كەڭەس بارىسىندا قازاقستاننىڭ ماكروەكونوميكالىق دامۋى, «استانا» حالىقارالىق قارجى ورتالىعىنىڭ قىزمەتى, سونداي-اق ينۆەستيتسيالار تارتۋ ماسەلەلەرى تالقىلاندى. ماسەلەن, قازىرگى ۋاقىتتا جاھاندىق جانە وڭىرلىك لوگيستيكالىق تىزبەكتەردىڭ بۇزىلۋى, الەمدىك قارجى جانە شيكىزات نارىقتارىنىڭ قۇبىلۋى, ينفلياتسيالىق قىسىمنىڭ كۇشەيىپ بارا جاتقانى اتاپ ءوتىلدى.
ىقتيمال سىن-تەگەۋرىندەردى جەڭىلدەتۋ ءۇشىن قر ۇكىمەتى قارجى جۇيەسىنىڭ تۇراقتىلىعىن قامتاماسىز ەتۋگە, ينفلياتسيانى باقىلاۋ مەن تومەندەتۋگە, سىرتقى ساۋدا قىزمەتىن ىنتالاندىرۋعا, ەكونوميكا سالالارىن قولداۋعا جانە ينۆەستيتسيا تارتۋعا باعىتتالعان داعدارىسقا قارسى شارالاردى قابىلداپ جاتىر.
كۇردەلى سىرتقى ەكونوميكالىق جاعدايدىڭ سالدارىن جەڭىلدەتۋ ماقساتىندا ەكونوميكانىڭ ناقتى سەكتورى ءۇشىن 2022 جىلعا 1,2 ترلن تەڭگە ءبولۋ كوزدەلگەن. بۇل قاراجات وڭدەۋ ونەركاسىبىن قولداۋعا, اوك-ءتى, كۇرە جولداردى دامىتۋعا, كاسىپكەرلەردىڭ نەسيەلەرى بويىنشا سىياقى مولشەرلەمەسىن سۋبسيديالاۋعا, كەپىلدەندىرۋگە جانە تاعى باسقاسىنا باعىتتالادى.
سەر سۋما چاكرابارتي بۇلاردىڭ ءبارى ءتيىمدى ءارى ۋاقىتىلى شارالار ەكەنىن اتاپ ءوتتى. ونىڭ ايتۋىنشا, قازىرگى ترەندتەردى عانا ەمەس, ولاردىڭ ۇزاققا سوزىلاتىن سالدارىن دا ەسكەرۋ ماڭىزدى. سونىمەن قاتار كەڭەس بارىسىندا احقو-نىڭ 27-29 ماۋسىم ارالىعىندا ايماقتاعى ەڭ ءىرى قارجى كونفەرەنتسيالاردىڭ ءبىرى – Astana Finance Days-ءتى وتكىزۋ جوسپارلارى تالقىلاندى. ونىڭ اياسىندا كورنەكتى حالىقارالىق ساراپشىلاردىڭ قاتىسۋىمەن قازاقستاننىڭ جاڭا ەكونوميكالىق رەفورمالارىن, ينۆەستيتسيالىق مۇمكىندىكتەرى مەن الەۋەتتى ءوسۋ نۇكتەلەرىن تالقىلاۋ جوسپارلانعان.
بۇدان بولەك كەزدەسۋدە قازاقستانعا تىكەلەي شەتەلدىك ينۆەستيتسيالاردى تارتۋ ماسەلەسى تالقىلاندى. ماسەلەن, 2021 جىلدىڭ قورىتىندىسى بويىنشا رەسپۋبليكانىڭ ينۆەستيتسيالار تارتۋدىڭ «پاندەمياعا دەيىنگى» دەڭگەيىنە ورالعانى اتاپ ءوتىلدى. وتكەن جىلى قۇنى 3,6 ملرد دوللار بولاتىن 44 جاڭا ينۆەستيتسيالىق جوبا پايدالانۋعا بەرىلدى.
قازىرگى ۋاقىتتا 54 ملرد دوللارعا وتاندىق جانە شەتەلدىك ينۆەستورلاردىڭ ىسكە اسىرىلعان جانە جوسپارلانعان 761 جوباسىنىڭ پۋلى ازىرلەنىپ, جاريالاندى.
«قازاقستاننىڭ ينۆەستيتسيالىق تارتىمدىلىعىن ارتتىرۋ ءۇشىن ۇكىمەت ينۆەستيتسيالىق ساياساتتىڭ 2026 جىلعا دەيىنگى جاڭا تۇجىرىمداماسىن بەكىتۋ بويىنشا جۇمىس جۇرگىزىپ جاتىر. جاھاندىق ترەندتەردى ەسكەرە وتىرىپ, تەرەڭ وڭدەۋ ونەركاسىبىنە, اگروونەركاسىپتىك كەشەنگە, فارماتسەۆتيكاعا جانە كولىك-لوگيستيكا ينفراقۇرىلىمىنا ينۆەستيتسيالار تارتۋ جۇمىسى جالعاسادى», دەدى كەزدەسۋدى قورىتىندىلاعان پرەمەر-مينيستر.
