ەسكەرتكىش تاقتانىڭ سالتاناتتى اشىلۋىن نۇر-سۇلتان قالاسى əكىمىنىڭ ورىنباسارى ەرمەك قيزاتوۆ پەن اقىننىڭ قىزى مايرا كاكىمبەكقىزى اتقاردى. ودان كەيىن ءسوز العان ەرمەك قيزاتوۆ تىرلىكتە ونەگەلى ءىزى قالعان ءبىرتۋار ازامات تۋرالى سالماقتى وي قوزعاپ, تۋعان حالقىنىڭ جاقسىلىعىن تالماي جىرلاعان اقىننىڭ ءومىرى وتاندى ءسۇيۋدىڭ ۇلگىسى بولعاندىعىن ايتتى.
ءىس-شارادا سولتۇستىك قازاقستان وبلىسىنىڭ اكىمى قۇمار اقساقالوۆتىڭ قۇتتىقتاۋىن ونىڭ ورىنباسارى عاني نىعمەتوۆ وقىپ بەرسە, قاراعاندى وبلىسىنىڭ اكىمى جەڭىس قاسىمبەكتىڭ سالەمىن ورىنباسارى ەربول الىقۇلوۆ جەتكىزدى. سونداي-اق اقمولا وبلىسىنان كەلگەن دەلەگاتسيا وكىلى جابال ەرعاليەۆ كاكىمبەك سالىقوۆتىڭ ەل كوڭىلىندە وقجەتپەستىڭ بيىگى بولىپ قالعاندىعىن باياندادى.
− سولتۇستىك قازاقستان مەن اقمولا وبلىسى كاكىمبەك اعامىزدى ءالى كۇنگە دەيىن ءبىر-بىرىمىزدەن قىزعانىپ, ءوز باۋىرىمىزعا تارتىپ جۇرەمىز. سونى بىلەتىن ول كىسى «ەسىل-كوكشە مەن ءۇشىن ورتاق مەكەن, ەكەۋى دە مەنىڭ ءوز ەلىم» دەپ جىرلادى. پوەزيامىزدىڭ جەزكيىگى اتانعان اقىننىڭ ءار ولەڭىنە ەلىمىزدىڭ بار كومپوزيتورى قۇمار بولدى. ويتكەنى ول كىسىنىڭ سۇلۋ جىرلارى انگە سۇرانىپ تۇراتىن. قىسقاسى, قازاق دالاسىنىڭ ءار بۇرىشىندا ارداقتى ازاماتتىڭ ءوز ورنى بار» دەدى جازۋشى.
بەلگىلى اقىن, حالىقارالىق «الاش» ادەبي سىيلىعىنىڭ عالىم جايلىباي اسىل اعاسىنىڭ قاسىنا 15-16 جاسىنان ەرىپ, شاكىرتى بولعاندىعىن ايتىپ, اقىن ومىردەن وتكەندە ارناعان جىرىن وقىدى.
قازاقتىڭ تۇڭعىش عارىشكەرى, كەڭەس وداعىنىڭ باتىرى, حالىق قاھارمانى توقتار اۋباكىروۆ اقىننىڭ ازاماتتىعى مەن ادامگەرشىلىگىنە توقتالدى
− كاكىمبەك اعامەن ماسكەۋدە كەزدەسىپ, تانىستىم. قاسىنا وتىرعىزىپ, اڭگىمەگە تارتتى. مەنەن «عارىشقا ۇشۋعا دايىندالىپ ءجۇرسىڭ بە؟» دەپ سۇرادى. سوعان ازىرلەنىپ جۇرگەنىمدى ايتتىم. عارىشقا ۇشىپ كەلگەسىن, ول كىسىمەن تاعى كەزدەستىم. اكادەميك قانىش ساتباەۆ ەكەۋمىزگە ارناعان ولەڭىن وقىپ بەردى. سوندا مەن كاكىمبەك اعانىڭ قاراپايىمدىلىعىنا تاڭعالدىم. ول كىسىنىڭ اقىندىعى دا ەشكىمنەن كەم ەمەس, بىراق ادامگەرشىلىگى بارىنەن بيىك. ەلىمىز قانداي بولۋ كەرەك, قاي جولمەن ءجۇرۋ كەرەك دەگەندە, وسى كىسىلەردىڭ ىستەگەن ىستەرىن ەسكە الۋ كەرەك. كاكىمبەك اعامىزدىڭ ءومىر جولى اتقا ءمىنىپ جۇرگەن ازاماتتارعا ۇلگى», − دەدى تۇڭعىش عارىشكەر.
سونىمەن قاتار مەملەكەت جانە قوعام قايراتكەرى جانىبەك كارىبجانوۆ ەلىمىزدىڭ باس ورداسى الماتىدان اقمولاعا قونىس اۋدارعاندا, كاكىمبەك سالىقوۆتىڭ ەلورداعا زيالى قاۋىمنىڭ العاشقىلاردىڭ ءبىرى بولىپ كوشىپ كەلىپ, استانانىڭ كوركەم كەلبەتىن جىرعا قوسقاندىعىن ءسوز ەتتى.
ايتۋلى تۇلعانىڭ تۋىسقاندارى اتىنان اقىن باۋىرى زاراف پەن قىزى مايرا كاكىمبەكقىزى اقىندى ۇلىقتاۋ شاراسىنا قاتىسۋشىلارعا, سونىڭ ىشىندە قولداۋ كورسەتكەن نۇر-سۇلتان قالاسى اكىمدىگىنە العىسىن جەتكىزدى.
