«قوس ازاماتتىققا جول بەرىلمەيتىندىكتەن, مەندە رەسەيلىك تولقۇجات جوق. مەنىڭ رەسەي تەننيس فەدەراتسياسىمەن دە ەشقانداي بايلانىسىم جوق. مەن – قازاقپىن! التى جىلداي ۋاقىت بويى مەن ءوز ەلىمنىڭ نامىسىن قورعاپ كەلەمىن. مەن دەۆيس كۋبوگىندا, ازيا جانە وليمپيا ويىندارىندا قازاقستان اتىنان شىعاتىنىمدى ماقتان ەتەمىن», دەدى الەكساندر بۋبليك.
بۋبليك جۋرناليستەردىڭ قيتۇرقى سۇراعىنا وسىلايشا ناقتى جاۋاپ قايتاردى. مۇنداي سۇراقتىڭ قويىلۋى دا زاڭدى. ويتكەنى تەننيسشى 1997 جىلى رەسەيدىڭ گاتچينا قالاسىندا دۇنيەگە كەلگەن. ال 2016 جىلدان باستاپ قازاقستان قۇراماسى ساپىندا ونەر كورسەتىپ كەلەدى. ۇلكەن سپورتتا ايتارلىقتاي ناتيجەگە قول جەتكىزبەگەن, سپورتشى رەتىندە ءالى تانىلا قويماعان 19 جاستاعى جىگىتكە قازاقستان تاراپىنان ۇلكەن سەنىم كورسەتىلدى. ونىڭ مىقتى تەننيسشى بولىپ قالىپتاسۋىنا ءبىزدىڭ ەلدە بارلىق جاعداي جاسالدى. ناتيجەسى دە كوپ كۇتتىرگەن جوق. 2016 جىلى الەمدىك رەيتينگتە 200-ورىندا تۇرعان بۋبليك التى جىلدىڭ ىشىندە ۇزدىك 40 تەننيسشىنىڭ قاتارىنا قوسىلدى. ءتىپتى الەمنىڭ مىقتى سپورتشىلارى بۋبليكپەن ساناساتىن بولدى. «ۇلكەن دۋلىعا» تۋرنيرلەرىنىڭ جەكەلەگەن باسەكەسىندە ول جىل سايىن ءۇشىنشى كەزەڭگە دەيىن جەتىپ جۇرگەن بولسا, بيىل جۇپتىق باسەكەدە العاش رەت فرانتسيا اشىق بىرىنشىلىگىنىڭ فينالىندا ونەر كورسەتتى.
سونداي-اق ول قازاقستان قۇراماسى ساپىندا دا كوپتەگەن ناتيجەگە قول جەتكىزدى. ماسەلەن, بۋبليك باستاعان جىگىتتەر جىل سايىن دەۆيس كۋبوگىنىڭ فينالدىق كەزەڭىندە باق سىنايدى. 2018 جىلى جازعى ازيا ويىندارىندا دەنيس ەۆسەەۆپەن بىرگە جۇپتىق سىندا كۇمىس مەدال جەڭىپ السا, بىلتىر العاش رەت ەل نامىسىن توكيو وليمپياداسىندا قورعادى.
التى جىل بويى قازاقستاننىڭ نامىسىن قورعاپ, ۇلكەن جەتىستىككە جەتىپ كەلە جاتقان الەكساندر بۋبليك الداعى ۋاقىتتا دا ەلدىڭ مەرەيىن اسقاقتاتا بەرەتىنى انىق. «قازاق» ەكەنىن الەمگە ايگىلەگەن تەننيسشى تۋعان ەلىن جەتىستىگىمەن قۋانتا بەرسىن دەپ تىلەيمىز.
