ساياحاتشى الماتىلىق ستۋدەنتتەرمەن كەزدەستى. ول جولداعى ەڭ كۇردەلى اۋماق – جەزقازعان-قىزىلوردا اراسى مەن تارازعا دەيىنگى تاۋ اسۋلارى بولعانىن ايتتى. الىس ساپارعا اۋا رايى دا كەدەرگى كەلتىرەتىنىن جەتكىزدى. دەگەنمەن, ەشبىر كەدەرگىگە قاراماستان, اقساقال ءوز ساپارىن جالعاستىرىپ كەلەدى.
ول « ۇلىتاۋدا بولدىڭ با؟» اتتى مارافونعا جەتى جىل دايىندالىپتى. قاريانىڭ ماقساتى - قاراشا ايىنىڭ باسىنا دەيىن قازاقستاننىڭ 17 قالاسىن جاياۋ ارالاپ شىعۋ. ول ءۇشىن جالپى العاندا 8 000 شاقىرىم ءجۇرۋ كەرەك.
«جولدا كەزدەسكەن ادامدار ءجيى توقتاپ, مەنى ءبىراز جولعا دەيىن جەتكىزىپ تاستاۋدى ۇسىندى. بىراق, مەن وزىمە بۇكىل قاشىقتىقتى جاياۋ ءوتىپ شىعامىن دەپ سەرت بەرگەنمىن. مەن وسى سەرتىمدى ساقتاۋىم كەرەك», دەدى سارسەنباي قوتىراشوۆ.
ارتتا قالعان 5 بەس قالانىڭ تۇرعىندارى ساياحاتشىنى قۋانىشپەن قارسى الىپ, قولداۋ ءبىلدىرىپ جاتىر. قارجىلاي دا, ازىق-ت ۇلىكپەن دە كومەك كورسەتكەندەر بولعان. قاريا بۇنداي ەرەكشە ءىلتيپات وعان ساياحاتىن جالعاستىرۋعا جىگەر بەرەتىنىن ايتادى.
مارافونشى الماتىدان قوناەۆ, تالدىقورعان, اياگوز قالالارىنا جول تارتادى, ودان ءارى اقتاۋعا جەتۋدى جوسپارلاپ وتىر.
«مەن شەتەلدە ەشقاشان بولعان ەمەسپىن. وسى ساپاردان سوڭ, كەلەسى جىلى مەككە مەن مەديناعا جاياۋ بارۋدى ارماندايمىن», دەيدى ول.
ايتا كەتسەك, اقساقالدىڭ قولداۋشى توبى دا بار. ونىمەن بىرگە ۇلىتاۋدان قىزىلورداعا دەيىن, شىمكەنتتەن الماتىعا دەيىن توپ جەتەكشىسى, ولكەتانۋشى باحتيار قوجاحمەتوۆ ەرىپ ءجۇردى.
«مەن وعان تاڭعى اس جاساۋعا كومەكتەسەم. 20 شاقىرىمدى كولىكپەن ءجۇرىپ وتەم, بۇل ارالىقتى ول شامامەن تۇسكە دەيىن ءجۇرىپ ءوتۋ كەرەك. سول جەردە مەن شايحانا, كافە, اس ىشەتىن جەردى ىزدەيمىن. ەگەر ولار تابىلماسا, وعان تۇسكى ءاستى وزىم دايىندايمىن. ارىقاراي وسى سحەما بويىنشا تاعى 20 شاقىرىم جۇرەم دە, تۇنەپ شىعاتىن ورىندى ىزدەيمىن», دەدى باحتيار قوجاحمەتوۆ.
ۇلىتاۋ ۇلتتىق تاريحي-مادەني جانە تابيعي مۇراجاي-قورىعىنىڭ قىزمەتكەرى, ەڭبەك ارداگەرى سارسەنباي قوتىراشوۆ ءوز ساپارىن 31 ناۋرىزدا باستاعان.
