كونفەرەنتسيانىڭ اشىلۋىندا ءسوز سويلەگەن دەنساۋلىق ساقتاۋ ءمينيسترى اجار عينيات شارانىڭ شىعىس ەۋروپا مەن ورتالىق ازيا ەلدەرىنىڭ دەنساۋلىق ساقتاۋ تەحنولوگيالارىن باعالاۋ سالاسىنداعى ىنتىماقتاستىعىن دامىتۋعا قۇندى ۇلەس قوساتىنىن اتاپ ءوتتى.
«دەنساۋلىق ساقتاۋ تەحنولوگيالارىن باعالاۋ (دستب) – حالىقتى ساپالى مەديتسينالىق كومەكپەن قامتاماسىز ەتۋدىڭ ماڭىزدى كەزەڭدەرىنىڭ ءبىرى, ول دەنساۋلىق ساقتاۋدىڭ نەعۇرلىم كلينيكالىق جانە ەكونوميكالىق ءتيىمدى تەحنولوگيالارىن قولدانۋ ءۇشىن ىرىكتەۋگە مۇمكىندىك بەرەدى. بۇگىندە قازاقستان وسى سالادا تابىستى جۇمىس تاجىريبەسىنە يە, سونداي-اق GIN, ISPOR, HTAi جانە INAHTA حالىقارالىق ۇيىمدارىنىڭ ينستيتۋتسيونالدىق مۇشەسى», دەدى ا.عينيات.
كونفەرەنتسيانىڭ اشىلۋىندا ءسوز سويلەگەن ISPOR دەنساۋلىق ساقتاۋ ەكونوميكاسىن زەرتتەۋ جانە ناتيجەلەردى باعالاۋ حالىقارالىق قوعامىنىڭ پرەزيدەنتى يساو كاماە (جاپونيا), HTAi دەنساۋلىق ساقتاۋ تەحنولوگيالارىن باعالاۋ حالىقارالىق قاۋىمداستىعىنىڭ پرەزيدەنتى ۆايا وورتۆين (نيدەرلاندى) جانە قر پارلامەنتى سەناتىنىڭ دەپۋتاتى اقمارال ءالنازاروۆالار شارانىڭ ماڭىزدىلىعىن ەرەكشە اتاپ ءوتتى.
حالىقارالىق كونفەرەنتسيادا مەديتسينالىق كومەكپەن جاپپاي قامتۋدى قامتاماسىز ەتۋ قۇرالى رەتىندە دستب-نىڭ ماڭىزدى جانە وزەكتى ماسەلەلەرى كوتەرىلدى. بۇل رەتتە دەنساۋلىق ساقتاۋ تەحنولوگيالارىن باعالاۋ بويىنشا حالىقارالىق ساراپشى كشيشتوف لاندا (پولشا) دەنساۋلىق ساقتاۋ سالاسىندا دستب ناتيجەسىن پايدالانا وتىرىپ, دالەلدى شەشىمدەر قابىلداۋعا بولاتىنىن العا تارتتى. Syreon Research زەرتتەۋ ينستيتۋتىنىڭ باسشىسى زولتان كالو (ۆەنگريا) شىعىس ەۋروپاداعى جالپىعا بىردەي مەديتسينالىق ساقتاندىرۋدىڭ تۇراقتىلىعىن ارتتىرۋداعى دستب ءرولى تۋرالى باياندادى. ساليدات قايىربەكوۆا ۇلتتىق عىلىمي دەنساۋلىق ساقتاۋدى دامىتۋ ورتالىعىنىڭ باسقارما توراعاسى الەكساندر كوستيۋك دستب-نىڭ ورتالىق ازياداعى دەنساۋلىق ساقتاۋ قىزمەتتەرىمەن جاپپاي قامتۋ تۇراقتىلىعىن ارتتىرۋداعى رولىنە توقتالدى.
قازاقستاندا دەنساۋلىق ساقتاۋ تەحنولوگيالارىن باعالاۋ ءراسىمى العاش رەت 2010-2013 جىلدارى دۇنيەجۇزىلىك بانك پەن ۇكىمەتتىڭ بىرلەسكەن جوباسىن ىسكە اسىرۋ بارىسىندا ەنگىزىلدى. دستب كلينيكالىق تيىمدىلىك دالەلدەرىن باعالاۋ جانە ەكونوميكالىق باعالاۋعا نەگىزدەلەتىن جانە دەنساۋلىق ساقتاۋ جۇيەسىندەگى شىعىنداردى وڭتايلاندىرۋعا, بيۋدجەت قاراجاتىن پايدالانۋدى ۇتىمدى ەتۋگە باعىتتالعان باسقارۋشىلىق شەشىمدەر قابىلداۋدىڭ ءتيىمدى قۇرالى.
20-دان استام ەلدىڭ ساراپشىلارى قاتىسقان حالىقارالىق كونفەرەنتسيا اياسىندا پانەلدىك, پلەنارلىق سەسسيالار مەن عىلىمي-پراكتيكالىق سيمپوزيۋمدار ءوتتى. قاتىسۋشىلار اتاپ وتكەندەي, كونفەرەنتسيا كاسىبي قارىم-قاتىناس ورناتۋ, وقىتۋ, جيناقتالعان تاجىريبە مەن وزىق يدەيالارمەن الماسۋ ءۇشىن ءتيىمدى پىكىرتالاس الاڭىنا اينالدى. شارانىڭ قورىتىندىسى بويىنشا ازىرلەنگەن ۇسىنىمدار شىعىس ەۋروپا جانە ورتالىق ازيا ەلدەرىندە دەنساۋلىق ساقتاۋ تەحنولوگيالارىن باعالاۋ سالاسىنداعى وڭىرلىك ءوزارا ءىس-قيمىلدى دامىتۋ مەن دەنساۋلىق ساقتاۋ سالاسىنداعى ساياساتتى قالىپتاستىرۋدا ۇلكەن ماڭىزعا يە بولماق.
