىزىندا اياقتالماعان جوعارى ءبىلىم بار. وزگەلەرىندە ارناۋلى ءبىلىم دە، جوعارى ءبىلىم دە جوق. تيىسىنشە، جاستار (20-25 جاس ارالىعىنداعىلار) كاسىپ تىزگىنىن ۇستاۋ ءۇشىن ۋنيۆەرسيتەتتە وقۋ مىندەتتى ەمەس دەگەن ۇستانىمدا. ولار ارنايى ءبىلىم الماي، Instagram مەن TikTok جەلىلەرىن پايدالانىپ-اق كاسىپتەرىن دوڭگەلەتە الاتىنىن جەتكىزگەن. ال 25 پايىزى ءبىلىم ءبارىبىر قاجەت دەگەن پىكىردە. بىراق سولاي ويلايتىنداردىڭ ءوزى العان بىلىمدەرىمەن كاسىپ اتقارمايدى. دەمەك ولار جوعارى ءبىلىمسىز دە بيزنەستە تابىستى بولا الاتىنىن دالەلدەگەن جاندار.

30-45 جاس ارالىعىنداعى رەسپوندەنتتەردىڭ پىكىرىنە قاراعاندا، كاسىپكەرلىك قىزمەتتى الىپ ءجۇرۋ ءۇشىن ءبىلىم قاجەت. ساۋالداماعا قاتىسقانداردىڭ 20 پايىزى سەمينار، شەبەرلىك سىنىبى، وزگە دە كاسىپكە قاتىستى كۋرستاردى جىبەرمەي باراتىندار توبىنان بولىپ شىققان. ولار قوسىمشا بىلىمگە اياماي اقشا تولەپ، سول ارقىلى بيزنەستەگى قابىلەتتەرىن جەتىلدىرە ءتۇسۋدى كوزدەيدى. ءبىلىم قاجەت دەۋشىلەر جوعارى ءبىلىم العان ازاماتتار كەز كەلگەن قوسىمشا اقپاراتتى تەز سىڭىرەدى، كوزى اشىق بولادى، قوعامدىق پروتسەستەردە جەدەل بوي ۇيرەتەدى دەپ سانايدى.

زەرتتەۋگە قاتىسۋشىلار نەلىكتەن بيزنەسكە كەلگەندەرىن دە ايتقان. ولاردىڭ 30 پايىزى – جوعارى تابىستى بولۋ ءۇشىن بيزنەسكە كەلسە، 25 پايىزى – باسشىلىققا تاۋەلدى بولماس ءۇشىن، 24 پايىزى – ءوز-وزدەرىن دامىتۋ ماقساتىندا، 15 پايىزى – وتباسى مەن دەنساۋلىعىنا كوڭىل ءبولۋ قامىمەن، 5 پايىزى – بەلسەندىلىگىن قوعام مويىنداۋ ءۇشىن، 1 پايىزى – ومىرلىك قاجەتتىلىگىنە وراي بيزنەس جولىن تاڭداعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز