2012 جىلى ەلىمىزدە «ەنەرگيا ۇنەمدەۋ تۋرالى» سالالىق زاڭ قابىلداندى. ال 2013 جىلدان باستاپ مەملەكەتتىك ەنەرگەتيكالىق ءتىزىلىمدى قالىپتاستىرۋ جانە جۇرگىزۋ قاعيدالارى رەسمي تۇردە كۇشىنە ەندى. ونىڭ وپەراتورى – يندۋستريا جانە ينفراقۇرىلىمدىق دامۋ مينيسترلىگىنە قاراستى ەلەكتر ەنەرگەتيكاسىن دامىتۋ جانە ەنەرگيا ۇنەمدەۋ ينستيتۋتى. مەملەكەتتىك ەنەرگەتيكالىق تىزىلىمگە ەنگىزىلگەن ەنەرگيا رەسۋرستارىنىڭ ءىرى تۇتىنۋشىلارى جىل سايىن ۇسىناتىن دەرەكتەردىڭ نەگىزىندە ينستيتۋت ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ بويىنشا جۇرگىزىلگەن ءىس-شارالارعا باعالاۋ, تالداۋ جۇرگىزەدى.
ەنەرگيا ۇنەمدەۋ تۋرالى زاڭعا سايكەس مەملەكەتتىك تىزىلىمگە ەنگىزىلگەن كاسىپورىندار ەنەرگيا رەسۋرستارىن تۇتىنۋ كولەمىنىڭ جىل سايىن تومەندەۋىن قامتاماسىز ەتۋگە مىندەتتى. ءتىزىلىم سۋبەكتىلەرىنىڭ ەنەرگيا تۇتىنۋىن تالداۋ كەزىندە جىلىنا 100 مىڭ توننادان استام شارتتى وتىن تۇتىناتىن 72 كاسىپورىن انىقتالدى. بۇل نەگىزىنەن تاۋ-كەن مەتاللۋرگيا كەشەنى مەن وڭدەۋ ونەركاسىبىنىڭ ءىرى كاسىپورىندارى. ولاردىڭ سانى مەمتىزىلىمگە ەنگىزىلگەن ۇيىمداردىڭ جالپى سانىنىڭ نەبارى 0,8 پايىزىن قۇرايدى. بۇل سۋبەكتىلەردىڭ تۇتىنۋ ۇلەسىنە مەملەكەتتىك ەنەرگەتيكالىق ءتىزىلىم سۋبەكتىلەرىنىڭ ەنەرگيا رەسۋرستارىن جالپى تۇتىنۋىنىڭ 84 پايىزى جانە 2020 جىلى ەلدەگى ەنەرگيانى جالپى تۇتىنۋدىڭ 30 پايىزى كىرەدى.
مەملەكەتتىك ءتىزىلىم سۋبەكتىلەرى تۇتىناتىن نەگىزگى ەنەرگيا رەسۋرستارى تاس كومىر ء(تىزىلىم سۋبەكتىلەرىنىڭ ەنەرگيا رەسۋرستارىن جالپى تۇتىنۋىنىڭ 51 پايىزى) جانە تابيعي گاز (21 پايىز) بولىپ سانالادى.
ءىرى ونەركاسىپتىك كاسىپورىندار وتكىزگەن ەنەرگيا ءاۋديتى قازاقستاندا ەنەرگيا ۇنەمدەۋ الەۋەتى 2,3 ملن توننا شارتتى وتىندى قۇرايتىنىن كورسەتتى. وسى الەۋەتتى ىسكە اسىرۋ كەزىندە ەلدىڭ ىشكى جالپى ونىمدەگى ەنەرگيا سىيىمدىلىعىن جىل سايىن 4 پايىزعا تومەندەتۋگە بولادى. مىسالى, «قازتسينك» جشس ەنەرگيانى ءتيىمدى ۇنەمدەۋ ءىس-شارالارىن ەنگىزە وتىرىپ, تازارتىلعان ءبىر توننا قورعاسىن وندىرۋگە جۇمسالاتىن ەلەكتر ەنەرگياسىنىڭ مەنشىكتى شىعىنىن 25 پايىزعا تومەندەتتى, ال جىلدىق ۇنەم 716 ملن تەڭگەنى قۇرادى. «كارتسەمەنت» اق ءبىر توننا تسەمەنت وندىرۋگە جۇمسالاتىن ەلەكتر ەنەرگياسىنىڭ مەنشىكتى شىعىنىن 10 پايىزعا ازايتتى. بۇل رەتتە جىلدىق ۇنەم 207 ملن تەڭگەگە تەڭ.
2014 جىلدان 2020 جىلعا دەيىن قازاقستاننىڭ ءىرى كاسىپورىندارى ەنەرگيا ۇنەمدەۋ تەحنولوگيالارى مەن ەنەرگيا تيىمدىلىگىن ارتتىرۋ جونىندەگى شارالارعا 150 ملرد تەڭگەگە جۋىق ينۆەستيتسيا سالدى. ناتيجەسىندە 2019 جىلعا قاراي قازاقستان ىشكى جالپى ءونىمىنىڭ ەنەرگيا سىيىمدىلىعى 2008 جىلعى دەڭگەيدەن 33 پايىزعا تومەندەدى. 2020 جىلى مەملەكەتتىك ءتىزىلىم سۋبەكتىلەرىنىڭ جالپى تۇتىنۋى تاعى 5 پايىزعا ازايدى. اتاپ ايتقاندا, وتكەن جىلى ەنەرگيا تۇتىنۋ جىلىنا 58,2 ملن توننا شارتتى وتىندى قۇرادى. ونىڭ ىشىندە ەنەرگەتيكانىڭ ۇلەسى 48 پايىزعا, وڭدەۋ ونەركاسىبى – 24 پايىزعا, تاۋ-كەن مەتاللۋرگيا كەشەنى 16 پايىزعا تەڭ.
ەلىمىزدە ەنەرگيا تۇتىنۋ تومەندەگەنىمەن, باسقا ەلدەرمەن سالىستىرعاندا قازاقستاننىڭ ىشكى جالپى ءونىمىنىڭ ەنەرگيا سىيىمدىلىعىنىڭ كورسەتكىشى ءالى دە جوعارى.
2017 جىلى ەلەكتر ەنەرگەتيكاسىن دامىتۋ جانە ەنەرگيا ۇنەمدەۋ ينستيتۋتى مەملەكەتتىك ءتىزىلىم سۋبەكتىلەرىنەن اقپارات جيناۋ تەتىگىن اۆتوماتتاندىرعانىن اتاپ وتكەن ءجون. ەندى كاسىپورىندار ەتسق كومەگىمەن اقپاراتتى پورتالعا وزدەرى جۇكتەيدى. بۇعان دەيىن ينستيتۋت قىزمەتكەرلەرى مالىمەتتەردى قولمەن تولتىراتىن. وسىلايشا دەرەكتەردى وزەكتەندىرۋ جۇمىسى جەڭىلدەدى.
2021 جىلى اۆتوماتتاندىرىلعان اقپاراتتىق جۇيە ارقىلى اقپارات ۇسىنعان ءتىزىلىم سۋبەكتىلەرىنىڭ سانى تىزىلىمگە ەنگىزىلگەن كاسىپورىنداردىڭ جالپى سانىنىڭ 91 پايىزىنا دەيىن ءوستى. قازىرگى ۋاقىتتا مەملەكەتتىك ەنەرگەتيكالىق تىزىلىمدە 21 516 كاسىپورىن بار.
