ءماجىلىس سپيكەرى ەرلان قوشانوۆ پالاتانىڭ جالپى وتىرىسىندا اتالعان زاڭ جوباسىنىڭ ماڭىزدى تۇستارىن اتاپ ءوتىپ, ونى تالقىلاۋدى بارىنشا اشىق وتكىزۋگە شاقىردى.
«قارجىلىق ينتسيتۋتتاردىڭ مۇددەلەرى مەن ءبىزدىڭ ازاماتتاردىڭ سۇرانىستارى اراسىندا تەڭگەرىم تابۋ قاجەت. وسى ماقساتتا جۇيەلى شەشىمدەر قابىلدانۋى كەرەك», دەدى ول.
بۇعان دەيىن حابارلانعانداي, ۇكىمەتتە «قر ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى» زاڭ جوباسى ازىرلەندى. قارجى مينيسترلىگى جەكە تۇلعالاردىڭ بانكروتتىعىن كوزدەيتىن زاڭ جوبالارى بويىنشا جاريا تىڭداۋلار وتكىزدى.
«بۇگىنگى تاڭدا ازاماتتاردىڭ ەداۋىر بولىگى ءتۇرلى سەبەپتەر بويىنشا قارجىلىق جاعدايىنىڭ ناشارلاۋىنا تاپ بولىپ وتىر. بۇنىڭ نەگىزگى فاكتورلارى - جۇمىسىنان نەمەسە ەڭبەك قابىلەتتىلىگىنەن ايىرىلۋ, جالپى ەكونوميكالىق قۇلدىراۋ اياسىندا ءال-اۋقات دەڭگەيىنىڭ تومەندەۋى جانە كوروناۆيرۋستىق ينفەكتسيا بويىنشا كارانتيندىك شارالاردى ەنگىزۋ. ءبىزدىڭ وتانداستارىمىزدىڭ تولەم قابىلەتتىلىگى قالپىنا كەلتىرىلۋى ءتيىس», دەدى قر قم مەملەكەتتىك كىرىستەر كوميتەتى توراعاسىنىڭ ورىنباسارى قايرات مياتوۆ.
ونىڭ ايتۋىنشا, مينيسترلىك «تولەم قابىلەتتىلىگىن قالپىنا كەلتىرۋ جانە ازاماتتاردىڭ بانكروتتىعى تۋرالى» زاڭ جوباسى بويىنشا جۇمىستى اياقتادى.
سونداي-اق زاڭ جوباسىندا بانكروتتىقتىڭ قارجىلىق ساۋاتتىلىقتى ارتتىرۋ بويىنشا مىندەتتى كۋرستاردى وتكىزۋ كوزدەلگەن. ازىرلەنگەن زاڭ جوباسى 21 زاڭنامالىق اكتىگە (8 كودەكس پەن 13 زاڭ) وزگەرىستەر مەن تولىقتىرۋلاردى ەنگىزەدى.
ايتا كەتسەك, زاڭ جوباسى ءالى قابىلدانعان جوق.
«تولەم قابىلەتتىلىگىن قالپىنا كەلتىرۋ جانە ازاماتتاردىڭ بانكروتتىعى تۋرالى» زاڭ جوباسى جانە ەكى ىلەسپە زاڭ جوباسى مەملەكەتتىك ورگاندارمەن كەلىسىلىپ, قر پرەمەر-ءمينيسترىنىڭ كەڭسەسىنە ەنگىزىلدى.
