شىمكەنت قالاسى پد-ءنىڭ باستىعى قايرات دالبەكوۆ 2021 جىلعى جۇمىس قورىتىندىلارى بويىنشا حالىققا ەسەپ بەرۋ كەزدەسۋىن وتكىزدى. جيىنعا شاھار تۇرعىندارى, ارداگەرلەر مەن قوعام بەلسەندەرى قاتىسىپ, وزدەرىن تولعاندىرعان ساۋالدار مەن ۇسىنىستاردى جولدادى. كەزدەسۋ بارىسىندا وتكەن جىلى قالا اۋماعىندا اتقارىلعان جۇمىستار مەن ءىىم نۇسقاۋىمەن جاڭادان قولدانىسقا ەنگىزىلگەن «قورعاۋ» باعدارلاماسى جايىندا فيلم كورسەتىلدى. سونداي-اق پوليتسيا گەنەرال-مايورى ءۇشىنشى مەگاپوليستەگى جالپى كريمينالدىق جاعداي مەن بيىلعى جىلدىڭ جەدەل-قىزمەتتىك جۇمىس ناتيجەلەرى تۋرالى باياندادى.
ءوز كەزەگىندە پرەزيدەنت ق.توقاەۆتىڭ قىلمىسقا قارسى كۇرەستە بىرقاتار ينديكاتورلاردى تاپسىرعانىن اتاپ ءوتتى. ياعني, مال ۇرلىعى, ەسىرتكى بيزنەسىنە قارسى كۇرەس, جول-كولىك وقيعالارى مەن اۋىر جانە اسا اۋىر قىلمىستاردىڭ اشىلۋ دەڭگەيىنە توقتالدى.
بىلتىر شىمكەنت قالاسى بويىنشا 10 611 قىلمىستىق قۇقىق بۇزۋشىلىق تىركەلگەنىن, بۇل 2020 جىلمەن سالىستىرعاندا 2,5 پايىزعا از ەكەندىگىن مالىمدەدى.
اتاپ ايتقاندا, قالا اۋماعىندا تىركەلگەن ۇرلىقتاردىڭ جالپى سانى 12,0 پايىزعا تومەندەپ, اشىلىمى 15,8 پايىزعا ارتتى. ونىڭ ىشىندە پاتەر ۇرلىعى قىلمىستارىنىڭ سانى 6,3 پايىزعا ازايدى. ينتەرنەت-الاياقتىق بويىنشا 281 قىلمىستىق ءىس تىركەلىپ, ونىڭ 34-ءى سوتقا جولدانعان, 181 ءىس تەرگەۋدە. اتقارىلعان جۇمىستاردىڭ ناتيجەسىندە, پوليتسيا قىزمەتكەرلەرى ينتەرنەت-الاياقتىقپەن اينالىسقان 5 ادامنان تۇراتىن قىلمىستىق توپتى قۇرىقتادى.
قوعام دەرتىنە اينالعان ەسىرتكى قىلمىسى بويىنشا وتكەن جىلى 350 قۇقىق بۇزۋشىلىق جايتى انىقتالدى. جەدەل-ىزدەستىرۋ ءىس-شارالارى ناتيجەسىندە, 24 كۇدىكتىدەن قۇرالعان 5 قىلمىستىق توپ قۇرىقتالدى. وسىعان بايلانىستى 2021 جىلى زاڭسىز اينالىمنان 90 كەلىگە جۋىق ەسىرتكى زاتتارى تاركىلەنگەنىن اتاپ ءوتتى.
بۇدان وزگە, مەملەكەت باسشىسىنىڭ تىكەلەي تاپسىرماسىمەن ەنگىزىلگەن سەرۆيستىك پوليتسيا مودەلىنىڭ مىندەتتەرىنە توقتالدى.
بىرىنشىدەن, سەرۆيستىك پوليتسيا حالىققا قولايلى قىزمەت پەن قىلمىستىڭ الدىن الۋ جۇمىستارىن جانداندىرۋعا ارنالعان. ەكىنشىدەن, ءتارتىپ ساقشىلارىن حالىققا جاقىنداتادى. ۇشىنشىدەن, پوليتسيانىڭ ساپالى قىزمەت جاساۋىن قامتاماسىز ەتەدى. تورتىنشىدەن, ەستۋشى مەملەكەت پەن جۇرتقا جاقىن پوليتسيا قاعيداتىن ودان ءارى دامىتادى. قالا اكىمىنىڭ وكىمىمەن «سەرۆيستىك پوليتسيا» بويىنشا ۆەدومستۆولىق توپتىڭ قۇرامى مەن مۇشەلەرى بەكىتىلىپ, قازىرگى تاڭدا تۇراقتى جۇمىستار اتقارىلۋدا, دەدى مەگاپوليستىڭ باس پوليتسەيى.
سونداي-اق وتكەن جىلدىڭ وزىندە قالا اۋماعىندا 435 ءجول-كولىك وقيعاسى تىركەلىپ, سالدارىنان 76 ادام قازا تاپتى. 400-گە جۋىق ازامات اۋىر دەنە جاراقاتىمەن ەمحاناعا جەتكىزىلگەن. جالپى, جول-كولىك وقيعالارىنىڭ ءجيى ورىن الۋىنا جۇرگىزۋشىلەردىڭ جىلدامدىقتى شامان تىس ارتتىرىپ, قارسى جولاققا شىعۋى, قاۋىپسىزدىك بەلدەۋىن تاقپاي, ماس كۇيىندە تىزگىنگە وتىرۋى سەبەپ. وسى ورايدا, ءىىم-ءنىڭ نۇسقاۋىمەن 20 ساۋىردەن باستاپ مەگاپوليس اۋماعىندا «قورعاۋ» ارنايى باعدارلاماسى ىسكە قوسىلدى. قازىرگى تاڭدا اتالعان قوسىمشا دەپارتامەنتتىڭ جەدەل باسقارۋ ورتالىعىنا جانە پاترۋلدىك پوليتسيا قىزمەتكەرلەرىنىڭ پلانشەتتەرىنە قوسىلعان. ياعني, پلانشەت ارقىلى پوليتسيا قىزمەتكەرى 8 شاقىرىم اۋماقتاعى جول ەرەجەسىن ۇنەمى بۇزاتىن جۇرگىزۋشىلەردى انىقتاۋعا مۇمكىندىك العانىن ايتتى.
باس پوليتسەيدىڭ ەسەبىنەن سوڭ ازاماتتاردىڭ سۇراقتارى مەن وتىنىشتەرىنە كەزەك بەرىلدى. قالا تۇرعىندارى مەن قوعام بەلسەندىلەرى اشىق ميكروفون الدىندا وزەكتى ماسەلەلەرىن جەتكىزىپ, شەشىمىن تىڭدادى. ونىڭ ىشىندە مەگاپوليس كوشەلەرىندەگى جول قاۋىپسىزدىگى, ۋچاسكەلىك پوليتسيا قىزمەتى, ينتەرنەت الاياقتار مەن ەسىرتكى جارناماسىنا قاتىستى بىرقاتار ساۋالدارعا جاۋاپ بەرىلدى. اتاپ ايتقاندا, قاراتاۋ اۋدانىنىڭ تۇرعىندارى مەكتەپ كوشەلەرىنە جول بەلگىلەرى مەن «سەرگەك» جۇيەسىنە قوسىلعان بەينەكامەرالاردى ورناتۋدى سۇرادى. سەبەبى بالالاردىڭ جول-ءجۇرۋ قاۋىپسىزدىگى اتا-انالاردى الاڭداتىپ وتىرعانىن جەتكىزدى.
ءوز كەزەگىندە قايرات دالبەكوۆ ءىىم-ءنىڭ تاپسىرماسىمەن الداعى ۋاقىتتا قالا اۋماعىنا تاعى 800 جاڭا بەينەكامەرا ورناتىلاتىنىن, اتالعان اۋدان تۇرعىندارىنىڭ ءوتىنىشى ەسكەرىلەتىنىن ايتتى.
سونداي-اق «نۇرسات», «كۇن شىعىس» شاعىن اۋدانىنىڭ ازاماتشالارى اۆتوتۇراق ماسەلەسى جايىندا ساۋالدارىنا جاۋاپ الدى.
