قازىنالى قيىرعا قارجى قۇيىلادى

اتىراۋدا ەكىنشى رەت وتكەن حالىقارالىق ينۆەستيتسيالىق فورۋم اياسىندا 19 ميلليارد تەڭگەنىڭ مەموراندۋمىنا قول قويىلدى

اتىراۋعا تاعى دا ەكو­نو­ميكانىڭ ءار سالاسىنا ينۆەستيتسيا قۇيۋعا ق ۇلىقتى ينۆەستورلار شوعىرى كوپتەپ جينالدى. ەكىنشى رەت وتكىزىلگەن «Atyrau Inbest-2014» حالىقارالىق فورۋمى اياسىندا الەمنىڭ 15 ەلىنەن 100-دەن استام كومپانيا وكىلدەرى الدىندا وبلىس اكىمى ب.ىزمۇحامبەتوۆ مۇنايلى اتىراۋ ەكونوميكاسىنىڭ ەرەكشەلىگى تۋرالى بايانداپ بەردى. ونىڭ ايتۋىنشا, الەمنىڭ ءار تۇكپىرىندەگى 50-دەن استام ەلمەن ىسكەرلىك, ىن­تىماقتاستىق بايلانىس ورناتىپ وتىر. قازىر اتىراۋدا شەتەلدىك كاپيتالدىڭ قاتىسۋىمەن 900-دەن اسا كومپانيا جۇمىس جاسايدى. بۇعان اتىراۋ وبلىسىنىڭ تابيعي بايلىققا مولدىعى دا, ەكونوميكالىق وركەندەۋى دە وڭ اسەرىن تيگىزىپ وتىر. بۇل وڭىرگە العاش ينۆەستيتسيا قۇيعانداردىڭ باستاۋىندا «شەۆرون» كورپوراتسياسىن ايتۋعا بولادى. الەمدىك مۇناي بيزنەسىندە شوقتىعى بيىك كورپوراتسيا اتىراۋ ەكونوميكاسىنا مول ينۆەستيتسيا سالىپ, «تەڭىز» كەن ورنىن يگەرۋدى ءساتتى جالعاستىرۋدا. وسىناۋ كوشباسشى كورپوراتسيانىڭ كەلۋىمەن اتى­راۋعا ءدۇيىم دۇنيەنىڭ ءار ەلىنەن الەمدىك نارىقتاعى الپاۋىت كوم­پانيالاردىڭ قىزىعۋشىلىعى ارتىپ كەلەدى. جىل سايىن قازىنالى قيىرعا قارجى قۇيعىسى كەلەتىندەر قاتارى مولايا تۇسۋدە. الەمنىڭ 50-دەن اسا ەلىمەن ساۋدا بايلانىسىن ورناتىپ ءۇل­گەرگەن ءوڭىر اسىرەسە, اقش, ۇلى­بريتانيا, يتاليا, فرانتسيا, قىتاي, كانادا سەكىلدى ەلدەردى ەرەكشە قىزىقتىرىپ وتىر. سونىڭ ىشىندە ۇلىبريتانيا, يتاليا, گەرمانيا ەلدەرى اتىراۋدا ساۋدا-ينۆەستيتسيالىق وكىلدىكتەرىن اشىپ قويدى. ال كەدەن وداعى اياسىنداعى رەسەي فەدەراتسياسى مەن بەلارۋس رەسپۋبليكاسى اراسىنداعى بايلانىس سەنىمدى ارىپتەستىكتەن ءىس­كەر­لىك بەلسەندىلىككە بەت ءتۇ­زەدى. اسىرەسە, بەلارۋس ەلى تارا­­پى­نان قىزىعۋشىلىقتىڭ ارت­قانى بايقالادى. وسى ورايدا گومەل وبلىسى اتقارۋشى كوميتەتى توراعاسىنىڭ ورىنباسارى بولەسلاۆ پيرشتۋكتىڭ سوزىمەن ايتقاندا, كەدەن وداعى قۇرامىنداعى ەلدەر, سونىڭ ءىشىن­دە, اتىراۋ مەن گومەل وبلىستارى اراسىندا شەشىلمەگەن ماسەلە قالماعان. – گومەل ءوندىرىسى قارقىندى دامىعان وبلىس بولعانمەن, سوڭعى جىلدارى اۋىل شارۋاشىلىعى سالاسىندا دا كەشەندى باع­دار­لامالار ىسكە اسىرىلىپ جاتىر. بۇل سالاعا قاجەتتى تىرمادان تراك­تورعا دەيىن شىعارىلادى. مال شارۋاشىلىعىندا ىلگەرىلەۋشىلىك بار, – دەپ كەڭىنەن اڭگىمەلەدى ب.