قىلمىستىق كودەكس جوباسى قارالادى

كەشە پارلامەنت سەناتىنىڭ توراعاسى قاسىم-جومارت توقاەۆ ماجىلىستە ماقۇلدانعان زاڭ جوبالارىن ءبولۋ تۋرالى سەنات بيۋروسىنىڭ قاۋلىسىنا قول قويدى, دەپ حابارلادى وسى پالاتانىڭ ءباسپاسوز قىزمەتى. اتاپ ايتقاندا, پالاتا كو­مي­تەتتەرى مەن اپپاراتقا قازاقستان رەسپۋبليكاسىنىڭ قىلمىستىق كودەكسىنىڭ جوباسى بەرىلدى. بۇل قۇجات بويىنشا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى باس كوميتەت بولىپ بەلگىلەندى. باس كوميتەتكە سەنات كوميتەتتەرىنىڭ ۇسىنىستارىن جيناقتاپ قورىتۋ جانە 2014 جىلعى 26 مامىرعا دەيىن قورىتىندى ازىرلەۋ تاپسىرىلدى. كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى, سونداي-اق, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا دا باس كوميتەت بولىپ بەلگىلەندى. قارجى جانە بيۋدجەت كوميتەتى زاڭناماعا قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا تۇزەتۋلەر ەنگىزۋ تۋرالى زاڭ جوباسىنا باس كوميتەت بولىپ بەلگىلەندى.