2016 جىلى 7 ساۋىردە قاراعاندى وبلىسىنداعى قاراباس ەلدىمەكەنىندە 6505 اسكەري ءبولىمىنىڭ كەزەكتى وقۋ-جاتتىعۋى ءوتىپ جاتتى. بۇعان اسكەرگە ون اي بۇرىن شاقىرىلعان جاۋىنگەرلەر قاتىستى. جاس ساربازدار وعان دەيىن اۆتومات پەن تاپانشادان وق اتىپ, جاۋىنگەرگە كەرەكتى ماشىقتاردى مەڭگەرگەن بولاتىن. ەندى ولار جارىلعىش گراناتا لاقتىرىپ ۇيرەنۋگە كەلگەن ەدى. قۇرامانىڭ شتاب باستىعى پولكوۆنيك قايرات ۇمبەتوۆكە سول كەزدە وقۋ-دايىندىققا جاۋاپتى مامان رەتىندە قاۋىپسىزدىكتى قاداعالاۋ مىندەتتەلدى. العاشقى بولىپ تارازدان كەلگەن قاتارداعى جاۋىنگەر ابزال سۇلتانقۇلوۆ رگد-5 گراناتاسىن قولعا الدى. پارمەن بەرىلگەن سوڭ ول گراناتاسىن قۇلاشتاپ لاقتىردى. الايدا گراناتانى لاقتىرۋعا لايىق كۇشتىڭ جەتكىلىكسىز بولعانى ما, ول الىسقا ۇشپاي, قارسى سوققان جەلدىڭ ەكپىنىمەن وكوپتىڭ جيەگىنە, ۇيىلگەن توپىراققا ءتۇستى. سودان ول دومالاپ, سارباز بەن وفيتسەر تۇرعان تۇسقا جەتتى. ءتارتىپ بويىنشا گراناتا لاقتىرعاننان كەيىن سارباز تۇرعان جەرىندە وتىرا قالۋ كەرەك. ابزال دا قارۋىن ۇستاپ, وتىرا قالدى. جاۋىنگەر ءوزى لاقتىرعان گراناتانىڭ تابانىنىڭ استىنا تۇسكەنىن بىلمەگەن ەدى. ەندى شالت قيمىلداسا, ول 3-4 سەكۋند ىشىندە جارىلادى. سول ساتتە بويىنداعى بار جىگەرىن جيناپ, قاس-قاعىم ساتتە ساردار ساربازدى يتەرە سالىپ, ونى كەۋدەسىمەن جاۋىپ ۇلگەرەدى. ناتيجەسىندە جارىلىس سالدارىنان پولكوۆنيك ۇمبەتوۆ اۋىر جاراقات, دەنەسىنە وتىزدان اسا جارقىنشاق الدى. ال سارباز امان قالدى.
وسى اسقان ەرلىگى ءۇشىن قر تۇڭعىش پرەزيدەنتى – ەلباسىنىڭ جارلىعىمەن 2016 جىلدىڭ 3 مامىرىندا قايرات ۇمبەتوۆكە التىن جۇلدىز جانە «وتان» وردەنىمەن بىرگە, «حالىق قاھارمانى» اتاعى بەرىلدى.
انىقتاما: ۇمبەتوۆ قايرات جارىلقاسىن ۇلى 1977 جىلى 10 قىركۇيەكتە وزبەك كسر تاشكەنت وبلىسى شىرشىق قالاسىندا دۇنيەگە كەلگەن. لەنين وردەنىنىڭ شىرشىق جوعارى تانكىلى كوماندالىق-ينجەنەرلىك ۋچيليششەسىن اياقتاعان.
2001 جىلى اعا لەيتەنانت شەنىندە العاشقى قىزمەت جولىن 6506 اسكەري بولىمىندە روتا كومانديرى بولىپ باستايدى.
2007-2016 جىلدار ارالىعىندا پاۆلودار, وسكەمەن, قاراعاندى قالالارىندا روتا, باتالون كومانديرى, اسكەري ءبولىم كومانديرىنىڭ ورىنباسارى ىسپەتتى قىزمەتتەردى ءساتتى جالعاستىرادى.
قر تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىن تامامداعان سوڭ ءوزى قىزمەتىڭ باستاعان 6506 اسكەري ءبولىمىنىڭ كومانديرى بولىپ تاعايىندالادى.
2020 جىلدىڭ 17 قىركۇيەگىنەن باستاپ قازاقستان رەسپۋبليكاسى ۇلتتىق ۇلانى «باتىس» وڭىرلىك قولباسشىلىعى قولباسشىسىنىڭ ءبىرىنشى ورىنباسارى – شتاب باستىعى لاۋازىمىن اتقارادى.
