جەتىسۋ مەكتەبى دەگەندە, الدىمەن كوز الدىمىزعا اتى ءماشھۇر جامبىل, كەنەن, قاپەز, ءپىشان, دانەش راقىشەۆتار كەلەدى. بۇل رەتتە جەتىسۋ ءان مەكتەبىنىڭ كاسىبي تۇعىرىن قالاعان جانىبەك كارمەنوۆ ءوز الدىنا بولەك اڭگىمە. مىنە, سول ىزگى ساباقتاستىقتى جالعاعان ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ تاريحىندا التىن ارىپتەرمەن جازىلعان ءبىر جارقىن كەزەڭ بار. ول – اتى اڭىزعا اينالعان «جەتىسۋ» ستۋدەنتتەر ءان-بي ءانسامبلى. جاستاردان قۇرالعان ايگىلى ونەر ۇجىمى از ۋاقىتتىڭ ىشىندە بۇكىلوداقتىق بايقاۋدىڭ لاۋرەاتى اتانىپ, مينيسترلىكتىڭ قۇرمەت گراموتالارىمەن ماراپاتتالدى. سونىمەن بىرگە كەڭەس كاسىپوداعىنىڭ بىرنەشە مەدالىنە يە بولدى. بۇل تۋرالى بىزگە ۋنيۆەرسيتەت ىشىندەگى «رۋحاني جاڭعىرۋ» عىلىمي-ءبىلىم بەرۋ ورتالىعىنىڭ باس ادىسكەرى كلارا تاجيەۆا بايانداپ بەردى.
القيسسا, ءانسامبلدىڭ العاشقى شىعارماشىلىق جولى 1978 جىلدىڭ 8 مامىرىنان باستالدى. وسىدان تابانى كۇرەكتەي قىرىق ءتورت جىل بۇرىن, كوكتەمنىڭ شۋاقتى كۇنىندە ءى.جانسۇگىروۆ اتىنداعى مادەنيەت سارايىنىڭ ساحناسىندا ونەر ۇجىمىنىڭ تۇساۋى كەسىلدى. ءانسامبلدىڭ تۇراقتى جەتەكشىسى سول كەزدەگى ينستيتۋتتىڭ رەكتورى, تۋمىسىنان ۇلتقا جاناشىر مىرزاتاي جولداسبەكوۆ ەدى. ول ءاربىر انسامبل مۇشەسىنە باعىت-باعدار بەرىپ, شىعارماشىلىعىنا شابىت سىيلايدى. ال كوركەمدىك جەتەكشىسى مۋزىكا فاكۋلتەتىنىڭ دەكانى, قازكسر ەڭبەك سىڭىرگەن مادەنيەت قىزمەتكەرى, وقۋ ءىسىنىڭ ۇزدىگى اقسۇلۋ ماناسپاەۆا بولدى. ونەرلى ستۋدەنتتەرگە ەلگە بەلگىلى حورمەيستەرلەر سەرگەي موروزوۆ پەن وتتو رەفينيۋس مۋزىكالىق جەتەكشى بولىپ قىزمەت ەتتى. س.موروزوۆ ءان ايتۋ جانە مۋزىكا كافەدراسىنىڭ مەڭگەرۋشىسى, ونەر الەمىنەن حابارى مول بولۋمەن بىرگە جاستارعا كوپ قامقورلىق كورسەتتى.
ءانسامبلدىڭ قۇرىلۋىنا شىعارماشىلىق جاعىنان قولداۋ تانىتىپ, دەمەۋشىلىك جاساعان – كسرو حالىق ءارتىسى نۇرعيسا تىلەنديەۆ. سونىمەن بىرگە اقىن قادىر مىرزاليەۆ, بەلگىلى بالەت ءارتىسى داۋرەن ابيروۆ, ونەر مايتالماندارى مەڭتاي تىلەۋباەۆ, كەنجەبەك كۇمىسبەكوۆ, گالينا حاسانوۆا, امانتاي ەسىمبەكوۆ سىندى قايراتكەرلەر ستۋدەنتتەردىڭ العاشقى اياقالىستارىن قولداپ, بولاشاق باعىت-باعدارىن ايقىنداپ وتىردى. جاستاردىڭ ونەرىن سول كەزدەگى تالدىقورعان وبلىستىق پارتيا كوميتەتى مەن كاسىپوداق كەڭەسى دە جوعارى باعالاپ, ءارى قاراي جاندانۋىنا مۇمكىنشىلىك جاسادى.
