«پرەزيدەنتىمىز قاسىم-جومارت كەمەل ۇلى توقاەۆ كونستيتۋتسيالىق وزگەرىستەر بويىنشا جالپىۇلتتىق رەفەرەندۋم وتەتىن كۇندى جاريالادى. رەفەرەندۋم 5 ماۋسىمعا بەلگىلەندى.
ەلىمىز تۇبەگەيلى وزگەرىستەردىڭ الدىندا تۇر. ونىڭ نەگىزگى قوزعاۋشى كۇشى – وسى كونستيتۋتسيالىق رەفورمالار بولماق. بۇل رەفورمالاردىڭ ءمانى – ەلىمىزدەگى دەموكراتيانى نىعايتۋ, ازاماتتاردىڭ مەملەكەت ىسىنە ارالاسۋ مۇمكىندىگىن ارتتىرۋ. مىنە, سوندىقتان, پرەزيدەنتىمىز اتا زاڭعا ەنگىزىلگەن وزگەرىستەردى حالىقتىڭ تالقىسىنا سالىپ, كوپشىلىكتىڭ شەشىمىنە سۇيەنىپ قابىلداۋدى كوزدەپ وتىر.
بۇعان دەيىن ايتىلعانداي كونستيتۋتسيالىق وزگەرىستەر اياسىندا سۋپەرپرەزيدەنتتىك باسقارۋ مودەلىنەن الشاقتايمىز. پارلامەنتتىڭ جانە جەرگىلىكتى وكىلدى ورگانداردىڭ ىقپالى ارتا تۇسەدى. قۇقىق قورعاۋ ورگاندارىنا قاتىستى دا شەشۋشى وزگەرىستەر ورىن الماق. مىنە, مۇنىڭ بارلىعى ازاماتتاردىڭ مۇددەسىنىڭ, قۇقىعىنىڭ لايىقتى قورعالۋىنا, ولاردىڭ ءۇنىنىڭ بيىك مىنبەرلەرگە كەدەرگىسىز جەتۋىنە كەپىل بولادى.
پرەزيدەنتىمىز ۇندەۋىندە ەلىمىزدىڭ الدىندا جاڭا جانە ادىلەتتى قازاقستان قۇرۋ مىندەتى تۇرعانىن تاعى ءبىر مارتە ەسكە سالدى. جاريالانعان كونستيتۋتسيالىق رەفورمالار وسى مىندەتتى تابىستى جۇزەگە اسىرۋ ءۇشىن قاجەت ەكەنىن جەتكىزدى جانە ازاماتتاردى الداعى رەفەرەندۋمعا بەلسەندى قاتىسۋعا شاقىردى.
رەفەرەندۋم – بىرلىگىمىزدى ايشىقتايتىن ايتۋلى ساياسي وقيعا. ازاماتتارىمىز مەملەكەت باسشىسى ايقىنداعان ساياسي جاڭعىرۋ باستامالارىن قولدايدى دەپ سەنەمىز.
ەلىمىز امان, جۇرتىمىز تىنىش, بىرلىگىمىز بەكەم بولسىن! جاڭا قازاقستاندى قۇرۋعا بىرگە اتسالىسايىق», دەپ جازدى سەنات توراعاسى.
