«باۋىرلاس ءازىربايجان, قىرعىزستان, وزبەكستان مەن تۇركيا ەلدەرىنىڭ باس مۇفتيلەرىنە جانە قۇرمەتتى قوناقتارعا زور ريزاشىلىعىمدى بىلدىرەمىن. اتا ءدىنىمىز - يسلام مەيىرىمدىلىك, يماندىلىق, قاناعاتشىلدىق سياقتى اسىل قاسيەتتەردى دارىپتەيدى. سونداي-اق بەيبىتشىلىكتى, تۇراقتىلىق پەن بەرەكە-بىرلىكتى نىعايتۋعا شاقىرادى. وسى ورايدا, القالى جيىنعا قاتىسىپ وتىرعان ءدىن قايراتكەرلەرى جاھان جۇرتىن ىزگىلىك جولىنا جۇمىلدىرۋعا سۇبەلى ۇلەس قوسادى دەپ سەنەمىن. بۇگىنگى باسقوسۋ ءتۇبى ءبىر, تاريحى ورتاق ەلدەرىمىزدىڭ رۋحاني-اعارتۋشىلىق باعىتتاعى جۇمىستارىنا تىڭ سەرپىن بەرىپ, يگى باستامالارىمىزدىڭ باياندى بولۋىنا ىقپال ەتەتىنى ءسوزسىز», دەلىنگەن پرەزيدەنتتىڭ قۇتتىقتاۋ حاتىندا.
باسقوسۋدا تۇركى الەمىندەگى كوپجاقتى قارىم-قاتىناستاردىڭ دامۋى, تۇركى مەملەكەتتەرى اراسىنداعى ىنتىماقتاستىقتى ودان ءارى تەرەڭدەتۋ جايى تالقىلاندى. جيىندا ءسوز سويلەگەن وبلىس اكىمى ومىرزاق شوكەەۆ بۇعان دەيىن كيەلى شاھاردا تۇركىستان دەكلاراتسياسى قابىلدانىپ, «تۇركىستان – تۇركى الەمىنىڭ رۋحاني استاناسى» رەتىندە رەسمي بەلگىلەنگەنىن اتاپ ءوتتى. تۇركىستاننىڭ الداعى ۋاقىتتا دا باۋىرلاس ەلدەرگە ورتاق رۋحاني استانا رەتىندە دامي بەرەتىندىگىن جەتكىزدى.
«بۇگىنگى باسقوسۋعا تۇركىتىلدەس ەلدەردىڭ باس مۋفتيلەرى, ءدىن سالاسىندا سۇبەلى ەڭبەك ەتىپ جۇرگەن عۇلاما, عالىمدارى ارنايى قاتىسىپ وتىر. ادامزات تاريحىنىڭ دۇرىس باعىتتا وربۋىندە يسلام ءدىنىنىڭ الار ورنى ەرەكشە. بۇگىنگىدەي الماعايىپ كەزەڭدەردە ءدىني الاۋىزدىققا جول بەرمەي, يسلام تاريحىنىڭ زەردەلەنۋىنە ەڭبەك ەتىپ جۇرگەن سىزدەرگە دەگەن قۇرمەتىمىز ەرەكشە. تۇركىستان – قازاق جۇرتىنا عانا ەمەس, كۇللى تۇركى باۋىرلاس ەلدەردى ورتاق ماقساتقا جۇمىلدىراتىن باعدار بولۋى ءتيىس. وسى ماقساتتا ءوتىپ جاتقان بۇگىنگى جيىن تۇركىستاننىڭ اشىلماعان تاريحي قۇپيالارى مەن تەرەڭ تاريحىن كەڭىنەن تانۋعا, يسلام وركەنيەتىنىڭ جاندانۋىنا مۇمكىندىك بەرەدى دەپ سەنەمىن», دەدى ايماق باسشىسى.
