سونىمەن قاتار سەنات سپيكەرى داڭقتى قولباسشى باۋىرجان مومىش ۇلىنىڭ رۋحىنا تاعزىم ەتىپ, ەسكەرتكىشىنە گۇل شوعىن قويدى. سونداي-اق قالا تۇرعىندارىمەن بىرگە اتى اڭىزعا اينالعان باتىر مەن ۇلى وتان سوعىسى جىلدارىندا قازا تاپقان قازاقستاندىقتاردى ءبىر مينۋت ۇنسىزدىكپەن ەسكە الدى.
بۇعان دەيىن ماۋلەن اشىمباەۆ ءوزىنىڭ Facebook الەۋمەتتىك جەلىسىندەگى پاراقشاسىندا جۇرتشىلىقتى جەڭىس كۇنىمەن قۇتتىقتاپ, ەكىنشى دۇنيەجۇزىلىك سوعىستا قازاقستاندىق جاۋىنگەرلەر قاھارماندىق پەن قايسارلىقتىڭ وزىق ۇلگىسىن كورسەتكەنىن ايتقان ەدى.
ء«بىز جەڭىس كۇنىن اتالارىمىز بەن اكەلەرىمىزدىڭ ەرلىكتەرىن ۇمىتپاي, ولاردى دارىپتەۋ ءۇشىن اتاپ وتەمىز. وسى كۇنى سوعىس سالدارىنان قازا تاپقان ميلليونداعان قۇربانداردىڭ رۋحىنا تاعزىم ەتەمىز. بۇل كۇن اعا بۋىننىڭ ءفاشيزمدى جەڭۋ ءۇشىن قانداي قيىندىقتاردى ەڭسەرگەنىن ۇمىتپاۋ ءۇشىن دە ماڭىزدى. سونداي-اق وسى مەرەكە بەيبىتشىلىك پەن تۇراقتىلىقتىڭ قادىرىن ارتتىرا تۇسەدى», دەدى ماۋلەن اشىمباەۆ.
جىل سايىن تاريحتىڭ جاڭا پاراعى اشىلىپ, سوعىس جىلدارىندا ەرلىگىمەن كوزگە تۇسكەن قازاقستاندىقتار تۋرالى تىڭ دەرەكتەر مەن مالىمەتتەر جاريالانىپ جاتىر. وسىعان وراي جەڭىس كۇنى قارساڭىندا ەل پرەزيدەنتىنىڭ جارلىعىمەن سوعىستا كورسەتكەن ەرلىگى مەن قاھارماندىعى ءۇشىن تولەۋعالي ابدىبەكوۆ, الەكساندر نەسميانوۆ جانە ىبىرايىم سۇلەيمەنوۆكە «حالىق قاھارمانى» اتاعى بەرىلگەنى بەلگىلى. سەنات سپيكەرى بۇل وقيعانى تاريحي ادىلدىكتىڭ قالپىنا كەلۋى دەپ اتاپ ءوتتى.
سونىمەن قاتار پالاتا توراعاسى ەلىمىزگە اماندىق, جەرىمىزگە تىنىشتىق جانە بارشا قازاقستاندىققا زور دەنساۋلىق پەن باق-بەرەكە تىلەدى.
ايانا توعانبەك
