ءمينيستردىڭ ايتۋىنشا, 2017-2021 جىلدار ارالىعىندا ىشكى گاز تۇتىنۋ 4,8 ميلليارد تەكشە مەترگە, 13,8-دەن 18,6 ميلليارد تەكشە مەترگە دەيىن وسكەن. سونىمەن بىرگە ونىڭ ايتۋىنشا, گاز تۇتىنۋدىڭ ورتاشا جىلدىق ءوسىمى شامامەن جەتى پايىز.
«قازاقستاندا 2025 جىلعا قاراي گاز تاپشىلىعى بولۋى مۇمكىن. الايدا تاۋ-كەن مەتاللۋرگيا كاسىپورىندارى كومىردەن گازعا بەلسەندى كوشەتىن بولسا, وندا تاپشىلىقتىڭ كولەمى دە ۇلعايادى. وسى جاعدايلاردا ەلدىڭ رەسۋرستىق بازاسىن تولىقتىرۋ تۋرالى ماسەلە تۋىندايدى, ول ءۇشىن گازدى بارلاۋ, ءوندىرۋ جانە قايتا وڭدەۋ سياقتى بارلىق كەزەڭدەردە گاز جوبالارى ءۇشىن پرەفەرەنتسيالار قاجەت. سونىمەن قاتار جەر قويناۋىن پايدالانۋشىلار ءۇشىن ينۆەستورلاردى ىنتالاندىرۋ باعاسىن بەرۋ ماسەلەسى پىسىقتالىپ جاتىر», دەدى اقشولاقوۆ سەناتتا وتكەن ۇكىمەت ساعاتىندا.
مينيستر 2021 جىلدىڭ قورىتىندىسى بويىنشا شيكى گاز ءوندىرۋ 53,8 ميلليارد تەكشە مەترگە جەتكەنىن ايتتى. ونىڭ ىشىندە ءۇش ءىرى جوبانىڭ ۇلەسىنە گاز ءوندىرۋدىڭ 81 پايىزى تيەسىلى. اقشولاقوۆ اتاپ وتكەندەي, وندىرىلگەن جالپى گازدىڭ 32 پايىزى قىسىمدى ۇستاپ تۇرۋ ءۇشىن كەرى ايدالدى, 20 پايىزى جەر قويناۋىن پايدالانۋشىلاردىڭ ءوز قاجەتتىلىكتەرىنە, ەلەكتر ەنەرگياسىن وندىرۋگە جانە كادەگە جاراتۋعا پايدالانىلدى, سونداي-اق 48 پايىزى تاۋارلىق گازعا قايتا وڭدەلدى.
«2030 جىلعا قاراي بولجامدىق دەرەكتەرگە سايكەس شيكى گاز ءوندىرۋ 87,1 ميلليارد تەكشە مەتردى قۇرايدى, ونىڭ ىشىندە ءۇش ءىرى جوبانىڭ ءوندىرۋ ۇلەسى 83 پايىز. سونىمەن قاتار وندىرىلگەن 87,1 ميلليارد تەكشە مەتر گازدىڭ تەك 42 ميلليارد تەكشە مەترى تاۋارلىق گازعا قايتا وڭدەلەتىن بولادى. قالعان گاز قايتادان قاباتقا ايدالادى (47 پايىز) جانە ءوز مۇقتاجدارىنا پايدالانىلادى (15 پايىز). قاراشىعاناق جوباسى بويىنشا وندىرىلەتىن گازدىڭ 19 ميلليارد تەكشە مەترىنىڭ جارتىسىنا جۋىعى قايتادان قاباتقا ايدالادى», دەپ تولىقتىردى ۆەدومستۆو باسشىسى.
اقشولاقوۆ پرەزيدەنتتىڭ تاپسىرماسى بويىنشا شەتەلدىك ينۆەستورلار كەڭەسىمەن بىرلەسىپ جەر قويناۋىن پايدالانۋعا ارنالعان جاقسارتىلعان مودەلدىك كەلىسىمشارتتى ازىرلەۋ شەڭبەرىندە گازدى ءوندىرۋ جانە وڭدەۋ كەزەڭىندە سالىقتىق بوساتۋ جانە باسقا دا ىنتالاندىرۋ شارالارى تۇرىندە گاز جوبالارى ءۇشىن فيسكالدىق پرەفەرەنتسيالار كوزدەلگەن.
ول سونداي-اق ەلىمىزدە گاز سالاسىن دامىتۋدىڭ كەشەندى جوسپارى ازىرلەنگەنىن, وندا پەرسپەكتيۆالى گاز ۋچاسكەلەرىن دامىتۋدىڭ بىرقاتار ءىس-شاراسى كوزدەلگەنىن اتاپ ءوتتى.
