«مەملەكەت, كاسىپورىندار مەن وقۋ ورىندارىنىڭ اراسىنداعى جاۋاپكەرشىلىك انىق بولىنگەندە عانا كادر دايارلاۋدىڭ ساپاسى قامتاماسىز ەتىلەدى. مۇنى الەمدىك تاجىريبە دە انىق كورسەتىپ وتىر. سوندىقتان اكىمدىكتەر كوللەدجدەر مەن كاسىپورىنداردىڭ ءوزارا ءتيىمدى ارىپتەستىك ورناتۋى ءۇشىن شارالار قابىلداۋى قاجەت. ياعني, كوللەدجدەردى قامقورلىققا الۋ, ءدۋالدى وقىتۋ جۇيەسىن دامىتۋعا جاعداي جاسالۋى ءتيىس. مامانداردى الدىن الا دايارلاۋ ءۇشىن «جاڭا كاسىپتەر اتلاسىن» دا پايدالانعان ءجون», دەدى پرەمەر-مينيستر ۇكىمەت وتىرىسىندا.
ەڭ باستىسى – كوللەدجدەر مەن ۋنيۆەرسيتەتتەردىڭ تۇلەكتەرى ەڭبەك نارىعىندا سۇرانىسقا يە بولۋى كەرەك.
«كادر دايارلاۋدا ماماندارعا دەگەن قازىرگى سۇرانىسپەن قاتار, ەڭبەك نارىعىنىڭ بولجامدى دەرەكتەرى دە نەگىزگە الىنۋعا ءتيىس.
بۇل مىندەتتەردىڭ بارلىعى 2025 جىلعا دەيىنگى ءبىلىم بەرۋدى دامىتۋ تۇجىرىمداماسىندا ەسكەرىلۋى كەرەك. سونىمەن قاتار ەڭبەك مينيسترلىگى مۇددەلى مەملەكەتتىك ورگاندارمەن, اكىمدىكتەرمەن جانە «اتامەكەن» پالاتاسىمەن بىرلەسىپ, قىسقامەرزىمدى وقىتۋدى ۇلعايتۋ ماسەلەسىن پىسىقتاپ, ونىڭ تيىمدىلىگىنە مونيتورينگ جۇرگىزۋدى قامتاماسىز ەتسىن», دەدى ءاليحان سمايىلوۆ.
ودان بولەك, ءوڭىر اكىمدىكتەرىنە تەحنيكالىق جانە كاسىپتىك ءبىلىمى بار كادرلاردى دايارلاۋعا جەرگىلىكتى بيۋدجەتتەن بولىنەتىن مەملەكەتتىك ءبىلىم بەرۋ تاپسىرىسىن ۇلعايتۋ, «جاس مامان» جوباسىنىڭ نەگىزىندە كوللەدجدەردى جاراقتاندىرۋعا قاراجات ءبولۋ, كاسىپورىندارمەن بىرگە مامانداردى نىسانالى تۇردە دايارلاۋدى جولعا قويۋ تاپسىرمالارى بەرىلدى.
ايانا توعانبەك
