گۇلناز بالپەيىسوۆا: كلاسسيكادا شەكارا جوق. شەكسىزدىك بار

– گۇلناز، ءسىزدى ەلىمىزدە بىرنەشە تەاتر­دىڭ سوناۋ ماسكەۋدەن اتتاي قالاپ شاقىرعانىنىڭ كۋاسىمىن. بىراق تاڭداۋىڭىز ەلوردا مەن الما­تى ەمەس، قاراعاندىنىڭ ساكەن تەاترى­­نا ءتۇسىپتى. مۇنىڭ قانداي دا ءبىر سەبەبى بار ما؟ الدە جاي عانا سايكەس­تىك پە؟

– راس، تۋعان ەلدەن شاقىرۋ كوپ ءتۇستى. الايدا ۋاقىتىمنىڭ رەتى كەلمەدى. سول قاربالاس تىرلىكتەن قيۋىن تاۋىپ الىپ شىعىپ، قولىما «قاراگوزدى» ۇستاتقان، انا ءتىلىمنىڭ قاسيەتىن سەزىندىرىگەن وسى تەاتردىڭ ديرەكتورى قۇرمان قالىموۆقا العىسىم شەكسىز. ءوزى دە ءبىر بىربەتكەي ءھام تاۋەكەلشىل باسشى ەكەن. سول مىنەزى ۇنا­دى. قازىرگى تەاترلارعا ءدال وسىنداي مەنەدجەر-ديرەكتورلار كەرەك. ول قازاقستان بولسىن، رەسەي بولسىن – ءبارىبىر. قۇرمان – ەكى جىل بويى ءار ءۇش اي سايىن پەسا جىبەرىپ تۇرعان جالعىز باسشى. بىرنەشە ماتەريالمەن تانىستىم. كوبىسى كوڭىلىمە قونبادى. ال «قاراگوز» مەنى بىردەن باۋ­راپ الدى. وقىپ وتىرىپ تەرەڭ ويعا باتتىم. ونىڭ ۇستىنە «قاراگوز» – كلاسسيكا! ۇلى جازۋشى مۇحتار اۋەزوۆتىڭ قالامى قۋات سىيلاعان ۇلتتىق جاۋھار. ال مەنىڭ جانىم كلاسسيكاعا جاقىن. ون­داعى ولمەيتىن، ماڭگىلىك ەسكىمەيتىن تاقى­رىپتار ۇنايدى. وقيسىڭ دا ءوزىڭدى تاباسىڭ، ءسۇرىپ جاتقان ءومىرىڭ، ورتاڭ، قوعامىڭدى تانيسىڭ، دوستارىڭدى كورەسىڭ. ءوز زامانىڭنىڭ قالاي ءومىر ءسۇرىپ جاتقانىن اڭدايسىڭ. قىسقاسى، كلاسسيكادا ادامي ماڭگىلىك تاقىرىپتار ءسوز بولادى. دەمەك وندا شەكارا جوق، شەكسىزدىك بار. قيالىڭا قانات سىيلا دا، قالىقتاي بەر! رەجيسسەر ءۇشىن بۇل – تەڭدەسسىز رۋحاني ازىق. سوندىقتان دا «قاراگوزبەن» بىردەن دوستاستىم.

– «قاراگوز» – قازاق دراماتۋرگيا­سىنىڭ ۇلتتىق جاۋھارى. ونىڭ تابي­عاتىن تانۋ ءۇشىن ءمىنسىز مەكتەپتەن بو­لەك، تەك پەن تامىردان جالعاساتىن تەرەڭ تانىم كەرەك، تراگەديانىڭ جالپى بول­مى­­سى مەن مىنەزىن، قالا بەردى مەنتا­لي­­تە­تىن يگەرۋ قاجەت دەگەندەي. بۇل جا­­عىن­­داعى قيىندىقتاردى قالاي ەڭسەر­دىڭىز؟

