جاھان جۇرتى مارسقا بارىپ, ماڭگى قالۋعا نەگە قۇشتار بولىپ وتىر؟

«گازەتا.Ru» تىلشىلەرى عارىشكەرلەر كۇنى قارساڭىندا Mars One حالىقارالىق جوباسىنا قاتىسىپ, ءوز ەلىنەن ماڭگىلىككە مارسقا ۇشىپ كەتۋدى كوزدەپ جۇرگەن رەسەيلىكتەرمەن تىلدەستى. بۇل تۋرالى «گازەتا.Ru» حابارلادى. 2013 جىلى Mars One قىزىل پلانەتانى «وتارلاۋعا» اتتانعىسى كەلەتىن ەرىكتى عارىشكەرلەردى ىرىكتەۋ ماقساتىندا ارنايى حالىقارالىق جوبا ۇسىنعان بولاتىن. اتالمىش جوباعا قاتىسۋعا 200 مىڭنان استام ادام ءوتىنىش ءبىلدىرىپتى. ال بۇلاردىڭ اراسىنان 1058 ادام جوبا تالابىنا لايىق دەپ تانىلعان. ولاردىڭ 52-ءسى رەسەيلىكتەر ەكەن. ءبىر ايتا كەتەر ءجايت, جوباعا قاتىسۋعا تىلەك بىلدىرەم دەۋشىلەردەن ارنايى عارىشكەرلىك ءبىلىم تالاپ ەتىلمەيدى, تەك ولاردىڭ جاسى 18 بەن 65 جاس ارالىعىندا بولسا جەتىپ جاتىر. بۇلاردىڭ مارسقا ساپارى 2024 جىلعا ورايلاستىرىلىپ وتىر. پلانەتاارالىق ەكسپەديتسيانى ۇيىمداستىرۋشىلار مەن مارسقا ۇشقىسى كەلەتىندەرگە دەم بەرۋشىلەر ادامداردى مارسقا امان-ەسەن جەتكىزىپ, ولاردىڭ سوندا جۇمىس ىستەپ, كۇن كورۋىنە جاعداي جاساۋدىڭ امالدارىن قاراستىرىپ جاتقان كورىنەدى. ءبىر عاجابى, اتالعان حالىقارالىق جوبادا مارسقا بارعانداردىڭ كەرى قايتۋ ماسەلەسى قارالماعان. بالكىم, جوبا سىناعىنان سۇرىنبەي وتكەندەر مارستا ماڭگىلىككە قالۋعا شىن بەكىنگەن بولار. جولدىباي بازار. دەرەككوز: «گازەتا.Ru». فوتو: iphone-rss.gazeta.ru.