اتاپ ايتساق, قر باس سانيتار دارىگەرىنىڭ 2022 جىلعى 13 قاڭتارداعى №2 قاۋلىسىنا وزگەرىس ەنگىزىلىپ وتىر.
«كۆي-گە قارسى, ونىڭ ىشىندە دۇنيەجۇزىلىك دەنساۋلىق ساقتاۋ ۇيىمى ماقۇلداعان ۆاكتسينالارمەن ۆاكتسيناتسيالاۋدىڭ تولىق كۋرسىن قايتا جۇرگىزۋگە جول بەرىلەدى. كۆي-گە قارسى ۆاكتسيناتسيالاۋدىڭ تولىق كۋرسىن قايتا جۇرگىزۋگە ەگىلەتىن ادامنىڭ نەمەسە ونىڭ زاڭدى وكىلدەرىنىڭ پروفيلاكتيكالىق ەگۋلەردىڭ قايتالاما كۋرسىن جۇرگىزۋگە ەرىكتى تۇردە حاباردار ەتىلگەن كەلىسىمىن العاننان كەيىن عانا وسى الگوريتمگە 1-قوسىمشاعا سايكەس نىسان بويىنشا جازباشا تۇردە جول بەرىلەدى», دەلىنگەن قۇجاتتا.
قۇجاتقا سايكەس, كوروناۆيرۋسقا قارسى تولىق قايتا ۆاكتسينالاۋدان ءوتۋ ءۇشىن الدىڭعى ەكپە العان كۇننەن كەيىن كەمىندە 3 اي ۋاقىت ءوتۋى كەرەك.
1 مامىرداعى دەرەككە سايكەس, ەلىمىزدە كوروناۆيرۋسقا قارسى ۆاكتسينالاۋدىڭ تولىق كۋرسىن 9 246 600 ادام الدى. دەنساۋلىق ساقتاۋ ءمينيسترى اجار عينياتتىڭ مالىمەتى بويىنشا, رەۆاكتسينالاۋدان 2,4 ملن ادام وتكەن.