– ويىڭىزدى ءتۇسىندىم. راس، مەنىڭ رە­جيس­سەرلىك جولىم دا، مەكتەبىم دە الەم­­گە ايگىلى رەجيسسەر، تەڭدەسسىز تالانت، ەۋ­رو­پا تەاتر مەكتەبىنىڭ كوشباسشى رەفور­­ما­تورلارىنىڭ ءبىرى، ءوز ءداۋىرىنىڭ اڭى­زى ريماس تۋميناستىڭ شەبەرحاناسىن­دا قالىپتاستى. ماسكەۋگە كەلىپ ءوزىمدى تابا الماي بىرنەشە وقۋ ورىنىن اۋىستىرعاندا، ريماس ءۆلاديميروۆيچتىڭ مەكتەبىنەن ىزدە­گەن كاسىبي مۇراتىمدى تاپتىم. ديزاينەر دە، اكتريسا دا ەمەس، ءتىپتى تەاتر سىنشىسى دا ەمەس، مەنىڭ جانىم رەجيسسەر بولۋدى قالاي­دى ەكەن. توپتاعى كىل جىگىتتەردىڭ ورتاسىندا جالعىز قىز بولىپ وقىدىم. وسى تۇرعىدان كەلگەندە ارينە، رەجيسسەرلىك كوزقاراستارىم ۇلتتىقتان گورى، جا­ھاندىق سيپات الۋى زاڭدى دا. الايدا مەن ءدال قازىرگى تاڭدا رەسەيدە جۇرسەم دە، قازاقشا سويلەمەسەم دە، جانىم، رۋحىم – قازاق. سويلەمەگەنىممەن، قازاقشانى جاقسى تۇسىنەمىن. مەن ءالى كۇنگە دەيىن قازاقستان ازاماتىمىن. ونى اۋىستىرۋعا تالاي ۇسىنىس جاسالدى. بىراق مەن باس تارتتىم. ول سولاي بولىپ قالادى! ودان كەيىن، ارينە، ونەردە شەكارا جوق. كلاسسيكانى دا بەلگىلى ۇلتقا تاڭۋدى ءجون دەپ سانامايمىن. سەبەبى كلاسسيكا ۋاقىتقا دا، ۇلتقا دا باعىنبايدى، ول ودان الدەقاشان وزىپ كەتكەن. كلاسسيكادا ماڭگىلىك ادامزاتتىق ماسەلەلەر كوتەرىلەتىندىكتەن، دەمەك ول – جالپى ادامزاتتىق. «قاراگوز» دە مەنىڭ تۇسىنىگىمدە سولاي. ۇلكەندەر جاستاردى تۇسىنبەيدى، ال جاستار ەسكى تۇسىنىكتى بۇزىپ-جارعىسى كەلەدى. اقىلعا سىيمايتىن، ادام ميى جەتپەيتىن تۇستارى دا بار. ونى ونەردىڭ، جازۋدىڭ قۇدىرەتى دەر ەدىم. ماڭگىلىك تاقىرىپتار ەشقاشان ولمەيدى، ولارعا ماڭگىلىك ءومىر ءتان. ال مۇنداي ماسەلە تەك «قاراگوزدە» عانا ما؟ ارينە، جوق. ونداي تارتىس شەكسپيردە دە بار، تولستويدا دا بار، الەمدىك دەڭگەيدەگى وزگە كلاسسيكتەردە دە بار، ماسەلەن. ءتىپتى مەن «قاراگوزدى» «قازاقشا شەكسپير» دەر ەدىم. ال ەندى تراگەدياداعى ۇلتتىق ماسەلەلەرگە كەلسەك، مەن ونى ساحنادا بارىنشا استارمەن كوركەمدەپ جەتكىزۋگە تىرىستىم. كەيبىر تۇستا اشىق تا، اشىنىپ تا ايتىلاتىن جەرلەر بار. سودان كەيىن «قاراگوزدىڭ» جالپى ادامزاتتىق سيپات العانىن كوكسەدىم. مەن جانە مەنىڭ كوماندام وسى ماقسات جولىندا تەر توكتىك.

– ءيا، قويىلىم باعدارلاماسىنان تانىسقانىمىزداي، «قاراگوزدىڭ» ساحناعا شىعۋىنا اتسالىسقان جارىق قويۋ مەن كوستيۋم سۋرەتشىسى دە، كومپوزيتور مەن بالەتمەيستەر دە رەسەيدەن سىزبەن بىرگە كەلىپتى. ءسىز ۇنەمى تۇراقتى كوماندامەن عانا جۇمىس ىستەيسىز بە، الدە مامانداردى اۋىستىرىپ تۇراسىز با؟

