نيگەريا اۆتوبەكەتىندەگى جارىلىستان 70 ادام قازا بولدى

نيگەريا استاناسى - ابۋدجا قالاسىنداعى اۆتوبەكەتتە ورىن العان جارىلىستان 71 ادام قازا بولىپ, 124 ادام جاراقات الدى. بۇل تۋرالى يتار-تاسس حابارلادى. ماماندار تەراكتىنى نيگەريا اۋماعىندا يسلام مەملەكەتىن قۇرۋدى كوزدەيتىن «بوكو حارام» ەكسترەميستىك توبى ۇيىمداستىردى دەگەن كۇدىك كەلتىرىپ وتىر. اتالمىش توپ بيىلعى جىلدىڭ باسىنان بەرى جۇزدەگەن ادامنىڭ ولىمىنە سەبەپشى بولعان ەكەن. ماسەلەن, ۇستىمىزدەگى جىلدىڭ 20 اقپانىندا «بوكو حارام» سودىرلارى نيگەريانىڭ سولتۇستىك-شىعىسىنداعى باما قالاسىنا شابۋىل جاساپ, 60 ادامدى مەرت ەتكەن. ال 25 اقپاندا ولار مەكتەپكە كىرىپ, 29 وقۋشىنى اتىپ ولتىرگەن. سونداي-اق ناۋرىزدىڭ باسىندا اتالمىش توپ مۇشەلەرى مايدۋگۋري قالاسىندا تەراكت ۇيىمداستىرىپ, 50 ادامدى ولتىرگەن. ءساۋىردىڭ باسىندا نيگەريانىڭ سولتۇستىك-باتىسىندا قاۋىم جەتەكشىلەرى مەن ءوزىن-ءوزى قورعاۋ جاساعى مۇشەلەرىنە شابۋىل جاساپ, 80 ادامدى قىرىپ سالدى. 2013 جىلدىڭ مامىر ايىندا نيگەريا پرەزيدەنتى گۋدلاك دجوناتان «بوكو حارام» توبىنا قارسى اسكەري وپەراتسيا باستالعانىن مالىمدەگەن بولاتىن. بيلىكتىڭ حابارلاۋىنشا, وپەراتسيا بارىسىندا ەكسترەميستەردىڭ نەگىزگى بازالارى جويىلعان. الايدا, جەكەلەگەن توپتار اسكەريلەردەن قاشىپ قۇتىلعان. ەندى ولار پارتيزاندىق سوعىس تاسىلىنە كوشكەن كورىنەدى. ايدار ورىسباەۆ. دەرەككوز: Itar-tass.com. فوتو: EPA/STR.