نۇر-سۇلتان قالاسى اكىمدىگى جانە ۇلتتىق اسكەري-پاتريوتتىق ورتالىعىنىڭ قولداۋىمەن, «جاس سارباز» جاسوسپىرىمدەر اسكەري-پاتريوتتىق قوزعالىسىنىڭ ەلوردالىق فيليالىنىڭ ۇيىمداستىرۋىمەن وتكەن ءىس-شاراعا قورعانىس مينيسترلىگىنىڭ وكىلدەرى, گەنەرالدار, اۋدان اكىمدەرى جانە جاس ساربازدار قاتىستى.
كەزدەسۋ بارىسىندا توقتار اۋباكىروۆ عارىش الەمىنە قاتىستى دەرەكتەرمەن ءبولىسىپ, عارىش الەمىن باعىندىرعان ساتىندەگى ەستەن كەتپەس ەستەلىكتەرىن ايتىپ بەردى. سونداي-اق ول عيبراتقا تولى عۇمىرىندا اتقارعان ەلەۋلى جۇمىستارى تۋرالى تەبىرەنە اڭگىمەلەدى. حالىق قاھارمانىنىڭ قىزىقتى اڭگىمەلەرى ءىس-شاراعا قاتىسقان جاستاردى ۇلكەن اسەرگە بولەدى. كەيىننەن توقتار اۋباكىروۆ جاس ساربازدارعا قولتاڭبا بەرىپ, ارنايى ەستەلىك سىيلىقتارىن تابىستادى.
كەزدەسۋ بارىسىندا توقتار اۋباكىروۆكە «جاس سارباز» قوزعالىسىنىڭ تاربيەلەنۋشىلەرى كوكەيلەرىندە جۇرگەن ساۋالدارىن قويدى. حالىق قاھارمانى جاسوسپىرىمدەرمەن ەمەن-جارقىن اڭگىمەلەسىپ, عارىش الەمىنە قاتىستى ويلارىن ورتاعا سالدى.
ء«بىز بۇل ءىس-شارانى جاسوپىرىمدەر قازاقتىڭ دارابوز تۇلعاسىنىڭ تاعىلىمعا تولى ءومىر جولىمەن تانىسسىن دەگەن ماقساتتا ۇيىمداستىردىق. جاستار جاعى ەل ماقتاعان تۇلعالاردىڭ ەرلىككە تولى ەڭبەگىن جادىنان شىعارماۋى كەرەك. حالىق قاھارمانى توقتار اۋباكىروۆ اعامىزدىڭ كىتاپقا جازىلماعان جەكە تاريحىن ءوز سوزىمەن شىنايى جەتكىزگەنى جينالعاندار ءۇشىن ۇلكەن ولجا بولدى», دەدى «جاس سارباز» جاسوسپىرىمدەر اسكەري-پاتريوتتىق قوزعالىسى نۇر-سۇلتان قالالىق فيليالىنىڭ توراعاسى اسحات نالشىبەك كەزدەسۋدە سويلەگەن سوزىندە.
كەزدەسۋ سوڭىندا قوناقتار قارۋلى كۇشتەردىڭ ۇلتتىق اسكەري مۋزەيىندە ۇيىمداستىرىلعان «عارىشقا جول» كورمەسىنىڭ اشىلۋ سالتاناتىنا قاتىستى.
