ەكپەنى افريكانىڭ ساحارادان وڭتۇستىككە قارايعى ەلدەرىنە جەتكىزۋ ءۇشىن ساتىپ الۋعا GAVI ۆاكتسينالار جونىندەگى اليانسى 155 ملن اقش دوللارىنان استام قاراجات بولگەن.
بەزگەككە (مالياريا) قارسى ۆاكتسينا قولدانۋ باعىتىنداعى پيلوتتىق جوبالاردى ءبىرىنشى بولىپ, 2019 جىلى مالاۆي ۇكىمەتى باستاعان. RTS,S/AS01 (RTS,S) ەكپەسىنىڭ قاۋىپسىزدىگى جانە ونى تاسىمالداۋعا بولاتىنى, ەڭ باستىسى بۇل ۆاكتسينانىڭ اسا قاۋىپتى اۋرۋعا شالدىعۋدى ازايتاتىنى انىقتالادى. وسى مالىمەتتەردىڭ نەگىزىندە 2021 جىلى قازاندا ددۇ اتالعان RTS,S ەكپەسىن بەزگەك كوپ جانە از تارالعان جەرلەردە تۇراتىن بالالارعا كەڭىنەن سالۋ تۋرالى تاريحي ۇسىنىس ەنگىزدى. ۇيىمنىڭ بولجامىنشا, بۇل قادام جىل سايىن افريكالىق 40 000-80 000 بالانىڭ ءومىرىن ساقتاپ قالۋعا مۇمكىندىك بەرەدى.
25 ءساۋىر - دۇنيەجۇزىلىك بەزگەككە قارسى كۇرەس كۇنىنە وراي, ددۇ ادامدار ءومىرىن ساقتاۋ ماقساتىندا يننوۆاتسيالاردى ۇزدىكسىز قولدانىسقا ەندىرۋگە شاقىردى.
«مالياريانىڭ زەرتتەۋشىسى رەتىندە, مەن ەڭبەك جولىمدى باستاعان كەزدە وسى قاۋىپتى اۋرۋعا قارسى ءتيىمدى ۆاكتسينا پايدا بولاتىن كۇندى ارمانداعان ەدىم. بۇل ۆاكتسينا - جاي عانا عىلىمي جەتىستىك ەمەس, ول افريكاداعى وتباسىلاردىڭ ءومىرىن وزگەرتەدى. ول عىلىم مەن يننوۆاتسيالاردىڭ دەنساۋلىق ساقتاۋداعى كۇشىن كورسەتەدى. دەگەنمەن, بۇعان قاراماستان, ادامداردىڭ ءومىرىن ساقتاپ قالۋ مەن بەزگەكتەن ارىلۋ جولىندا جاڭا, جەتىلدىرىلگەن قۇرالداردى ويلاپ تابۋ اسا وزەكتى», دەيدى ددۇ باس ديرەكتورى تەدروس ادحانوم گەبرەيەسۋس.
افريكا قاۋىمداستىقتارى ۆاكتسينانى جاقسى قابىلدادى. الداعى ۋاقىتتا ەكپەگە دەگەن سۇرانىس ۇسىنىستان اسىپ تۇسەدى دەگەن بولجام بار. قازىرگى ۆاكتسينا شىعارۋ قۋاتى جىلىنا 15 ملن دوزاعا جەتەدى, ال بولجام بويىنشا سۇرانىس 80 ملن دوزادان اسۋى مۇمكىن.
RTS,S ۆاكتسيناسى - GSK كومپانياسىنىڭ PATH سەرىكتەستىگى ارقاسىندا جانە افريكالىق عىلىمي-زەرتتەۋ ورتالىقتارىنىڭ قولداۋىمەن جۇرگىزىلگەن 30 جىلدىق زەرتتەۋلەرىنىڭ ناتيجەسى.
ال, ددۇ قاراۋىنا وسى ينفەكتسيانى تاسىمالداۋشى ماسالارمەن كۇرەس باعىتىنداعى جاڭا تاسىلدەر جانە تەحنولوگيالار ۇسىنىلدى. ماسەلەن, ينسەكتيتسيدتەرمەن وڭدەلگەن تورلاردىڭ جانە اۋماقتاردى وڭدەۋگە ارنالعان ماسا ۇركىتكىشتەردىڭ جاڭا تۇرلەرى, گەندىك جەتەكتەر نەگىزىندەگى امالدار, Anopheles ماسالاردى تارتۋ مەن جويۋعا ارنالعان قانتتى جەمدەردى ايتۋعا بولادى. ەگەر ولاردىڭ تيىمدىلىگى دالەلدەنسە, قولدانىسقا ەندىرۋ ءۇشىن ۇيىم جاڭا كەڭەستەر قۇراستىرادى نەمەسە قازىرگىلەرىنە وزگەرتۋلەر جاسالادى.
