2008 جىلى قۇرىلعان كاسىپورىن وسىمدىك شارۋاشىلىعىمەن (ەگىس الاڭى 4 682 گا) سونداي-اق ءسۇت جانە ەت شىعارۋعا باعدارلانعان مال شارۋاشىلىعىمەن (شامامەن 5 مىڭ باس ىقم) اينالىسادى.
وتكەن جىلى كومپانيا مەملەكەتتىك قولداۋ اياسىندا 376,7 ملن تەڭگە الدى. پرەمەر-مينيستر سولتۇستىك قازاقستان ءارتاراپتاندىرۋدا كوش باستاپ تۇرعان, ەلىمىزدىڭ باستى استىقتى وڭىرلەرىنىڭ ءبىرى ەكەنىن اتاپ ءوتتى. مۇندا مايلى داقىلداردىڭ ەگىس القابى شامامەن 1 ملن گەكتارعا جەتتى, بۇل – ەلىمىزدەگى ەڭ جوعارى كورسەتكىش.
ء«وڭىردىڭ باسەكەگە قابىلەتتى ءونىمنىڭ ءىرى ءوندىرۋشىسى مەن جەتكىزۋشىسى بولۋعا بارلىق مۇمكىندىكتەرى مەن الەۋەتى بار. ماڭىزدى مىندەت – ەڭبەك ونىمدىلىگىنىڭ تۇراقتى ءوسۋىن قامتاماسىز ەتۋ جانە جاڭا تەحنولوگيالاردى ەنگىزۋ. وسى شارالاردىڭ بارلىعى حالىق تابىسىنىڭ ناقتى وسۋىنە جول اشۋى ءتيىس», دەپ اتاپ ءوتتى ۇكىمەت باسشىسى.
سونداي-اق ءاليحان سمايىلوۆ سقو-دا ىسكە قوسىلعان 22 زاماناۋي فەرمانىڭ ءبىرى سانالاتىن كاسىپورىننىڭ جاڭا ءسۇت فەرماسىنا باردى. 5 جىل ىشىندە وبلىستاعى ۇيىمداستىرىلعان شارۋاشىلىقتاردا ءسۇت ءوندىرىسىنىڭ ءوسىمى 30%-دى قۇرادى, ءسۇتتى قايتا وڭدەۋ ۇلەسى 40%-دان 55%-عا دەيىن ارتتى. جىل سوڭىنا دەيىن تاعى سەگىز ءسۇت كەشەنىن اشۋ جوسپارلانىپ وتىر.
«جىل سايىن ەلىمىزدە كەمىندە 35 ءسۇت-تاۋار فەرماسىن, ونىڭ ىشىندە ونەركاسىپ ۇلگىسىندەگى 10-15 فەرما سالۋ جوسپاردا بار. مۇنداي جوبالاردى ىسكە اسىرۋ ءوندىرىس كولەمىن ۇلعايتۋعا, ءسۇت وڭدەۋ كاسىپورىندارىنىڭ جۇكتەمەسىن ارتتىرۋعا, يمپورتقا تاۋەلدىلىكتى ازايتۋعا, جاڭا جۇمىس ورىندارىن قۇرۋعا مۇمكىندىك بەرەدى. وسى باعىتتاعى جۇمىستى جالعاستىرۋ قاجەت», دەدى پرەمەر-مينيستر.
سونىمەن قاتار ءاليحان سمايىلوۆ كاسىپورىندا جەرگىلىكتى شارۋا قوجالىقتارىنىڭ باسشىلارىمەن كەزدەسۋ وتكىزدى, وندا سالىق سالۋ, سۋبسيديالاۋ, كادرلاردى دايارلاۋ, تىڭايتقىشتار جەتكىزۋ جانە ىشكى نارىققا شىعارىلاتىن اۋىل شارۋاشىلىعى ونىمدەرىن ساتىپ الۋ باعالارى جونىندەگى ماسەلەلەر كوتەرىلدى.
«سۋبسيديالاۋعا كەلەتىن بولساق, مۇنداعى باستى مىندەت – ونىمدىلىكتى ارتتىرۋ, ياعني رەسپۋبليكالىق بيۋدجەتتەن بولىنگەن ءاربىر تەڭگە ونىمدىلىكتى ىنتالاندىرۋعا باعىتتالۋى ءتيىس. وسى ورايدا ءبىز جەرگىلىكتى اتقارۋشى ورگاندارعا ءوڭىردىڭ ەرەكشەلىگىنە جانە جاعدايعا بايلانىستى سۋبسيديالاردىڭ وزگە دە تۇرلەرىن بەرۋگە قۇقىق بەرەمىز. قالاي بولعاندا دا, سۋبسيديالاۋدىڭ جاڭا تاسىلدەرى اۋىل شارۋاشىلىعى تاۋارىن وندىرۋشىلەر – سىزدەرمەن بىرگە قابىلدانادى», دەدى سمايىلوۆ.
پرەمەر-مينيستر شارۋالاردىڭ سۇراقتارىنا جاۋاپ بەرىپ, ءتيىستى مەملەكەتتىك ورگاندارعا ولاردى شەشۋ جولدارىن باقىلاۋدا ۇستاۋدى تاپسىردى.
ۇكىمەت باسشىسى وڭىرگە ساپارى بارىسىندا ونەركاسىپ جانە اۋىل شارۋاشىلىعى كاسىپورىندارىن ارالاپ, الەۋمەتتىك جانە وندىرىستىك نىساندار قۇرىلىسىمەن تانىسادى, سونداي-اق وبلىستى كەشەندى دامىتۋ ماسەلەلەرى جونىندە كەڭەس وتكىزەدى.