ونەر ۇجىمىنىڭ تاريحى سان قاتپار. 1977 جىلى وبلىس ورتالىعىندا ءبىرىنشى بۇكىلوداقتىق فەستيۆال دۇركىرەپ وتەدى. وعان ينستيتۋتتىڭ رەكتورى مىرزاتاي جولداسبەكوۆ قاتىسادى. فەستيۆال وزدىگىنەن قۇرىلعان كوركەم شىعارماشىلىق ۇجىمدارىنا ارنالدى. سوندا رەكتور حالىقارالىق فەستيۆالدىڭ جەڭىمپازدارىن وبلىستىق كومسومول كوميتەتىنە شاقىرىپ, تالدىقورعان پەداگوگيكالىق ينستيتۋتىنا (قازىرگى جۋ) وقۋعا تۇسۋگە ۇسىنىس جاسايدى. وقۋ ورنىنىڭ باسشىسى ونەرلى قىز-جىگىتتەرگە وقىتۋشىلاردى بىردەن بەكىتىپ, قورىتىندى ەمتيحان تاپسىرۋ ءۇشىن «قارلىعاش» سپورتتىق ساۋىقتىرۋ لاگەرىنە جىبەرەدى. ەمتيحاننان 22 ونەرپاز جوعارى باعا الادى. ولاردىڭ ىشىندە تاتيانا پولتاۆسكايا, ايجان ءابىلماجىنوۆا, ۆلاديمير جانە الەكساندر گەينتس, گاليا اراپوۆا, اكىمجان توقتاقىنوۆ سەكىلدى تالانتتى ونەر يەلەرى بولدى. بۇلاردىڭ ءبارى جاڭادان اشىلعان مۋزىكا-پەداگوگيكا فاكۋلتەتىنىڭ ستۋدەنتتەرى اتانادى.
ەلدىڭ جوعارى باعاسىن الا باستاعان انسامبلگە كەيىنىرەك گۇلمايدان سۇندەتوۆا, عالىم سۇلەيمەنوۆ, ءامينا ايتوۆا, زاميرا تىلەشوۆا, ازات قۇسايىنوۆ, اسقاربەك بوزامبەكوۆ, فاريدا قۇدايبەرگەنوۆا, ستاليك رايىبەكوۆ سىندى تالانتتى ونەرپازدار كەلىپ, ۇجىمنىڭ ابىرويىن ودان ءارى اسقاقتاتتى. ءانسامبلدىڭ از-كەم قۇرىلۋ تاريحى وسىنداي. ۇجىم تەك ءان سالىپ قويماي, بي ونەرىن دە پاش ەتتى, حورمەن تانىلدى, ۆوكالدى حالىق اسپاپتارىندا وينادى.
سول كەزدەگى وبلىستىق «زاريا كوممۋنيزما» گازەتىنىڭ ءتىلشىسى ءانسامبلدىڭ العاشقى شىعارماشىلىق كونتسەرتىن: «انسامبل مۇشەلەرى كونتسەرتىن نۇرعيسا تىلەنديەۆتىڭ «جەتىسۋ» شىعارماسىمەن باستادى. وندا جەتىسۋلىقتاردىڭ ەڭبەك جولى كورسەتىلەدى. كونتسەرتتىڭ «تۋعان ەل» دەپ اتالۋى دا تەگىن ەمەس. ءانسامبلدىڭ رەپەرتۋارىندا ءان ونەرىنىڭ باي قورى بار. تاڭدالعان اندەر مازمۇنىندا وتانعا دەگەن ماحاببات, جەتىسۋعا دەگەن سۇيىسپەنشىلىك سەزىلەدى. كونتسەرتتە س.مۇحامەدجانوۆتىڭ «جورىق جىرى», م.تولەباەۆتىڭ «كەستەلى ورامالى», ە.راحماديەۆتىڭ «حورالى» شىرقالدى. اسىرەسە, ا.گەينتستىڭ, ك.جارقىنباەۆانىڭ, ب.الىباەۆانىڭ تالانتتارىنا ەرىكسىز تاڭداناسىڭ. كورەرمەندەر انشىلەردى ەرەكشى ىقىلاسپەن قابىلدادى», دەپ تەبىرەنە جەتكىزەدى.
ستۋدەنتتەردىڭ باعدارلاماسىندا كوپشىلىكتىڭ جۇرەگىنە جول تارتاتىن ونەر تۋىندىلارى كوپ بولدى. اتاپ ايتقاندا, «بالبىراۋىن», «قوسالقا» سەكىلدى قۇرمانعازىنىڭ كۇيلەرى, نۇرعيسا تىلەنديەۆتىڭ «جەتىسۋ», ء«وز ەلىم», «اق شاعالا», «عانيلار ەشقاشان ولمەيدى», «شاتتىق جىرلارى», «جەڭىس سالتاناتى» مۋزىكالىق شىعارمالارى, تالدىقورعان قىزىلشاشىلارىنىڭ مارشى كوپشىلىك ءسۇيىپ تىڭدايتىن تۋىندىلارعا اينالدى. ءانسامبلدىڭ اتى وداقتاس ەلدەر اراسىنا جانە الىس-جاقىن شەتەلگە كەڭىنەن تارادى. ءانشى, بيشىلەردىڭ, اسپاپتاردا وينايتىن شەبەرلەردىڭ دارىنى راسىندا دا ەرەكشە ەدى. ءار جىلدارى ونەر ۇجىمىنىڭ كونتسەرتتىك باعدارلامالارىنا ماسكەۋدىڭ, لاتۆيانىڭ, گەرمانيانىڭ, يسپانيانىڭ, رەسەيدىڭ, بولگاريانىڭ, وزبەكستاننىڭ, فرانتسيانىڭ جانە قىتايدىڭ كورەرمەندەرى ءتانتى بولدى.