– نەگىزىنەن ۇيرەنگەن توپپەن جۇمىس ىستەگەندى ۇناتامىن. ولار سەنىڭ نە قالايتىنىڭدى بىردەن ءبىلىپ تۇرادى. تانىسىپ، ماقساتىڭدى تۇسىندىرۋگە ۋا­قىت شىعىندامايسىڭ. بىردەن پوتسەسكە كىرىسەسىڭ. وسى جاعى ءتيىمدى. ال ەندى وزگە ەلدەرگە شىعىپ سپەكتاكل قويعاندا بارىنشا سول ەلدىڭ تەاتر ماماندارىن دا قاتىستىرۋدى قۇپ كورەمىن. ويتكەنى سول ەلدىڭ تانىمىن، تابيعاتىن جاقسى تۇسىنەدى. بۇل اسىرەسە ۇلتتىق دۇنيەلەردە ماڭىزدى. سوندىقتان «قاراگوزدە» دە جەرگىلىكتى مامانداردى شەت قالدىرعان جوقپىن. ستسەنوگرافيا جۇمىستارىمەن قانات ماقسۇتوۆ اينالىستى. مەن بۇل قويىلىمدا قازاقتىڭ ەن دالاسىن كورسەتكىم كەلدى. كادىمگى ءان سالىپ تۇرعان قازاقتىڭ دالاسىن. ويتكەنى ويدىڭ، قيالدىڭ كەڭ بايتاق دالانىڭ تورىندە ەركىن كوسىلگەنىن قالايمىن. مەن ءۇشىن تراگەديانىڭ كوتەرەر جۇ­گى مەن ساحنا بەزەندىرۋىنىڭ سايكەس بولۋى ماڭىزدى. جالپى مەن ءاۋ باستان جىلتىراققا اۋەستەر قاتارىنان ەمەسپىن. ماعان كورەرمەننىڭ سول داۋىرگە سۇڭگىپ كەتىپ، ءوزىن ۇمىتىپ، دەمالعانى كەرەك. كەيىپكەرمەن بىرگە تاريح قويناۋىنا ساپارلاپ، سولارمەن بىرگە ك ۇلىپ، قايعىسىنا ورتاق بولعانىن كورگىم كەلەدى. وسى ماقسات تۇرعىسىنان ستسەنوگراف ەكەۋىمىزدىڭ ويىمىز ءبىر جەردەن شىقتى.

– رەجيسسەر رەتىندە ءسىز ءۇشىن «قارا­گوزدىڭ» باستى تراگەدياسى نەدە؟

– بۇل جەردە تراگەديا مىناۋ دەپ جالعىز-اق نارسەنى اتاپ كورسەتۋگە بولمايدى. قويىلىمدا ءار كەيىپكەردىڭ ءوز تراگەدياسى بار. قاراگوزدىڭ ءوز قايعىسى، ءمورجاننىڭ ءوز مۇڭى، نارشا مەن سىرىمنىڭ ءوز ارمانى، اقبالانىڭ ءوز وكىنىشى بار. كەيبىر رەجيسسەرلەر ماحابباتتان تراگەديا جاساۋى مۇمكىن. وعان قاقىسى دا بار. ول ەندى تىكەلەي رەجيسسەردىڭ تۇسىنىك-تانىم، وقيعانى قابىلداۋىنا بايلانىستى. ويتكەنى اۆتور پەسانى جازىپ بەردى. ءارى قارايعى ونىڭ سپەكتاكلگە اينالعانعا دەيىنگى تاعدىرى تىكەلەي رەجيسسەردىڭ قيالىنا بايلانىس­تى. قويىلىم قانداي سيپات الادى، ول ەندى تىكەلەي رەجيسسەر ساراپتاۋىمەن ساحنادا ساۋلەت تۇزەدى. دەمەك رەجيسسەر دە دراماتۋرگپەن سواۆتور دەپ سەنىمدى تۇردە ايتۋعا بولادى. ال اۆتوردىڭ قاي-قايسىسى دا ءوز تولعانىسىن جەتكىزەدى. مەن دە ءوز «قاراگوزىمدى» قويدىم. مەنىڭ «قاراگوزىمدە» بارلىعىنىڭ قايعىسى بار، بىراق ءمورجاننىڭ مۇڭى باستى ورىنعا شىقتى. ويتكەنى مەن ءمورجاننان ءوز اجەمنىڭ بەينەسىن كورگەندەي بولدىم. ءاربىر قاريا ۇرپاعىنىڭ قاتەلىگى ءۇشىن ءوزىن كىنالايدى. ءوزى ويلاعانداي ادام بولىپ وسپەگەنىنە ناليدى. ال زامان ءبىر ورىندا تۇرا ما؟ زامانىنا قاراي ادامى ەمەس پە؟ دەمەك كەيىنگى جاس بۋىننىڭ كوزقاراسى ۇلكەندەردىڭ وي-سانا، تۇسىنىك-تانىمىمەن توعىسپاي جاتۋى زاڭدىلىق. وسىعان كەلىسپەگەن، مويىنداعىسى، قابىلداعىسى كەلمەگەن بۋىن اراسىندا قايشىلىق تۋىن­دايدى ءسويتىپ. مەن البەتتە قاراگوز بەن سىرىمنىڭ اراسىنداعى ماحابباتتى جاقتامايمىن. بىراق وسى جاعداي ارقىلى، ەسسىز قۇشتارلىقتىڭ جەتەگىندە كەتكەن جەلىكپە سەزىمنىڭ نەگە ۇرىندىراتىن كورىپ، جاستار سودان ساباق السا دەيمىن. سونىڭ نەگىزىندە بۇگىنگى قوعامنىڭ تىنىسىن دا قوسا سەزىنگەنىن كوكسەدىم. كەلەر ۇرپاق تاربيەگە تال بەسىكتەن ءمان بەرگەن قازاقتىڭ قۇندىلىقتارىنىڭ قادىرىنە جەتسە ەكەن دەيمىن. وسى تولعانىستار مەنى «قاراگوزگە» الىپ كەلگەن بولاتىن.

– بۇل ماقساتىڭىز اكتەرلىك انسامبل جۇمىسىنىڭ دەڭگەيىمەن قانشا­لىقتى قابىستى؟ كوڭىلىڭىز تولدى ما؟

– قاراعاندى تەاترىنىڭ اكتەرلەرىمەن تۋرا ەكى اي بىرگە جۇمىس ىستەپپىن. بىراق بۇل تولىققاندى سپەكتاكل ءۇشىن وتە از ۋاقىت. جاقسى قويىلىمدى ومىرگە اكەلۋ ءۇشىن كەمىندە ءۇش اي ۋاقىت كەرەك. درا­ماتۋرگيا دا شاعىن رومان سياقتى عوي. تەرەڭ تولعانىستىڭ ناتيجەسىندە تۋادى. بىراق سوعان قاراماستان، «قاراگوزگە» شىعارماشىلىق توپ بولىپ جانىمىزدى سالا جۇمىلدىق. تاڭنان كەشكە دەيىن تەر توكتىك. البەتتە، باسىندا قيىن بولدى. بىرىنشىدەن، مەكتەپ بولەك. ەكىنشىدەن، جۇمىس ءتارتىبى مەن تالابىم قاتال بولدى. ونداي رەجىمگە ۇيرەنبەگەن ارتىستەر قينالدى دا. بىراق ءبىز بەرىلمەدىك. ارتىستەر دە مەن قويعان تالاپقا جەتۋ ءۇشىن جانىن سالدى. قويىلىمعا نەگىزىنەن تەاتردىڭ جاس بۋىن اكتەرلەرى قاتىستى. ۇلكەندەردەن قازاقستاننىڭ ەڭبەك سىڭىرگەن ءارتىسى كەڭەس جۇمابەكوۆ پەن قايرات كەمالوۆ باستاعان ساقا اكتەرلەر دە زور جاۋاپكەرشىلىكپەن قاراپ، ءبىزدىڭ تولقىنعا قوسىلىپ، قويىلىمىمىزعا تاماشا سەرپىن بەردى. مەن ءار اكتەردىڭ مۇمكىندىگىنە ساي جۇمىس ىستەيمىن. ودان ارتىقتى تالاپ ەتپەيمىن. سول تۇرعىدان كەلگەندە ءبىراز ءارتىستىڭ مۇمكىندىگىن زەرتتەپ، اشىلماعان قىرلارىن دا وسى «قاراگوزدە» اشقان جايىمىز بار. جالپى، مەنى جاس دەمەي، بارلىعى جاڭا­لىققا سەنىپ، جانىن سالا جۇمىس ىستەگەن تاماشا ۇجىمعا العىس ايتقىم كەلەدى. قويىلىمعا دايىندىق جۇرگەن وسى ۋاقىت ىشىندە ارقايسىسىمەن دوس، تۋىس بولىپ جاقىنداسىپ ۇلگەردىم.

– اڭگىمەمىزدىڭ باسىندا ماسكەۋگە كەلىپ، ءوزىمدى تابا الماي ءبىراز سارساڭعا ءتۇستىم دەپ قالدىڭىز...

– ءيا، ونداي جاعدايدىڭ بولعانى راس. مەكتەپتە وقىپ جۇرگەنىمدە وزىمنەن ءبىر-ەكى جاس ۇلكەن قۇربىم سانكت-پەتەر­بۋرگكە وقۋعا ءتۇستى. ونى كورىپ مەن دە وسى ءبىر تاريحي قالادا وقۋدى ارماندادىم، ءتىپتى «مىندەتتى تۇردە سوندا بارامىن» دەپ ءوز-وزىمە انت ەتتىم. پەتەربۋرگتە وقۋدى قالاعانىم سونشالىق، بولمەمنىڭ ءتورت قابىرعاسىندا سول تاريحي قالا سۋرەتتەرىنەن بوس ورىن بولمايتىن. ونى بايقاعان انام، ءبىر كۇنى مەنى اقتوبەدەن سانكت-پەتەربۋرگكە اۆتوبۋسپەن الىپ بارىپ ارالاتتى. ءتىپتى 11-سىنىپتى سوندا وقۋعا ۇسىنىس جاسادى. الايدا بەلگىلى ءبىر سەبەپتەرمەن ەلگە قايتۋعا تۋرا كەلدى. ءسويتىپ، ۇيگە كەلىپ وقۋعا تۇسۋگە كۇنى-ءتۇنى جاتپاي-تۇرماي دايىندالدىم. بالا كۇنىمنەن ديزاينار-مودەلەر بولعىم كەلەتىن. سول ماقساتىمدى باعىندىرۋدى ويلادىم. وسىلايشا تالابىما نۇر جاۋىپ، وقۋ بىتىرگەن جىلى سانكت-پە­تەر­بۋرگ­تەگى ا.شتيگليتس اتىنداعى سانكت-پەتەربۋرگ مەملەكەتتىك كوركەم-ونەركاسىپتىك اكادەمياسىنا وقۋعا ءتۇستىم، ول كوپ ادامنىڭ ارمانى ەدى. الايدا ەكى ايدان كەيىن وقۋىمدى تاستاپ كەتتىم. سەبەبى كۇنىنە ەكى جۇزگە تارتا سۋرەت سالىپ، ونىڭ ىشىنەن ساناۋلىسى عانا «امان قالىپ»، قالعانى جىرتىلادى. دالاعا كەتكەن ەسىل ەڭبەگىم... مەن وعان شىدامادىم. كەيىن تۋريزم باعىتى بويىنشا مەنەدجەر ماماندىعىنا قابىلداندىم. وعان مەنىڭ اعىلشىن ءتىلىن بىلەتىنىم كوپ كومەكتەستى. الايدا مۇندا دا كوپ ايالدامادىم. ونەر سالاسىنا قايتىپ ورالىپ، اۋەلى سۋرەتشى بولىپ، ونىڭ قول ەمەستىگىن تۇسىنگەن سوڭ، كوستيۋم بويىنشا سۋرەتشى بولىپ، اكتەرلىك سالادا دا ءوزىمدى سىناپ كورگىم كەلدى. ودان كەيىن تەاترتانۋ ماماندىعىنىڭ ءدامىن تاتىپ كوردىم. قىسقاسى، مەن ءتورت ينستيتۋتتا وقىپ، ءتورت ماماندىق اۋىستىردىم. ءسويتىپ جۇرگەندە ماسكەۋدە ريماس تۋميناستىڭ كۋرس قابىل­داپ جاتقانىن ەستىپ، مۇنى جىبەرىپ السام بارلىعى بەكەر ەكەنىن ءتۇسىنىپ، ءبارىن ىسىرىپ تاستاپ سوندا باردىم. جولىم بولىپ، كىلەڭ جىگىتتىڭ ورتاسىنا جالعىز قىز ەتىپ مەنى قابىلدادى. رەجيسسەرلىككە وسىلاي كەلدىم جانە ەڭ قۋانارلىعى شارق ۇرىپ ىزدەگەن ءوزىمدى مەن ءدال وسى سالادان تاپتىم. ەڭ ۇتقانىم – رەجيسسەرلىككە قابىلدانعانعا دەيىنگى وقۋعا تالپىنعان ماماندىقتاردىڭ بارلىعى ماعان زور ازىق بولدى. قازىر مەن رەجيسسەر بولا ءجۇرىپ، سۋرەتشىنى دە، كوستيۋم بويىنشا سۋرەتشىنى دە، تەاتر سىنشىسىن دا، اكتەردى دە جاقسى تۇسىنەمىن. ول ساتىدان ءوزىم دە ءوتتىم عوي ويتكەنى. جانىم قالايتىن سالامەن اينالىسىپ جۇرگەنىمە بۇگىندە مەن ءوزىمدى باقىتتى سانايمىن جانە وسى ءۇشىن ەڭ اۋەلى اللاعا، ودان كەيىن مەنى ۇنەمى قولداپ كەلە جاتقان اناما العىسىم شەكسىز. ال ۇستازىم ريماس ءۆلاديميروۆيچتىڭ ماعان بەرگەن ءتالىمىن سوزبەن ايتىپ تاۋىسۋ مۇمكىن ەمەس. وسىنداي جاقسى ادامدى ۇستاز ەتكەن جاراتقانعا مىڭ دا ءبىر تاۋبە دەيمىن.

