ەڭ باستىسى – كونستيتۋتسياعا ەنگىزىلەتىن وزگەرىستەر حالىق تالقىسىنا شىعارىلادى جانە ازاماتتارىمىزدىڭ شەشىمىمەن قابىلدانادى.
پرەزيدەنتىمىز جۇمىس توبى اتا زاڭىمىزدىڭ 33 بابىنا وزگەرىس ەنگىزۋدى ۇسىنعانى تۋرالى ايتتى. بۇل كونستيتۋتسيانىڭ ۇشتەن ءبىر بولىگى دەگەن ءسوز. سوندىقتان وزگەرىستەر – اۋقىمدى ءارى ماڭىزدى. وسىنى ەسكەرە وتىرىپ, مەملەكەت باسشىسى رەسپۋبليكالىق رەفەرەندۋم وتكىزۋدى ۇسىندى.
بۇل – ايتۋلى ساياسي وقيعا دەۋگە تولىق نەگىز بار. سەبەبى مۇنداي رەفەرەندۋم وسىدان 27 جىل بۇرىن وتكىزىلگەن ەدى. ول كەزدە دە قولدانىستاعى اتا زاڭىمىز قابىلدانعان بولاتىن. سودان بەرگى وزگەرىستەر پارلامەنتتىڭ قاتىسۋىمەن عانا جۇزەگە اسىرىلىپ كەلگەنى بەلگىلى.
جاڭا قازاقستاندا قوعامنىڭ پىكىرى – الدىڭعى ورىندا. پرەزيدەنتىمىز ءوزىنىڭ وسى باستاماسى ارقىلى ازاماتتاردى ەل ومىرىنە بەلسەنە ارالاسۋعا شاقىرىپ وتىر. قاسىم-جومارت كەمەل ۇلىنىڭ, رەفەرەندۋم ءاربىر ازاماتتىڭ ەلدىڭ تاعدىرىن ايقىنداۋعا تىكەلەي قاتىسۋ مۇمكىندىگى دەگەنى سوندىقتان. بۇل قادام, ءبىر جاعىنان, بيلىك پەن قوعامنىڭ اراسىنداعى السىرەگەن سەنىمدى نىعايتۋعا دا وڭ ىقپالىن تيگىزەتىنى انىق.
ەلىمىز قاڭتار وقيعاسىن باسىنان وتكەردى. گەوساياسي احۋال دا شيەلەنىسىپ تۇر. مىنە, وسىنداي قيىندىقتارعا قاراماستان, مەملەكەت باسشىسى قازاقستاندى دەموكراتيالىق قۇندىلىقتار نەگىزىندە نىعايتۋعا ءمان بەرىپ وتىر. پرەزيدەنتىمىزدىڭ تىكەلەي باستاماسىمەن قولعا الىنعان رەفورمالاردىڭ دەنى ساياسي ترانسفورماتسيانى كوزدەيدى. كونستيتۋتسيالىق وزگەرىستەردى تۇتاس ۇلتتىڭ تالقىسىنا سالۋ باستاماسىن دا دەموكراتياعا نەگىزدەلگەن ساياسي جاڭارۋدىڭ بەلگىسى دەپ قابىلدايمىن.
بەيبىت يساباەۆ,
سەنات دەپۋتاتى
