36 سارباز ۋلانىپ قالدى

قىزىلوردا قالاسىنداعى قىزىلجارما اۋىلىندا ورنالاسقان № 55/47 اسكەري ءبولىمىن­دە وقىس وقيعا ورىن الدى. 13 ءساۋىر كۇنى تاڭەرتەڭ ءبىر سارباز كومانديرىنە دەنە قىزۋىنىڭ كوتەرىلىپ, باسى اينالىپ, جۇرەگى اينىپ, السىزدىك بولعانىن ايتقان. جەدەل-جاردەممەن اۋرۋحا­ناعا جەتكىزىلگەندە ساربازدىڭ ۋلانعانى انىقتال­عان. اتالمىش وقي­­­عا­دان سوڭ اسكەري ءبولىم­دە وسىنداي دياگنوزبەن اۋىرعان ساربازداردىڭ سانى ارتقان. اقىرى  35 سارباز بەن 1 وفي­تسەر جۇقپالى اۋرۋلار اۋرۋحاناسىنا تۇسكەن. ساربازداردىڭ ۋلانۋىنا قاتىستى وبلىستىق جۇقپالى اۋرۋلار اۋرۋحاناسىنىڭ باس دارىگەرى قاراگوز بالابەكوۆا مەن № 55/47 اسكەري ءبولىمىنىڭ تاربيە ءىسى جانە الەۋمەتتىك ماسەلەلەر جونىندەگى ورىنباسارى ەۆگەني پاك ءباسپاسوز ءماسليحاتىن وتكىزدى. مۇندا اۋىز تولتىرىپ ايتارلىقتاي اقپارات جاريالانعان جوق. مىنبەردەن ءسوز العان كىسىلەر ساربازداردىڭ نەدەن ۋلانۋى مۇمكىن ەكەنىن, جاپپاي ۋلانۋ سيپاتىنىڭ نەلىكتەن بەلەڭ العانىن ايتپادى. ءدال قازىر تەكسەرۋ جۇمىستارىنىڭ ءجۇرىپ جاتقانىن بايان ەتىپ, ماسەلەنىڭ ءمان-جايى الداعى بىرەر كۇندە بەلگىلى بولاتىنىن جەتكىزدى. – اۋرۋحاناعا العاشقى تۇسكەن ساربازداردىڭ جاعدايى قالىپتى. ال كەيىننەن كەلگەن جاۋىن­گەر­لەردى ەمدەپ جاتىرمىز. بارلىق ساربازدان قاجەتتى سىنامالار الىندى. بۇگىندە ەپيديمولوگ ماماندار تەك­­سە­رۋ جۇمىستارىن جۇرگىزىپ, جاپپاي ۋلانۋدىڭ نەدەن بولعانىن انىق­­تاۋعا كۇش سالۋدا, – دەدى باس دارىگەر. ال اسكەري ءبولىم باسشىسىنىڭ ورىنباسارى ساربازدارعا تاماقتىڭ بەلگىلەنگەن تارتىپتە بەرىلگەنىن, اسپاز­داردىڭ كۇندەلىكتى تەكسەرۋدەن وتەتىنىن ايتتى. سونىمەن قاتار, ۋلان­عان جاۋىنگەرلەردىڭ  بار­لى­عى ءبىر بولىمشەدەن ەمەس ەكەنى جەتكىزىلدى. ۋلانۋ سالدارىنىڭ نەدەن بولعانىن تاپ باسىپ ايتۋ وڭاي ەمەس. ەگەر تاماقتان ۋلانسا, وندا تۇتاس اسكەري ءبولىمنىڭ اۋرۋعا ۇشىراۋى مۇمكىن ەدى. اۋىز سۋدان سەبەپ ىزدەسەڭىز, وندا اسكەري ءبولىم ورنالاسقان قىزىلجارما اۋىلىنىڭ حالقى دا مۇنداي وقىس وقيعادان شەت قالماۋى كەرەك-ءتىن. سون­دىقتان مامانداردىڭ ناقتى ساراپتاماسىن كۇت­كەننەن باسقا لاج بولماي تۇر. باستىسى, بۇدان باسقا ۋلانعان ساربازدار مەن اۋىل تۇرعىندارى جوق. P.S. بەت قاتتالىپ جاتقاندا ءىىم ءباسپاسوز قىزمەتىنەن مىناداي اقپارات كەلىپ ءتۇستى. اۋرۋدىڭ سەبەبى, ءبولىم اۋماعىنا قالالىق سۋ قۇبىرى تورابى ارقىلى كەلەتىن سۋدىڭ سانيتارلىق نورمالارىنا سايكەس كەلمەۋىنەن بولعان. وسىعان بايلانىستى قالالىق گارنيزون اسكەري پروكۋرورى «گورۆودوكانال» اق-نا قاتىستى قولدانىستاعى زاڭناماعا سايكەس ءىس جۇرگىزۋ شەشىمىن قابىلداۋ ماسەلەسىن قاراستىرۋدا. ەرجان بايتىلەس, «ەگەمەن قازاقستان». قىزىلوردا.