جۇرگىزىلگەن مونيتورينگتىڭ وڭ اسەرىن ەسكەرە وتىرىپ, بۇل باعىتتاعى جۇمىس بيىل دا جالعاسىن تاۋىپ 1 توقسانداعى جاعداي بويىنشا بيۋدجەت قاراجاتىن ۇنەمدەۋ 481,7 ملن تەڭگەگە جەتكەن.
مەملەكەتتىك ورگاندار مەن ۇيىمداردىڭ مەملەكەتتىك ساتىپ الۋ جوسپارىنىڭ مونيتورينگى 7 كونكۋرس بويىنشا شەكتى باعالاردىڭ كوتەرىلۋىن بەلگىلەۋگە مۇمكىندىك بەردى.
ساتىپ الىناتىن تاۋارلار سانى مەن باعانى كوتەرمەلەپ كورسەتۋ فاكتىلەرى ەلوردانىڭ ءبىلىم بەرۋ ورىندارىنىڭ مەملەكەتتىك ساتىپ الۋ جوسپارلارىندا ءجيى انىقتالىپ جاتادى. مىسالى, 737 وقۋشى ءبىلىم الاتىن نۇر-سۇلتان قالاسىنداعى مەكتەپتەردىڭ بىرىندە 20 ملن تەڭگەدەن استام قارجىعا 4 توننا شاي, 1,5 توننا يتمۇرىن جانە 1,3 توننا ليمون ساتىپ الۋ جوسپارلانعان بولاتىن. سىبايلاس جەمقورلىققا قارسى قىزمەتتىڭ ۇسىنىمدارى بويىنشا ساتىپ الىناتىن تاۋارلاردىڭ جوسپارلانعان كولەمى قايتا قارالىپ, كولەمى ءبىراز قىسقارتىلدى. ال ۇنەمدەۋ 99 پايىزدى قۇرادى.
تاعى ءبىر فاكتى بويىنشا ەلورداداعى ءبىلىم وردالارىنىڭ بىرىنە جالپى سوماسى 11,2 ملن تەڭگەگە باعالانعان 250 ەسىك توسپاسىن ساتىپ الۋ جوسپارلانعان. قالالىق ءبىلىم باسقارماسىنىڭ مەكتەپكە دەيىنگى ۇيىمى مەن نۇر-سۇلتان قالاسى سىبايلاس جەمقورلىققا قارسى قىزمەتتىڭ ۇسىنىمدارىن قاراۋ كەزىندە بۇل قارجى كولەمى ءبىرشاما قىسقارتىلعان. سونىڭ ناتيجەسىندە, مەملەكەتتىك بيۋدجەتتى ۇنەمدەۋ 10 ملن تەڭگەنى قۇرادى.
