بۇل تۋرالى قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان Total.kz سايتى حابارلادى. قاراعاندى وبلىستىق ىشكى ىستەر دەپارتامەنتى اتالمىش ىسكە قاتىستى ناقتى دالەلدەر كەلتىرىپ وتىر. ناقتىلاي ايتقاندا, الگى ەكى قىزدى قاراعاندىلىق 19 جاستاعى قىز بەن 47 جاستاعى ەر ازامات پۇلداماق بولعان. ال ساۋداعا تۇسكەن ەكەۋ تەمىرتاۋ قالاسىندا جۇرگەن. ولاردى 19 جاستاعى كۇدىكتى قىز قاراعاندىعا ەرتىپ اكەلەدى دە, ساتىپ الۋشى تابىلعانشا, ياعني, ءۇش تاۋلىكتەي جوعارىدا ايتىلىپ وتكەن 47 جاستاعى ازاماتتىڭ ۇيىندە ۇستايدى. پوليتسيا قىزمەتكەرلەرى وسى جاعداياتتاردان حاباردار بولىسىمەن جەدەل قيمىلداپ, ىسكە قاتىسۋشىلاردى دەر كەزىندە قۇرىقتايدى. كەيىننەن پوليتسيا قىزمەتكەرلەرى انىقتاعانداي, «ساۋداگەرلەر» ءبىر قىزدى 130 000 تەڭگەگە باعالاعان. مىس-مىس اقشانى قالتاسىنا باسىپ تايراڭداعىسى كەلگەندەر بۇلتارتپاس دالەلدەرمەن قولعا تۇسكەن. قاراعاندى وبلىستىق ىشكى ىستەر دەپارتامەنتى ءباسپاسوز قىزمەتىنىڭ حابارلاعانىنداي, كۇدىكتىلەردىڭ ەكەۋى بۇعان دەيىن دە قۇقىق قورعاۋ ورىندارىندا تىركەۋدە تۇرعان. قازىر وسى ىسكە قاتىستى قىلمىستىق ءىس قوزعالدى.

جولدىباي بازار.

دەرەككوز: Total.kz. فوتو: via-midgard.info