ونەر • 06 مامىر، 2022

ءتۇرلى-ءتۇستى تۇسكيىز

85 رەت كورسەتىلدى

حالقىمىزدىڭ قولدانبالى ونەرىندە ۇلتتىق بۇيىمدار ءوندىرىسىنىڭ ورنى ەرەكشە. تاريحى كونە عاسىرلارعا ءتان تۇسكيىز تىگۋ ونەرى بۇگىندە سيرەپ، جادىگەرلەردى تەك مۋزەيلەردەن عانا كەزدەستىرۋگە بولادى.

ءا.قاستەەۆ اتىنداعى مۋزەيدە ساقتالعان تۇسكيىزدەر ءوندىرىسى ءارتۇرلى كەزەڭدەرگە ءتان. مۋزەيدىڭ قولدانبالى ونەر ءبولىمىنىڭ اعا عىلىمي قىزمەتكەرى، قازاقستان سۋرەتشىلەر وداعىنىڭ مۇشەسى ناتاليا باجەنوۆا «كونە زامان­داردا تۇسكيىزدەر كيىزدەن باسىلىپ، ءتۇرلى-ءتۇستى جىپتەرمەن ورنەكتەلىپ، شۇعا، جىبەك، بارقىت، ءماۋىتى، تاعى دا باسقا سياقتى ماتامەن، تىپتەن بىلعارىمەن كوم­كەرىلەتىن بولعان. تۇسكيىز سان­دىك ءۇشىن عانا ەمەس، قورعانىش قىزمەتىن دە اتقارعان. قابىرعاعا تۇسكيىزدىڭ تۇسىنا اڭداردىڭ تە­رىسى بىرگە ىلىنەتىن بولعان. قازىر­­گى كەزدە زاماناۋي كىلەم وندى­رىسىندە تۇسكيىز تەرمينى سيرەك قولدانىلادى. وتكەن عاسىر­دىڭ 50-80 جىلدارىندا ۇلتتىق سيپاتتاعى ينتەرەردە دەكوراتيۆتى بۇيىم رەتىندە، كيىز ۇيلەردىڭ جابدىعى رەتىندە پايدالانىلىپ كەلگەن»، دەيدى.

مۋزەي جادىگەرلەرىنىڭ ىشىندە حح عاسىردىڭ باسىندا سەمەي ءوڭىرىنىڭ تۇرعىنى ماريام يلاكوۆا تىككەن تۇسكيىز ەرىكسىز نازار اۋدارتادى. قۇندى جادىگەر تابيعي مارجان تاستارمەن ورنەكتەلگەن. جىپتەي ەسىلگەن تەمىرمەن ءورىلىپ، اسەمدەلگەن بۇل بۇيىم­نىڭ كوز تارتاتىن تاعى ءبىر قۇپياسى، تۇسكيىزدى ماريام يلاكوۆا ءوز ساۋكەلەسىنەن توقىعان. انادان قىزىنا مۇرا رەتىندە بەرىلەتىن ساۋكەلەنى يەسى قانداي دا ءبىر سەبەپتەرمەن وتپەلى كە­زەڭدەردە ساقتاپ قالۋ ءۇشىن، سوگىپ، ونداعى بۇيىمداردى تۇسكيىز بەتىنە باسقان. ناتاليا باجەنوۆا تۇسكيىزدى ء«تۇرلى-ءتۇستى گۇلدەردى تەرىپ كەلىپ، ماتا ۇستىنە قوندىرا سالعانداي اسەر بەرەدى. قارا، قىزىل بارقىتتىڭ ۇيلەسىمى اشىق ءتۇستى مارجاندارمەن ۇيلە­سىم تاۋىپ، قولدان تىگىلگەن گۇلدەر سيممەتريا زاڭىن ساقتاي وتىرىپ سالتانات قۇرىپ تۇر»، دەپ سيپاتتايدى. راسىندا دا شام جارىعىمەن شاعىلىسقان تابيعي مارجان تاستار تۇسكيىز بەتىندە ءتۇرلى-ءتۇستى رەڭكتە گۇلدى ورنەكتەر سالىپ جارقىراي، مامىر ايىنىڭ لەبىندەي، جىپ-جىلى كوڭىل كۇي سىيلايدى.

 

الماتى

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار