قوعام • 13 ءساۋىر، 2022

ەلىمىزدە ءدارى-دارمەك باعاسى قىمباتتادى

قازاقستاندا فارماتسەۆتيكالىق ونىمدەر مەن پرەپاراتتار ءوندىرىسى ءبىر جىلدا 17%-عا ءوستى. سونداي-اق سەكتورداعى بولشەك ساۋدا باعالارى ءبىر جىلدا 6%-عا وسكەن، دەپ حابارلايدى Egemen.kz.

Egemen Qazaqstan

ساراپشىلاردىڭ دەرەكتەرى بويىنشا، 2022 جىلدىڭ قاڭتار-اقپان ايلارىندا ەلىمىزدە فارماتسەۆتيكالىق ونىمدەر 28،6 ملرد تەڭگەگە ءوندىرىلدى. بۇل وتكەن جىلمەن سالىستىرعاندا قۇندىق ماندە 11،5%-عا وسكەن.

وسى جىلدىڭ ەكى ايىنىڭ قورىتىندىسى بويىنشا ءدارى-دارمەك شىعارۋ 24،7 ملرد تەڭگەنى قۇرادى. بۇل كورسەتكىش ءبىر جىل بۇرىنعىعا قاراعاندا 21،7%-عا ارتىق. وزگە فارماتسەۆتيكالىق تاۋارلار 3،3 ملرد تەڭگەگە ءوندىرىلدى.

ساراپشىلاردىڭ ايتۋىنشا، تاڭۋ جابىسقاق ماتەريالدارى، كەتگۋت جانە وسىعان ۇقساس ماتەريالدار، سونداي-اق العاشقى كومەك كورسەتۋ ءدارى قوبديشالارى (49،8% - عا، 34 تونناعا دەيىن)، دياگنوستيكالىق رەاگەنتتەر مەن وزگە دە فارماتسەۆتيكالىق پرەپاراتتار (38،6 ەسە، 133،2 تونناعا دەيىن) ءوندىرىسى ارتتى.

ءوندىرىستىڭ ءوسۋ اياسىندا سەكتورداعى يمپورت قىسقارۋدا. ماسەلەن قاڭتار ايىنىڭ قورىتىندىسى بويىنشا ەلگە 64،4 ملن دوللار سوماسىنا 1،8 مىڭ توننا ءدارى-دارمەك جەتكىزىلدى.

تمد ەلدەرىنەن سوماسى 8،4 ملن دوللارعا 567،4 توننا ءدارى-دارمەك اكەلىندى. مۇندا يمپورتتىڭ نەگىزگى كولەمى رەسەيگە تيەسىلى. نەگىزگى جەتكىزۋشىلەردىڭ ۇشتىگىندە وزبەكستان مەن بەلارۋس تا بار.

تمد قۇرامىنا كىرمەيتىن ەلدەردەن قازاقستان 56 ملن دوللار سوماسىنا 1،2 مىڭ توننا ءدارى-دارمەك اكەلدى. مۇندا قازاقستان ءۇشىن نەگىزگى جەتكىزۋشى قىتاي بولدى: 263،4 توننا ءدارى-دارمەك ءبىر جىل بۇرىنعىعا قاراعاندا 48،3% - عا از. كوشباسشىلار ۇشتىگىنە گەرمانيا مەن ءۇندىستان دا كىردى.

سونداي-اق زەرتتەۋشىلەر مالىمدەگەندەي، قازاقستاننىڭ ىشكى نارىعىنداعى فارماتسەۆتيكالىق پرەپاراتتاردىڭ بولشەك ساۋدا باعاسى 2022 جىلعى ناۋرىزدىڭ قورىتىندىسى بويىنشا ءبىر ايدا 1،7% - عا، جىل باسىنان 3،7% - عا جانە ءبىر جىلدا 5،8% - عا ءوستى.

جىلدىق كورسەتكىش بويىنشا ەڭ قىمبات باعا شىمكەنت (پليۋس 12،1%)، اقمولا (پليۋس 10%) جانە الماتى (پليۋس 9،3%) وبلىستارىندا. باعانىڭ ەڭ تومەنگى ءوسىمى پاۆلودار وبلىسىندا تىركەلگەن، جىلىنا 2،9% - عا عانا ارتقان.

ايانا توعانبەك

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز