بۇل زاڭ جوباسى مەملەكەت باسشىسىنىڭ 2021 جىلعى 1 قىركۇيەكتەگى قازاقستان حالقىنا جولداۋىنداعى سترەستىك اكتيۆتەردى ەكونوميكالىق اينالىمعا قايتارۋ جونىندەگى تاپسىرماسىنا سايكەس ازىرلەندى. زاڭ جوباسىنىڭ نەگىزگى ماقساتى - سترەستىك اكتيۆتەردىڭ ءوتىمدى نارىعىن نارىقتىق تۇردە دامىتۋ جانە ولاردى ەكونوميكالىق اينالىمعا تارتۋ ءۇشىن جاعداي جاساۋ.
«وسى زاڭ جوباسى 4 زاڭعا وزگەرىستەر مەن تولىقتىرۋلار ەنگىزۋدى كوزدەيدى جانە مىناداي نەگىزگى باعىتتاردان تۇرادى. بىرىنشىدەن, زاڭ جوباسىندا سترەستىك اكتيۆتەردى اۆتوريزاتسيالانعان ساتىپ الۋشىلاردىڭ قولدانىستاعى ءتىزىمىن جەكە ينۆەستورلاردى قوسۋ ارقىلى كەڭەيتۋ كوزدەلەدى. قازىرگى ۋاقىتتا بانكتەر تۋرالى زاڭنىڭ 36-1-بابىنا سايكەس, اۆتوريزاتسيالانعان ساتىپ الۋشىلار تىزىمىنە ەكىنشى دەڭگەيدەگى بانكتەر, بانكتەردىڭ سترەستىك اكتيۆتەردى باسقارۋ جونىندەگى ەنشىلەس ۇيىمدارى, پروبلەمالىق كرەديتتەر قورى, كوللەكتورلىق اگەنتتىكتەر جانە باسقا دا قارجى ۇيىمدارى كىرەدى. بۇل رەتتە, ءتىزىم كەڭەيتىلىپ, بانكتەردىڭ جانە ميكروقارجى ۇيىمدارىنىڭ سترەستىك اكتيۆتەرىن جەكە ينۆەستورلارعا ساتۋ قۇقىعى بەرىلەدى», دەدى م. ابىلقاسىموۆا.
ونىڭ ايتۋىنشا, جەكە ينۆەستورلارعا زاڭدى تۇلعالاردىڭ جانە دارا كاسىپكەرلەردىڭ قارىزدارىن ساتىپ الۋعا رۇقسات ەتىلەدى.
قارىز الۋشى – جەكە تۇلعالاردىڭ قۇقىقتارىن قورعاۋ ءۇشىن زاڭ جوباسىندا جەكە تۇلعالاردىڭ كرەديتتەرىن ينۆەستورلارعا ساتۋ كوزدەلمەگەن.
