بۇگىن, 15 ءساۋىر كۇنى استاناداعى ورتالىق كوممۋنيكاتسيالار قىزمەتىندە باسەكەگە قابىلەتتىلىك, ينتەگراتسيالىق ۇدەرىس, ەۋرازيالىق ەكونوميكالىق وداق توڭىرەگىندە بريفينگ ءوتتى. وعان قازاقستاننىڭ ازاماتتىق اليانسىنىڭ پرەزيدەنتى نۇرلان ەرىمبەتوۆ پەن «تۇران» ۋنيۆەرسيتەتىنىڭ رەكتورى راحمان الشانوۆ قاتىستى. بۇل تۋرالى egemen.kz ءتىلشىسى حابارلادى.
جيىندا ءسوز العان نۇرلان ەرىمبەتوۆ: «بۇگىندە ەۋرازيالىق ەكونوميكالىق وداققا قاتىستى سان ءتۇرلى, سان قيلى پىكىرلەر بەلەڭ الۋدا. مەن بۇل جەردە مىنانى ايتار ەدىم: ءبىز بۇگىندە ۇلكەن باسەكەلەستىك ورتاعا ەنىپ بارامىز. ال باسەكەلى ورتاعا كىرۋ وزىمىزگە دەگەن تالاپتى كۇشەيتەدى, دامۋدى ىنتالاندىرادى. وسى ورايدا, مەن ەۋرازيالىق ەكونوميكالىق وداققا دەگەن كوزقاراس ماسەلەسىنە تەك بيزنەس تۇرعىسىنان, شەشىم قابىلدايتىنداردىڭ كوزقاراسى تۇرعىسىنان عانا ەمەس, تۇتىنۋشىلاردىڭ كوزقاراسى تۇرعىسىنان توقتالعىم كەلەدى», - دەدى.
«ينتەگراتسيا مەنىڭ ويىمشا, ۇلتتى بىرىكتىرەدى. ەگەر بۇرىن مەنى ەلىمىزدىڭ بانك جۇيەسى, بيزنەسى سونشالىقتى ويلاندىرماسا, قازىرگى تاڭدا بيزنەس, كاسىپورىندار, جۇمىس بەرۋشىلەر ماسەلەلەرى الاڭداتادى. سەبەبى, ءبىز شىنىمەن دە باسەكەلەستىك ورتاعا ەنىپ بارامىز. ءبىزدىڭ بيزنەسىمىزگە اشىلاتىن مۇمكىندىكتەر مول. بىزگە جاڭا وندىرىستەر, زاۋىتتار مەن تەحنولوگيالار كەلەدى. وسىعان وراي, كادرمەن قامتۋ ماسەلەسى تۋىندايدى. ءبىزدىڭ نارىعىمىزعا كەلەتىن جاڭاشىلدىقتارمەن باسەكەگە تۇسە الامىز با؟ ءبىزدى وسى ماسەلە, ياعني ۇلكەن نارىقتا قالاي ءومىر سۇرەتىنىمىز, ەڭ الدىمەن, ويلاندىرۋى كەرەك. مەنىڭ ويىمشا, ەۋرازيالىق ەكونوميكالىق وداق دۇنيەجۇزىلىك ساۋدا ۇيىمىنا قاراي جاسايتىن العاشقى قادامىمىز», - دەدى ن.ەرىمبەتوۆ ءوز سوزىندە.
راحمان الشانوۆ: «شىنىمەن دە, سوڭعى ءبىر ايدىڭ ىشىندە وسى ماسەلە كوپ تالقىعا تۇسۋدە. «وسى كەرەك پە, كەرەك ەمەس پە؟», «ەگەمەندىككە نۇقسان كەلتىرە مە, جوق پا؟» دەگەن تۇرعىدا سۇراقتار تۋىندادى. ول – زاڭدى. سەبەبى, ءبىز ينتەگراتسيانى كوپ ايتاتىن, كوپ تالقىلايتىن بولدىق. ماسەلەن, ءبىز كومىر شىعارامىز, تەمىر وندىرەمىز. الايدا, ونىڭ بارلىعى سىرتقا كەتىپ جاتىر. وزىمىزدە 10 پايىزىن پايدالانساق, قالعانى شەتەل اسۋدا. دەمەك, ءبىز سىرتتىڭ سۇرانىسىنا تاۋەلدىمىز», - دەگەن ويدىڭ ارقاۋىن شيراتتى.
«بۇگىنگى تاڭدا 184 ەلمەن ارىپتەستىك قارىم-قاتىناس ورناتقان ەكەنبىز. ەۋروپانىڭ اندورا, موناكو سياقتى كىشكەنتاي ەلدەرى قازاقستانمەن بايلانىستا. قازىر پاراگۆاي, ۋرۋگۆاي سەكىلدى ەلدەر ەلىمىزگە جىلقى ەتىن اكەلىپ جاتىر. ياعني, جىلقى وسىرەتىن ەلىمىزگە. ال امەريكا تاۋىق ەتىن اكەلۋدە. ياعني, بارلىعى ءوز تاۋارلارىن وتكىزىپ جاتىر. ءبىر عانا قىتايدىڭ وزىندە قازاقستاننىڭ كىرىس-شىعىس تاۋار اينالىمىن باقىلاپ, زەرتتەيتىن 14 عىلىمي-زەرتتەۋ ينستيتۋتى بار ەكەن. ال مۇنداي قازاقستاندىق ورتالىقتار بار ما؟ سوندىقتان, بىزگە وسىنداي ەكونوميكالىق ساراپتاما جۇرگىزىپ وتىراتىن زەرتتەۋلەر كەرەك. ال ينتەگراتسياعا كەلەر بولساق, ءبىز بيدايدى جالعىز ءوزىمىز تۇتىنبايمىز, سونشا كومىردى پايدالانبايمىز. بىزگە سىرتتان الاتىن ەلدەر دە كەرەك. مىنە, بۇل ينتەگراتسيانىڭ ءبىر كورىنىسى», دەگەن ويىن جەتكىزدى. ونىڭ ايتۋىنشا, بۇگىندە الەم كۇردەلەنىپ, الەمدىك ساۋدا-ساتتىقتىڭ مولشەرى ۇلعايعان. «دەمەك, بىزگە ينتەگراتسيالىق ۇدەرىس, سەنىمدى سەرىكتەستەر قاجەت. ال ءبىز باسەكەلەستىككە دايىن بولعانىمىز ءجون», - ر. الشانوۆ بۇدان ءارى.
ءلايلا ەدىلقىزى.
دەرەككوز: egemen.kz.
