قازاقستان مەن گرۋزيا اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولدى. بۇل ەكى ەل اراسىنداعى ۇكىمەتارالىق كوميسسيانىڭ 11-ءشى وتىرىسى. شارانى ۇيىمداستىرىپ, جىلى قابىلداعان گرۋزين تاراپىنا قايىربەك وسكەنباەۆ العىس ءبىلدىردى.
«سوڭعى 16 جىلدا گرۋزيادان قازاقستانعا جالپى تىكەلەي ينۆەستيتسيا اعىنى 285 ميلليون دوللاردان استى, ال قازاقستان گرۋزيا ەكونوميكاسىنا 495,3 ميلليون دوللار ينۆەستيتسيالادى. وتكەن جىلى ەكى ەل اراسىنداعى تاۋار اينالىمى 88 ميلليون دوللاردان استى. جىل باسىنان بەرى وڭ ديناميكا ساقتالىپ وتىر», دەدى ق.وسكەنباەۆ.
ول سونداي-اق ەكى ەل اراسىنداعى ءوزارا ساۋدا-ساتتىقتى ارتتىرۋ ءۇشىن ايتارلىقتاي الەۋەت بار ەكەنىن اتاپ ءوتتى. قازاقستاندىق كومپانيالار مەتاللۋرگيا, مۇناي-حيميا, تاماق جانە ماشينا جاساۋ, سونداي-اق فارماتسەۆتيكا سىندى بىرقاتار سالادا وڭدەلگەن تاۋارلار ەكسپورتىن ارتتىرۋعا دايىن. جالپى ەكسپورتتىق الەۋەت 170 ميلليون دوللارعا باعالانادى.
«ونەركاسىپ سالاسىندا گرۋزيندىك ارىپتەستەرىمىزدى ىنتىماقتاستىققا جانە قازاقستاندا بىرلەسكەن كاسىپورىندار قۇرۋعا شاقىرامىز. ءبىز قولداۋ كورسەتۋگە دايىنبىز. بۇگىنگى تاڭدا ەلىمىزدە گرۋزيانىڭ قاتىسۋىمەن 248 بىرلەسكەن كاسىپورىن جۇمىس ىستەيدى», دەدى قازاقستان دەلەگاتسياسىن باستاعان قايىربەك وسكەنباەۆ.
قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى قازىر قازاقستاندا بەلسەندى يندۋستريالىق-يننوۆاتسيالىق ساياسات جۇرگىزىلىپ جاتقانىن, ال دامۋدىڭ باسىم باعىتتارىنىڭ ءبىرى بىرلەسكەن جوعارى تەحنولوگيالىق وندىرىستەردى ەنگىزۋ بولىپ تابىلاتىنىن اتاپ ءوتتى.
«الەمدەگى كۇردەلى گەوەكونوميكالىق جاعدايعا قاراماستان, قازاقستاننىڭ ينۆەستيتسيالىق احۋالى مەن ماكروەكونوميكالىق جاعدايى تۇراقتى جانە ينۆەستورلار تاراپىنان سەنىمگە يە», دەدى ول.
پلەنارلىق وتىرىس بارىسىندا قاتىسۋشىلار قازاقستان مەن گرۋزيا اراسىنداعى كولىك, كوممۋنيكاتسيا, IT جانە يننوۆاتسيالار, اۋىل شارۋاشىلىعى, مادەنيەت, سپورت جانە تۋريزم سياقتى سالالارداعى ىنتىماقتاستىقتىڭ جاي-كۇيى مەن دامۋ پەرسپەكتيۆالارىن تالقىلادى.
اتاپ ايتقاندا, ءداستۇرلى تۇردە ترانسكاسپي حالىقارالىق كولىك باعىتىن (حتر) دامىتۋ پەرسپەكتيۆالارى قاراستىرىلدى. قايىربەك وسكەنباەۆ بۇل باعىتتا قازاقستاندىق ەكسپورتتىڭ ۇلعاياتىنىن, ونىڭ ىشىندە قىتايدان ءترانزيتتىڭ كولەمى ۇلعايا بەرەتىنىن, وسى ورايدا گرۋزيا اۋماعى ارقىلى ءترانزيتتىڭ ىڭعايلىلىعىن ساقتاي وتىرىپ, ىنتىماقتاستىقتى ودان ءارى دامىتۋ كەرەكتىگىن اتاپ ءوتتى.
سونىمەن قاتار, ەكى تاراپ دەنساۋلىق ساقتاۋ سالاسىندا ىنتىماقتاستىق, اتاپ ايتقاندا, ءبىلىم جانە تاجىريبە الماسۋ بويىنشا ۇزاق مەرزىمدى ىنتىماقتاستىقتى نىعايتۋ جانە كەڭەيتۋ بويىنشا ۇسىنىستاردى قاراستىردى.
ۇكىمەتارالىق كوميسسيانىڭ 11-ءشى وتىرىسىنىڭ قورىتىندىسى بويىنشا قايىربەك وسكەنباەۆ پەن لەۆان داۆيتاشۆيلي ءتيىستى حاتتاماعا قول قويدى. سونىمەن قاتار شارا اياسىندا «قازاقستان رەسپۋبليكاسىنىڭ مادەنيەت جانە سپورت مينيسترلىگى مەن گرۋزيانىڭ مادەنيەت, سپورت جانە جاستار مينيسترلىگى اراسىنداعى سپورت سالاسىنداعى ءوزارا تۇسىنىستىك تۋرالى» مەموراندۋم, سونداي-اق ستاندارتتاۋ جانە مەترولوگيا سالاسىنداعى ىنتىماقتاستىق تۋرالى كەلىسىمگە قول قويىلدى.
