اقتاۋدا ۇلتتىق ۇلاننىڭ «باتىس» وڭىرلىك قولباسشىلىعى 6656 اسكەري ءبولىمىنىڭ اسكەري قىزمەتشىلەرى «ۆاز 21099», Toyota Camry جانە Toyota Land Cruiser 200 ماركالى ءۇش ازاماتتىق اۆتوكولىك قۇرالىنىڭ قاتىسۋىمەن بولعان جول-كولىك وقيعاسىن كورىپ قالىپ, زارداپ شەككەن جولاۋشىلارعا جەدەل كومەك كورسەتتى. جول كولىك وقيعاسى, 7 مامىر كۇنى ساعات 17.30-دا اقتاۋ قالاسىنىڭ 14 شاعىن اۋدانىندا, «H2O» كافەسىنىڭ جانىندا ورىن الدى. جول اپاتىنان التى ادام زارداپ شەكتى. ولار ماڭعىستاۋ وبلىستىق اۋرۋحاناسىنا تەز جەتكىزىلدى», دەلىنگەن حابارلامادا.
زارداپ شەككەندەرگە كومەككە العاشقىلاردىڭ ءبىرى بولىپ 6656 اسكەري ءبولىمىنىڭ جاۋىنگەرلەرى كەلگەن. اسكەري جاساق بويىنشا كەزەكشى اعا لەيتەنانت سابىر قۇرالوۆ پەن پاترۋلدىك قاتارداعى جاۋىنگەرلەر بەكزات قايرۋللاەۆ پەن داۋرەن ۇمبەتوۆ اۆتوكولىك اپاتىن العاشقى بولىپ بايقادى.
«ۇلاندىق ساردار جەدەل جاردەم كولىگى مەن جول-پاترۋلدىك قىزمەت ماماندارىن دەرەۋ شاقىرىپ, پاترۋلشىلەرمەن قورشاۋدى ۇيىمداستىردى. ۇلاندىقتار مەديتسينا قىزمەتكەرلەرىمەن بىرلەسىپ, وقيعا قاتىسۋشىلارىنا مەديتسينالىق كومەك كورسەتتى. شۇعىل جاعدايدا جەدەل ارەكەت ەتكەنى ءۇشىن اسكەري ءبولىمنىڭ باسشىلىعى اسكەري قىزمەتشىلەردى گراموتالارمەن جانە باعالى سىيلىقتارمەن ماراپاتتادى», - دەپ جازدى ۇلتتىق ۇلاننان.
