قازاقستان • 29 ءساۋىر، 2022

ابىروي بيىگىندەگى اسسامبلەيا

كەنشىلەر استاناسىنداعى «دوستىق ۇيىندە» وتكەن «جاڭا قازاقستان – مىزعىماس بىرلىك مەكەنى» اتتى دوڭگەلەك ۇستەل بارىسىندا ەتنومادەني بىرلەستىكتەردىڭ وكىلدەرى مەن جۇرتشىلىق اشىق ديالوگ فورماتىندا ەتنوسارالىق ءوزارا ءىس-قيمىلدى ودان ءارى نىعايتۋ جانە الەۋمەتتىك پروبلەمالاردى شەشۋ جولدارى تۋرالى پىكىرلەرىن ورتاعا سالدى.

قايرات ءابىلدا

بىرلىك كۇنى جانە قازاقستان حالقى اسسامبلەياسىنىڭ ححح جانە ءحححى سەسسيالارىنىڭ قارساڭىندا ۇيىمداستىرىلعان بۇل ءىس-شاراعا ارنايى قاتىسقان وبلىس اكىمى جەڭىس قاسىمبەك ەتنومادەني بىرلەستىكتەردىڭ بەيبىتشىلىك پەن كەلىسىمدى ساقتاۋ ماقساتىندا جۇرگىزىپ جاتقان جۇمىستارىنىڭ ماڭىزدىلىعىن اتاپ ءوتتى.

– الەمدەگى قازىرگى جاعداي ءبىزدىڭ ەڭ باستى جەتىستىگىمىز بەيبىتشىلىك ەكەنىنە بۇرىنعىدان بەتەر كوزىمىزدى جەتكىزدى. ءبىز مۇنى بولاشاق ۇرپاق ءۇشىن ساقتاۋىمىز كەرەك. كوپۇلتتى ەل ءۇشىن اسسامبلەيانىڭ ءرولىن باعالاماۋ نەمەسە اسىرا باعالاۋ قيىن. ءبىز – ۇلكەن وتباسىمىز. كەز كەلگەن وتباسىندا كەيدە ماسەلەلەر تۋىندايدى. بىراق ەتنومادەني بىرلەستىكتەردىڭ ارقاسىندا ولاردىڭ بارلىعى جەدەل شەشىلۋدە. قحا-نىڭ وڭىردەگى الەۋمەتتىك-ساياسي جاعداي مەن ەكونوميكالىق تۇراقتىلىققا قوسقان ۇلەسى زور، – دەگەن ول الداعى ۋاقىتتا دا اسسامبلەيانىڭ بىرەگەي الاڭقايىن بەلسەندى تۇردە پايدالانۋ كەرەكتىگىن اتاپ ءوتتى.

ال قاراعاندى وبلىستىق قحا انالار كەڭەسىنىڭ مۇشەسى، ى.التىنسارين توسبەلگىسىنىڭ يەگەرى كۇلاش تولەۋحانوۆا وسكەلەڭ ۇرپاق تاربيەسى، وتباسى ينستيتۋتىن ساقتاۋ، جۇمىسقا ورنالاستىرۋ جانە جاڭا جۇمىس ورىندارىن قۇرۋ ماسەلەلەرى ءسوز بولعان جيىندا اقىلدى جانە تاربيەلى بالالاردىڭ كەز كەلگەن ەلدىڭ بىرلىگى مەن يگىلىگىنىڭ نەگىزى ەكەنىنە باسا ءمان بەردى.

– ءبىزدىڭ ەلىمىزدىڭ بولاشاعى جاس ۇرپاقتى قالاي تاربيەلەيتىنىمىزگە بايلانىستى بولادى. سوندىقتان ءبىز بالالاردى تاربيەلەۋ ىسىنە مەكتەپتەردە دە، وتباسىندا دا ۇلكەن ءمان بەرۋىمىز كەرەك. ۇلتتىق ادەت-عۇرىپتار مەن داستۇرلەرگە ساي تاربيەلەنگەن جان-جاقتى دامىعان جاستار عانا جارقىن بولاشاق قۇرا الادى، – دەدى ك.تولەۋحانوۆا.

باسقوسۋدا نزم وقۋشىلارى مەديتسينا، ەكولوگيا سالاسىنداعى جاڭالىقتارىمەن جانە جەتىستىكتەرىمەن ءبولىستى. سونداي-اق كۇنتۋ سەرىكجان ەسىمدى سپيكەر الەۋمەتتىك جەلىلەردى تەك يگى ىستەر جاساۋ ماقساتىندا پايدالانۋعا شاقىردى.

دوڭگەلەك ۇستەل جۇمىسىنىڭ سوڭىنا تامان ءوڭىردىڭ قوعامدىق-ساياسي ومىرىنە بەلسەندى قاتىسقانى جانە جاڭا قازاقستاندىق قوعامدى قۇرۋعا قوسقان ۇلەسى ءۇشىن ۆيلەن مولوتوۆ-لۋچانسكي، ۆيتالي تۆاريوناس، دەسپينا كاساپيدي، ۆيكتور كيستۋ، ليليا كيم، راميس، ميحايل كونوۆالوۆ، رۋستام بۋزياكوۆ سىندى ەتنومادەني قوعامدىق بىرلەستىكتەرىنىڭ توراعالارى مەن مۇشەلەرىنە وبلىس اكىمىنىڭ اتىنان «العىس حاتتار» تابىس ەتىلدى.

ال دوڭگەلەك ۇستەل ءىس-شاراسىن قازاقستان حالقىنىڭ بىرلىگى كۇنىنە ارنالعان بالالار سۋرەتتەرىنىڭ كورمەسى تۇيىندەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز