ول ول ما, بۇدان كەيىن قازىرگى ءسىز بەن ءبىز كيىپ جۇرگەن شالباردى ويلاپ تاپتى. ات ۇستىندە ىڭعايلى وتىرايىن دەپ بيىك وكشەلى اياق كيىم جاساپ شىعاردى. ەندى ويلانساڭىز, ادامزات وركەنيەتىنە ۇلكەن جاڭالىق ەنگىزۋدە كوشپەندىلەر تۇرمىسىنىڭ تامشىداي ەمەس, تەڭىزدەي ۇلەسى بار. مۇنى سۋرەتشى نەللي بۋبەنىڭ «كوشپەندىنىڭ ءبىر كۇنى» كارتيناسىنان بايقايمىز.
قازاقى بوياۋدى قانىنا سىڭىرگەن قىلقالام شەبەرى ءوز تۋىندىلارىندا كوشپەندىلەردىڭ ءومىرى, كۇن مەن جارىق اياسىنداعى جۇمباق دالا تاريحى, ادەمى كيىنگەن ادامدار, تۇيە وركەشتەرىندەگى قۇندى جۇك بەينەلەرىندە بەرىلەدى. ونىڭ بارلىق كارتيناسى كوللاج, بەدەرلى پاستا جانە تۋىندىعا ەرەكشە سالتانات بەرەتىن التىنمەن جىلتىراتۋ سىندى كۇردەلى ارالاس تەحنيكامەن ورىندالعان.
«كوشپەندىنىڭ ءبىر كۇنى» كارتيناسىندا كوشپەندىلەر تۇرمىسىنىڭ پوەزياسى بەرىلگەن, ءوز حالقىنا, ونىڭ مادەنيەتىنە دەگەن سۇيىسپەنشىلىككە نەگىزدەلگەن دالا ءداستۇرى وزىندىك ەرەكشەلىگىمەن جازىلعان. شىعارما شارتتى تۇردە ەكى بولىمگە بولىنەدى: شىعىستىڭ كونە قالالارىنىڭ ساۋلەتىنە ءتان جۇك ارتقان تۇيەلەر, وڭ جاعىندا ەر ادامداردىڭ بەينەسى كورسەتىلگەن.
سۋرەتشى قاراما-قارسى قانىق تۇستەردى پايدالانعان, تۇلعالاردىڭ انىق نوبايى كەنەپتىڭ كومەسكى التىن فونىندا ەرەكشەلەنىپ, كورەرمەننىڭ نازارىن وزىنە تارتادى. نەللي بۋبە ءوز تۋىندىسىندا قازاقتىڭ ۇلتتىق كيىمىن كيگەن ءارتۇرلى جاستاعى ەر ادامداردى بەينەلەۋ ارقىلى ۇرپاق ساباقتاستىعىن كورسەتەدى.
باقساڭىز, تۋىندىنىڭ جوعارعى جاعىنا پەتروگليفتەردىڭ سۋرەتىن جانە ساق جاۋىنگەرلەرىنىڭ قارۋى سانالاتىن ەكى اقيناقتىڭ سۋرەتىن ورنالاستىرۋ ارقىلى كوشپەندىلەردىڭ بايىرعى مادەنيەتىن جىرلايدى. مۇندا سۋرەتكەر كوستيۋمدەرگە, باسكيىمگە, تۇرمىستىق ءداستۇرلى زاتتارعا ىلتيپاتپەن قارايدى. سول ارقىلى قازاق مادەنيەتىنىڭ تاريحىن عانا ەمەس, سونىمەن قاتار سكيف, ساق تايپالارىنىڭ ءداۋىرىن دە جىرلايدى.