پيرشتۋك. قازىنالى وڭىردە ەكىنشى رەت وتكىزىلگەن ينۆەستيتسيالىق فورۋم اياسىندا جالپى سوماسى 19 ميلليارد تەڭگەنى قۇراعان وننان استام مەموراندۋمعا قول قويىلدى. سونىڭ ىشىندە ءبىر عاسىردان استام مەرزىمنەن بەرى «قارا التىن» وندىرۋمەن ءوندىرىسى ورگە باسقان اتىراۋدا وزگە سالالارعا, اسىرەسە, قۇس شارۋاشىلىعىن دامىتۋعا بەت بۇرعىزاتىن جوبالار دا بار. «اتىراۋ» اكك» ۇك» اق باسقارما توراعاسى ابات تاسىموۆتىڭ ءمالىم ەتۋىنشە, وڭىردە قۋاتتىلىعى شامامەن 2 مىڭ تونناعا جەتەتىن قۇس فابريكاسى سالىنباق. مۇنداعى ءبىر ەرەكشەلىك, وڭىردە العاش رەت قاز ەتىن ءوندىرۋ قولعا الىنادى.         سونىمەن بىرگە, اتىراۋ وبلىسىندا 2600 توننا تاۋىق ەتىن وندىرەتىن تاعى ءبىر قۇس فاب­ريكاسىنىڭ قۇرىلىسى باستالماق. وسىعان بايلانىستى قۇس فابريكاسىن قارجىلاندىرۋ ماقساتىندا ورتاق كەلىسىم جاسالدى. قۇس فابريكاسىن 2015 جىلى ىسكە قوسۋ جوسپارلانىپ وتىر. – قازاقستان مەن بەلورۋسسيا ارا­سىنداعى قارىم-قاتىناس قار­قىندى دامىپ كەلەدى. قازىر سول ىسكەرلىك بايلانىستاردى ودان ءارى ورىستەتۋدىڭ وڭتايلى ءساتى ءتۇسىپ تۇر. ءبىزدىڭ گومەل وبلىسىنىڭ كاسىپورىندارى قازاقستانعا اۋىلشارۋاشىلىق تەحنيكالارىن ەكسپورتتاي الادى. ءبىز قازاق­ستاننان, سونىڭ ىشىندە اتىراۋ وبلىسىنان وزىمىزگە قاجەتتى ءونىم­دەردى ساتىپ الۋعا ىنتالىمىز. وسى فورۋم كەزىندە تاعى دا قو­سىمشا ماڭىزدى كەلىسىمشارتتار جاساستىق. ەندى ەكى ەل اراسىنداعى ساۋدا اينالىمى بۇرىنعىدان مولايا تۇسەدى, –دەدى گومەل وبلىسى اتقارۋشى كوميتەتى توراعاسىنىڭ ورىنباسارى بولەسلاۆ پيرشتۋك. جالپى, گومەل وبلىسىنىڭ اتىراۋمەن بايلانىسى تەك ءبىر سالامەن شەكتەلەدى دەۋگە بولمايدى. تاراپتار ءبىلىم بەرۋ, مەديتسينا سالاسىندا بىرلەسكەن جوبالاردى ىسكە اسىرۋىنا مول مۇمكىندىك بار, دەپ ەسەپتەيدى بەلارۋس رەسپۋبليكاسى تاۋار-وندىرىستىك پالاتاسى گو­مەل بولىمشەسىنىڭ باس ديرەكتورى مارينا فيلونوۆا. ءتىپتى, گو­مەلدىك دەلەگاتسيا باسشىسى ب.پيرش­تۋك ءجۇن وڭدەۋ ءوندىرىسىن دامىتۋ باعىتىندا تاجىريبە بولىسۋگە دايىن ەكەنىن جەتكىزدى. تۇيىندەي ايتقاندا, اتىراۋدا وتكىزىلگەن ەكىنشى ينۆەستيتسيالىق فورۋم, اسىرەسە, قازاقستان مەن بەلارۋس ەلدەرى اراسىنداعى ينتە­گراتسيالىق بايلانىستاردى ودان ءارى تەرەڭدەتە تۇسۋگە جاڭاشا سەر­پىن بەردى. جولداسبەك شوپەعۇل,  «ەگەمەن قازاقستان». اتىراۋ وبلىسى.