«قىرعىزستاننىڭ ۇلتتىق بانكى اقشا اۋدارىمدارىن جۇزەگە اسىرۋ ەرەجەلەرىنە ۋاقىتشا وزگەرىستەر ەنگىزدى», دەپ حابارلايدى قارجى رەتتەۋشىسىنىڭ سايتى.
وزگەرىستەردىڭ ەنگىزىلۋى سوڭعى كەزدەرى رەسەي مەن قازاقستاننان دوللارمەن كەلەتىن اقشا اۋدارىمدارىنىڭ كولەمى كۇرت ارتىپ, كليەنتتەردىڭ قولما-قول دوللارمەن اۋدارۋدى سۇراپ جاتقاندىعىنا بايلانىستى.
«قازىرگى ۋاقىتتا قىرعىز رەسپۋبليكاسىنىڭ اۋماعىندا حالىقارالىق اقشا اۋدارۋ جۇيەسى ارقىلى الۋشىعا اقشا اۋدارىمىن بەرۋ تەك جونەلتۋشى ەلدىڭ ۆاليۋتاسىندا نەمەسە ۇلتتىق سوم ۆاليۋتاسىندا بولۋى مۇمكىن», دەپ مالىمدەدى قىرعىز رەسپۋبليكاسىنىڭ ۇلتتىق بانكى.
ەگەر رەسەيدەن اقشا اۋدارىمى جىبەرىلسە, ول الۋشىعا تەك رۋبلمەن, ەگەر قازاقستاننان بولسا - تەك تەڭگەمەن, باسقا ەلدەن بولسا - كوممەرتسيالىق بانكتىڭ باعامى بويىنشا ۇلتتىق ۆاليۋتادا بەرىلۋى كەرەك.
وزگەرىستەردىڭ ۋاقىتشا ەكەنى جانە قولما-قول دوللاردىڭ قىرعىزستاننان تىسقارى جەرلەرگە شىعۋىنىڭ كەرى اسەرىن ازايتۋعا باعىتتالعانى اتاپ ءوتىلدى.