1990 جىلدىڭ جازىندا الماتى قالاسىندا «ازيا داۋىسى» فەستيۆالى وتەدى. وعان 15 مەملەكەتتەن ونەرپازدار قاتىسادى. سول بايقاۋدا انسامبل مۇشەلەرى ەلگە تانىمال ونەر جۇلدىزدارىمەن بىرگە ساحنادا ءان شىرقايدى. رەسپۋبليكالىق «قازاقتەلەفيلم» تەلەارناسى ءانسامبلدىڭ تىنىسى جايلى «جەتىسۋدىڭ جاستىعى», «جەتىسۋ» اتتى دەرەكتى فيلمدەر تۇسىرەدى. سوڭعى فيلم قازىرگى تاڭدا جۋ-ءدىڭ مۋزەي قورىندا ساقتاۋلى. ونەر ۇجىمىنىڭ جەكەلەگەن انشىلەرى تالاي تەلەباعدارلامالارعا ءتۇسىپ, اننەن شاشۋ شاشتى. ولاردىڭ ىشىندە ايگىلى «التىباقان», «تاماشا», «اقىندار ايتىسى» باعدارلامالارى بار.
«جەتىسۋ» حالىقتىق ءان-بي ءانسامبلى – كوپشىلىككە كەڭىنەن تانىمال ۇجىم. ۋنيۆەرسيتەتتىڭ عانا ەمەس, رەسپۋبليكانىڭ ەسىمىن الەمگە ايگىلەگەن ۇجىمنان ت.پولتاۆسكايا, گ.سۇندەتوۆا, ع.سۇلەيمەنوۆ, ج.تاۋبالديەۆا, س.اجىبەكوۆا, ح.ۆاليتوۆا سىندى تانىمال ونەر جۇلدىزدارى تۇلەپ ۇشتى. بۇگىندە انسامبل قۇرامىندا بولعان بىرقاتار ونەرپاز اتالعان ءبىلىم ورداسىنىڭ قابىرعاسىندا ابىرويلى ەڭبەك ەتۋدە. ولاردىڭ ەڭبەگى مەملەكەت تاراپىنان ەلەنىپ, بيىك بەلەستەردى باعىندىرعان. ماسەلەن, ع.سۇلەيمەنوۆ مادەنيەت قايراتكەرى, پروفەسسور بولسا, ە.تەمىروۆ ءبىلىم بەرۋ ءىسىنىڭ ۇزدىگى. ال ج.تاۋبالديەۆا, ا.قۇرساباەۆ, گ.ساربالينا, س.كۇنتۋعانوۆا, س.شىنىباەۆتار عىلىم سالاسىندا جەمىستى ەڭبەك ەتىپ جۇرگەن سان قىرلى تالانت يەلەرى. بۇدان بولەك, جوعارى وقۋ ورداسىندا تانىمال ديريجەر ە.توقتاروۆ, دوتسەنت ح.ۆاليتوۆا, سازگەر س.اجىبەكوۆ, ءانشى ا.بۇركەەۆا, وقىتۋشىلار گ.اراپوۆا, ج.اكپاروۆا سياقتى انسامبل مۇشەلەرى قىزمەت اتقاردى.
بۇگىندە تاريحى تەرەڭ انسامبل ءوز جۇمىسىن جالعاستىرۋدا. وعان ۋنيۆەرسيتەت باسشىلىعى تاراپىنان قولداۋ دا كورسەتىلىپ كەلەدى. جان-جاقتى ىزدەنىستىڭ ناتيجەسىندە 2018 جىلى انسامبل ءوزىنىڭ قىرىق جىلدىق مەرەيتويىن دا اتاپ ءوتىپتى. مۋزىكاعا اۋەس, ۇلتتىق ونەردى ۇستىنىنا بالاعان شىعارماشىل جاستاردىڭ شوعىرىنا اينالعان اتاقتى ءانسامبلدىڭ ءالى دە قوعامعا بەرەر پايداسى مول. وسى قالپىنان تانباسا ونەر ۇجىمى جەتىسۋ ءان-ونەرىن ولتىرمەيدى.
