پرەزيدەنت بۇگىن قول قويعان «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىقتا وسىنداي تارماق بار. «ۇكىمەت, ورتالىق جانە جەرگىلىكتى اتقارۋشى ورگاندار جانىنداعى كونسۋلتاتيۆتىك-كەڭەسشى ورگانداردىڭ سانىن ەكى ەسە قىسقارتۋدى قامتاماسىز ەتسىن», دەپ جازىلعان قۇجاتتا.
سونداي-اق ۇكىمەتكە وسى ەكى اي ىشىندە ازاماتتار مەن بيزنەس نەعۇرلىم تالاپ ەتەتىن ومىرلىك جانە ىسكەرلىك جاعدايلاردى قوسىپ, ولاردىڭ رەينجينيرينگى مەن اۆتوماتتاندىرىلۋىن قامتاماسىز ەتۋ, كورسەتىلەتىن مەملەكەتتىك قىزمەتتەر ءتىزىلىمىن قالىپتاستىرۋ تاسىلدەرىن قايتا قاراۋ جۇكتەلىپ وتىر.
«ازاماتتارمەن كوممۋنيكاتسيا جانە ۆەدومستۆوارالىق جەدەل ءوزارا ءىس-قيمىل جاساۋ ماقساتىندا اشىق كەڭەستەر وتكىزۋ ءۇشىن قولجەتىمدى ونلاين-سەرۆيستەردى پايدالانۋ مۇمكىندىگىن قامتاماسىز ەتسىن», دەلىنگەن پرەزيدەنت جارلىعىندا.
