ايتا كەتەيىك, تەحنولوگيالىق كلاستەر ءاليحان بوكەيحان ۋنيۆەرسيتەتىنىڭ نەگىزىندە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, Astana Hub حالىقارالىق IT-ستارتاپتار تەحنوپاركى مەن ۇلتتىق بانكتىڭ «تولەم جانە قارجىلىق تەحنولوگيالاردى دامىتۋ» ورتالىعىنىڭ قولداۋىمەن قۇرىلىپ وتىر.
Abai IT-Valley تەحنوكلاستەرى وڭىردەگى IT ماماندارىنىڭ باسىن قوساتىن, ءارى الدىڭعى قاتارلى وندىرىستىك-يننوۆاتسيالىق تەحنولوگيالاردى ازىرلەۋگە جانە جۇزەگە اسىرۋعا مۇمكىندىكتەر اشاتىن تەحنولوگيالىق ورتالىق رەتىندە قىزمەت اتقارادى. تەحنوكلاستەردى تولىعىمەن جابدىقتاپ, بىلىكتى ماماندارمەن قامتاماسىز ەتكەن ءاليحان بوكەيحان ۋنيۆەرسيتەتىنىڭ باسشىلىعى.
ءباسپاسوز ءماسليحاتىندا ايتىلعانداي, تەحنوكلاستەردىڭ رەسمي اشىلۋ سالتاناتى مامىر ايىنا جوسپارلانعان. ال قازىرگى ۋاقىتتا كلاستەر اياسىندا جۇمىس ىستەۋگە نيەتتى ماماندار مەن IT سالاسى بويىنشا ءبىلىم الۋعا ۇمتىلاتىن جاستاردى ءبىر ورتالىققا جيناۋ, جۇمىلدىرۋ جانە وقىتۋ جۇمىستارى جۇرگىزىلىپ جاتىر.
كەشەگى باسقوسۋدا ۋنيۆەرسيتەت باسشىلىعى تەحنوكلاستەردىڭ جوبا مەنەدجەرى اسحات بەيسەمباەۆ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ اقپاراتتىق جانە اقپاراتتىق-كوممۋنيكاتسيالىق تەحنولوگيالاردى دامىتۋ دەپارتامەنتىنىڭ ديرەكتورى دارحان احمەديەۆ, «Astana Hub حالىقارالىق IT-ستارتاپتار تەحنوپاركى» كورپوراتيۆتىك قورىنىڭ باس ديرەكتورى ماعجان ماديەۆ, ۇلتتىق بانكتىڭ «تولەم جانە قارجىلىق تەحنولوگيالاردى دامىتۋ ورتالىعى» اق باسقارما توراعاسى بينۋر جالەنوۆ ۇسىنىس-پىكىرلەرىن ورتاعا سالدى. سپيكەرلەر تەحنوكلاستەردى قۇرۋداعى ماقسات-مىندەتتەردى جانە كلاستەردىڭ جۇمىس باعىتتارىن تانىستىردى.
– اتالعان جوبادا جاستاردىڭ ءبىلىم الۋى ءۇشىن قاجەتتى جاعدايدىڭ بارلىعى جاسالعان. بىلىمگە قۇشتار جاستاردا تەك ىنتا, جىگەر بولسا, بولعانى. ايتا كەتەرلىگى, مۇندا بەلگىلى تالاپتارعا بايلانىستى بىلىكتى, ءبىلىمدى ماماندار جۇمىس ىستەيدى. الدىمىزعا قويعا جوسپارلار دا كوپ, – دەيدى جوبا مەنەدجەرى اسحات بەيسەمباەۆ.
سپيكەرلەر, سونىمەن قاتار تەحنوكلاستەردى نە سەبەپتى اباي ەسىمىمەن اتاعاندارىن ءتۇسىندىردى. ايتۋلارىنشا, كلاستەر حاكىم ابايدىڭ تۋعان جەرىندە اشىلىپ وتىر, ونىڭ ۇستىنە كلاستەردىڭ قۇرىلۋ مەرزىمى پرەزيدەنت قاسىم-جومارت توقاەۆتىڭ اباي وبلىسىن قۇرۋ تۋرالى شەشىمىمەن تۇسپا-تۇس كەلگەن. البەتتە, اباي تۇلعاسى قاشاندا ءبىلىم جانە عىلىممەن, اعارتۋعا, جاڭالىققا ۇمتىلۋمەن بايلانىستى بولعاندىقتان, ورتالىقتى اباي ەسىمىمەن اتاۋ جونىندە شەشىم قابىلدانعان.
ءباسپاسوز ءماسليحاتىنا بۇقارالىق اقپارات قۇرالدارىنىڭ وكىلدەرى جانە شاقىرىلعان قوناقتارمەن قاتار, سەمەي قالاسىنىڭ جوعارعى, ورتا-كاسىپتىك وقۋ ورىندارىنىڭ جۇزدەگەن ستۋدەنتتەرى قاتىستى. جاقىن ارادا ستۋدەنتتەرگە Astana Hub تەحنوپاركىمەن بىرلەسكەن تەگىن IT كۋرستارى وتكىزىلەدى. قىسقا جانە ورتا مەرزىمدى وقۋ كۋرستارىندا جاستار زاماناۋي باعدارلامالاۋ تىلدەرىن, سونىمەن قاتار IT-ستارتاپتاردى ازىرلەۋ, جۇزەگە اسىرۋ جانە العا جىلجىتۋ جولدارىن ۇيرەنەدى. العاشقى كۋرسقا قازىردىڭ وزىندە 100 ادام جازىلدى.
الداعى ۋاقىتتا Abai IT-Valley تەحنولوگيالىق كلاستەرىنىڭ نەگىزىندە ارنايى كورپوراتيۆتى قور قۇرىلىپ, زاماناۋي IT جوبالاردى قارجىلاندىراتىن ينۆەستيتسيا كوزدەرى تارتىلماق. بۇل كلاستەر نەگىزىندەگى وقىتۋ كۋرستارىندا ءبىلىم العان جاستارعا ءوز بىلىمدەرىن ءىس جۇزىنە اسىرىپ, IT-ستارتاپتارىن ىسكە اسىرۋعا مۇمكىندىكتەر اشادى.