– ءسىز ءۇشىن رەجيسسەرلىك دەگەن نە؟

– مەن ءۇشىن رەجيسسەر بولۋ – ءومىر ءسۇرۋ. مەنىڭ قويىلىمىما كەلگەن كورەرمەن ويلانىپ قايتسا، دەمالىپ قايتسا، وزىمەن ءوزى سىرلاسىپ قايتسا، تاريحىن تانىپ قايتسا، ەڭ باستىسى باقىتتى بولىپ قايتسا – مەنىڭ ادامي دا، كاسىبي دە ميسسيامنىڭ ورىندالعانى. الايدا مەنىڭ ۇستازىم ايتادى: « ۇلى رەجيسسەرلەر – ۇلى وتىرىكشىلەر» دەپ. ءتىپتى ءساتتى وتكەن ءبىر پرەمەراسىنان كەيىن شىمىلدىقتىڭ ارتىنا بارىپ، «مەن تاعى دا كورەرمەندى الداپ سوقتىم» دەپ ك ۇلىپ تۇرعان تاماشا ءبىر تاريحي سۋرەتى بار. سوعان قاراپ ك ۇلىپ الامىن ۇنەمى. سوسىن ىلە جينالامىن. ويتكەنى ۇستازىمنىڭ بۇل پىكىرىمەن دە ابدەن كەلىسۋگە بولادى. ءبىز ساحنا ارقىلى وي ايتامىز. ال ونىڭ قانشالىقتى اقيقات ەكەنى وزىمىزگە عانا ايان. الەم ادەمى، ءومىر ءماندى بولۋى ءۇشىن، كورەرمەن باقىتتى بولۋى ءۇشىن ءبىز بارلىعىن ىستەيمىز. ادامعا سەزىم سىيلاي العانىم ءۇشىن دە باقىتتىمىن ەندەشە!

– بولاشاقتا ەلگە كەلىپ قىزمەت ەتۋ، قازاقستان تەاترلارىن دامىتۋعا اتسالىسۋ ويىڭىزدا جوق پا؟

– بۇل جەردە مەن ءبىر-اق نارسەنى ايتقىم كەلەدى: ونەردە شەكارا بولماۋى كەرەك. قيالدى، مۇمكىندىكتى شەكسىزدىككە ۇلاستىرا العاندا عانا شىعارماشىلىق ادامىنىڭ ماقساتى ورىندالادى. ەلگە كەلىپ قويىلىم قويۋعا ءاردايىم دا­يىنمىن. بىراق تۇبەگەيلى كەلۋ ازىرگە ويىم­دا جوق. بولاشاقتا تەك ماسكەۋمەن شەكتەلمەي، الەمنىڭ تۇكپىر-تۇكپىرىندە سپەكتاكل قويىپ، ۇلى مارتەبەلى ونەرگە قالتقىسىز قىزمەت ەتكىم كەلەدى. ءتۇرلى كاسىبي تاجىريبەلەرگە بارۋدى كوكسەيمىن. شەكسىز ونەر قۇدىرەتىنىڭ ارقاسىندا قازاقتىڭ ءبىر قىزىن الەم تانىپ جاتسا، سول ارقىلى قازاقستاندى مويىنداسا – مەن ءۇشىن باستى جەتىستىك سول!

– اڭگىمەڭىزگە راحمەت.

اڭگىمەلەسكەن

نازەركە جۇماباي،

«Egemen Qazaqstan»