كورنەكتى مەملەكەت قايراتكەرىنىڭ 110 جىلدىعىن مەرەكەلەۋ اياسىندا مۇراجاي قالپىنا كەلتىرىلىپ, مۇراجاي-ءۇي بولىپ قايتا اشىلدى.
مۇراجايدىڭ اشىلۋ راسىمىنە قالا اكىمى ەربولات دوساەۆ, د.ا.قوناەۆتىڭ حالىقارالىق قوعامدىق قورىنىڭ توراعاسى ەلدار قوناەۆ, د.ا.قوناەۆتىڭ جيەنى ديار قوناەۆ, ونىڭ جەكە دارىگەرى احات مۋليۋكوۆ, دوسى ءارى سەرىكتەسى الەكساندر گويكولوۆ قاتىستى.
رەستاۆراتسيا جانە ەكسپوزيتسيا پروتسەسىنە مۇراجاي جانە مۇراعات ءىسى سالاسىنداعى جەتەكشى ماماندار, ديزاينەرلەر, مۇسىنشىلەر, سۋرەتشىلەر, بەينەينجەنەرلەر جانە باسقالارى تارتىلدى. جۇمىس بارىسىندا قوناەۆتىڭ حالىقارالىق قورىمەن كەلىسىلگەن تۇجىرىمداما مەن جوبانىڭ ەسكيزى ازىرلەندى.
رەەكسپوزيتسيا تاقىرىبىنىڭ نەگىزىنە ساياساتكەردىڭ ەل ومىرىندەگى ماڭىزدى تاريحي وقيعالارعا دەگەن جەكە كوزقاراسىن سۋرەتتەيتىن «ستاليننەن گورباچەۆكە دەيىن» اۆتوبيوگرافيالىق كىتابى ارقاۋ بولدى.
مۇراجايدا حرونولوگيالىق تارتىپتە ورنالاستىرىلعان مۇراعاتتىق قۇجاتتار, فوتوسۋرەتتەر مەن ەكسپوناتتار دىنمۇحاممەد قوناەۆتىڭ كورنەكتى قوعامدىق-ساياسي قايراتكەر رەتىندەگى الىپ تۇلعاسىن بەينەلەيدى.
ايتا كەتسەك, بارلىق ەكسپوناتتار, سونىڭ ىشىندە دىنمۇحامەد قوناەۆتىڭ جەكە زاتتارى بۇرىنعى قالپىندا ساقتالدى.
مۇراجاي زاماناۋي ساندىق جانە مۋلتيمەديالىق تەحنولوگيالارمەن جابدىقتالدى, ەندى ساياساتكەردىڭ ءومىرى مەن قىزمەتىنە قىزىققان كەلۋشىلەر اۋديو نۇسقاۋلىقتاردى قولدانا الادى.
ەسكە سالا كەتسەك, مۇراجاي 2002 جىلى قوناەۆتىڭ 90 جىلدىعىنا وراي اشىلعان ەدى. بۇگىندە مۇراجاي قورىندا 8 196 ەكسپونات بار.
