رىباكينا العاشقى اينالىمدا دۇنيەجۇزىلىك رەيتينگىدە 224-ورىندا تۇرعان, جارىسقا ارنايى شاقىرتۋ العان گەرمانيالىق ناستاسيا-ماريانا شۋنكپەن شەبەرلىك بايقاستى. قارسىلاستار بۇعان دەيىن كەزدەسپەگەن ەدى. وتكەن اپتادا ەلوردادا قازاقستان – گەرمانيا ماتچىندا لاۋرا زيگەمۋند پەن انجەليكا كەربەردى ۇتقان ەلەنا بۇل جولى دا ولاردىڭ وتانداسىنا تاپ بولدى. ءبىرىنشى پارتيادا 19 جاستاعى نەمىس سپورتشىسى 4:2 ەسەبىمەن العا شىققانىمەن, قازاقستاندىق تەننيسشى تارازى باسىن تەڭەستىردى. تاي-برەيكتە ە.رىباكينا باسىمدىق تانىتتى – 7:6 (7:3). ەكىنشى سەتتى ەلەنا برەيكپەن باستادى – 2:0. الايدا ماتچقا دوپ بەرگەندە, شۋنك برەيك جاساپ كەتتى – 5:5. دەگەنمەن رىباكينا سول بويدا قايتادان برەيككە قول جەتكىزدى – 6:5. سودان كەيىن مۇمكىندىگىن ءمۇلت جىبەرگەن جوق – 7:5.
ەكى ساعاتتان استام ۋاقىتقا سوزىلعان تارتىستى باسەكەدە قازاقستاندىق تەننيسشى 3 ەيسپەن بىرگە 9 برەيك-پوينتتىڭ ۇشەۋىن پايدالاندى. قارسىلاسى 3 ەيس, 2 برەيكپەن (9 برەيك-پوينت) كوزگە ءتۇستى. رىباكينا جۇلدە قورى 703 580 اقش دوللارىنا باعالانعان دودانىڭ شيرەك فينالىنا شىعۋ ءۇشىن الەمنىڭ 3-راكەتكاسى, يسپانيالىق پاۋلا بادوسامەن تارتىسقا تۇسەدى.
