اقمولا وبلىسىنىڭ ەت كومبيناتى ونىمدەرىن رەسەي نارىعىنا شىعاردى

اقمولا وبلىسىنىڭ ەڭ ءىرى ەت كومبيناتى كەدەندىك وداق اياسىندا جارتىلاي دايىن ءونىمىنىڭ ءبىرىنشى پارتياسىن رەسەي نارىعىنا شىعاردى. بۇل تۋرالى 24.kz حابارلادى. قازىرگى تاڭدا ەت كومبيناتىنىڭ وندىرىستىك قۋاتى 60 پايىز قۇرايدى. الداعى جىلى بۇل كورسەتكىشتى 100 پايىزعا جەتكىزۋ جوسپارلانۋدا. مەكەمە باسشىلىعى كاسىپورىننىڭ ەۋرازيالىق ەكونوميكالىق قاۋىمداستىق ەلدەرى اراسىندا دا باسەكەگە قابىلەتتى ەكەنىن ايتىپ وتىر. اقمولا وبلىسى تسەلينوگراد اۋدانىندا ورنالاسقان ەت كومبيناتى ءوز جۇمىسىن 2010 جىلى باستاعان. كۇن سايىن كاسىپورىن  5-تەن 7 تونناعا دەيىن دايىن ءونىم شىعارادى. مۇندا ەت, شۇجىقپەن قاتار جارتىلاي ازىرلەنگەن ونىمدەر دە سۇرىپتالعان. ولار بارلىق حالىقارالىق ستاندارتتارعا ساي جاسالادى. گەرمانيادان اكەلىنگەن جاڭا تەحنولوگيالار كاسىپورىنعا جوعارى ساپالى ونىمدەر شىعارۋعا مۇمكىندىك بەرەدى.«ءبىز مالدى ساتىپ الىنعاننان كەيىن ونى مىندەتتى تۇردە دارىگەر قاراۋىنان وتكىزەمىز. سوعىم سويۋ حالال ستاندارتى بويىنشا جۇزەگە اسىرىلادى. ءبىز «ەكولوگيالىق تازا ءونىم» دارەجەسىنە يە بولدىق», – دەيدى ەت كومبيناتى ديرەكتورىنىڭ ءوندىرىس بويىنشا ورىنباسارى تۇسىپبەك بوكين. كاسىپورىن 100-دەن استام اۋىل تۇرعىندارىن جۇمىسپەن قامتاماسىز ەتىپ وتىر. ولار سيىر, قوي مەن تاۋىق ەتىن ءبولىپ, تازالاپ, سۇرىپتايدى. قىزمەتىنە كىرىسۋدەن بۇرىن جۇمىسشىلاردىڭ بارلىعى ارنايى تەحنيكا ارقىلى دەزينفەكتسيالاۋدان وتەدى. قازىرگى تاڭدا اتالمىش كاسىپورىن استانا, الماتى, قاراعاندى مەن اقتاۋ قالالارىن ءوز ونىمدەرىمەن قامتاماسىز ەتۋدە. مەكەمە باسشىلىعى كەلەسى جىلدان باستاپ ونىمدەرىن وزگە دە ايماقتارعا جەتكىزۋدى ماقسات تۇتىپ وتىر. ايدار ورىسباەۆ. دەرەككوز: 24.kz. فوتو: Strategy2050.kz.